Read Achang ESAIA 14 Bible Online

ESAIA 14 - Achang bible

ESAIA 14

¹YHENSAIN ka nyah dius Israel lyis doms nhaiqnyen las nyamoq lyis nyah dius khyvlyis khyen yoeus. Nyang nyamoq lyis nyamoq nyang dah mau mas doms nyeis nhang das. Gohmau bang lyis eq nyamoq yah dvgeh los nyeis nhang das.

²YHENSAIN Israel jens lyis dyei toh dah mau mas nyamoq tauh los lyis dius nyau nyoshoq nyamoq lyis pangh das. Houmha hauh dius nyau jens gas Israel jens lyis jons teh phuqsoe das. Xik pheh Israel jens lyis nyhik bang lyis gvshih Israel jens yah nyhik das; xikpheh Israel lyis zaiq khoq bang lyis Israel jens yah guon das.

³YHENSAIN Israel dius jens lyis nyamoq dah nos cho, shanghsenh cho yahge tsoengh kuot nhang dah muh changh masyah lhuiq kat das.

⁴Nyang haih zis kuot lyis nyamoq Babilon hwankti lhyi jwangh zis gas, Lhoeng dah hwankti ka gyoh goeus. Nyang hank lyis eq khanhamp eq ma doms yoh zaiq lo.

⁵YHENSAIN ka ma gis dah guon bang yomsoq lyis thank loh nhang.

⁶Nyamoq gas dius jens lyis nhaiqyo zis yah zaiq. Nyamoq zan ung los dah dius nyau jens lyis ma lyenlo shoeuhshih.

⁷Gvshih thang thank lyis mungkvn gonh gas nyenstap zis yah no las yuk khanghmuh gaus zis yah chunghthwe tsain kat.

⁸Lebanon mas dah arit zains yahge xoeuh zains gas gyoh goeus dah hwankti gvng mas gauslaus nyeis. Khasoeh ge lyis nyang dyuk loh goeus las saiq hank ma los thoeuq lo das, ge.

⁹Shei mungkvn gas Babilon hwankti lhyi zes das zis cicont nghuot. Nyeisjvng thoq mas yomsoq bos bang dah sidyos gas haih cho lhyi zes nhau kat. Hwankti jens dah sidyos jens gas nyamoq dah hwankti tank masyah tsain toq.

¹⁰Nyamoq dvnganhmoq nvng lyis lui kat. Nvng gas ngamoq teh yomnhuk los goeus. Ngamoq teh bweh los goeus, ge.

¹¹Nvng gas toenk khvlhank thwe yah chungh zis gyangh xauh, nghuot laus eq gvshih nvng shei bang dah mungkvn mas nghuot. Nvng lukdung yhetyos mas yhet las wudes mis yah phomh toh.

¹²Bvng dah buh nyhiq, Babilon hwankti, nvng maukhung mhayah gyoh goeus! Xikpheh nvng dius nyau jens lyis zan ung laus eq gvshih nvng nyeisjvng mas khyoq zis xauh goeus.

¹³Nvng maukhung doq las nyhang thank kyi jens thoq mas nah hwankti tank toh das ge nghamh thyet toh. Mangso jens tsain huom dah mautsung pheh boms mas hwankti teh tsung das ge nghamh.

¹⁴Nvng jyommauh thyoh mas doq las Nyhang Thank Soeu teh kuot das, ge goeus.

¹⁵Nghuot laus eq hauh gungsthaiq noq thank dah shei mungkvn mas khyoq zis xauh das.

¹⁶Shei bang gas nvng lyis yoeuh tsuk toh das. Nyamoq nyei das zis gas, Haih soeu ka nyeisjvng lyis nhont las munghdan jens lyis gyuk nvn nhang soeu ma nghuot lhyeh?

¹⁷Haih soeu ka wus jens lyis mhont las Mungkvn lyis mhanhdyvp kuot soeu ma nghuot lhyeh? nyah thung dius jens lyis khanhamp eq ma phank kat ku soeu ma nghuot lhyeh?

¹⁸Nyeisjvng hwankti jens dvnganh gas nyamoq nyang dah khoek lop yungh mas tsain joq.

¹⁹Nghuot laus eq nvng lop ma yoh las nah mvng gas doeuh pop toh. Hauh yvlyis jes mas gyoh dah jeslo jens mvng yah tsain nghop zis yah luktyoq dwang mas nyamoq yah dvgeh doeuh kat las tsain nang.

²⁰Nvng nah mau lyis lhoeu thyoq tyamp las nah dius jens lyis sat yvmvyah nvng gas gohtoeu hwankti jens teh ma xauh nyhop das. Nah dah ma gis yhenbang hank eq ma doeng das.

²¹Sat das bang sont lo bas jungh! Nyamoq dah phauh thyeih yaunos gvng mas hwankti Lo jens shei das. Nyeisjvng lyis hank khanhamp eq ma xauh guon das, wus jens ma dyingh das.

²²Maukhung Jesphung YHENSAIN taiq. Ngos Babilon lyis zan las thyoqpi das. Ngos loshang jens doeng bang cha eq ma nyet joq nhang lo das, ngos YHENSAIN taiq goeus.

²³Ngos Babilon lyis gyoplang kuot das, houmha khunghbop nyeis das. Dvnganh yvlyis shenh tyamp dah shenhbons yah Babilon lyis shenh tyamp das, ngos Maukhung Jesphung YHENSAIN taiq goeus.

²⁴Maukhung Jesphung YHENSAIN maukhi lha taiq. Ngos nghamh toeuq zis bweh das. Ngos nghamh thyet zis bweh das.

²⁵Ngos Asiria lyis ngah Israel mau mas mhont las ngah boms mas nang nheh das. Ngos ngah dius jens lyis wuq nhang toh dah tanzoe yahge wons nhang dah yvwons lyis nyamoq kvtoq masyah yoeus khyoq das.

²⁶Heika mungkvn nyhenshang ngos nghamh toeuq cho nghuot, ngah loqyom gas dius nyau jens lyis joeng das xiklyis lvm toh.

²⁷Maukhung Jesphung YHENSAIN haih zis kuot das zis nghamh thyet toh. Joeng das xiklyis nyah loqyom lvm toh. Nyang lyis hank eq ma yoh no nhang.

²⁸Haih zis gas hwankti Ahaz shei zvn lyis kyoh dah loeus nghuot.

²⁹Philisti jens eh, namoq lyis lyuk das gyens loq gyau goeus laus eq namoq gaus chank ma bos. Lhangnyis dvdoeu shei lhyi hauh thoq lyis xungh dah vdoeu thuq los. Nyis uq gas dang dah mvnjung muk los.

³⁰YHENSAIN ka nyah dius jens mas shohjyen bang dah yvng yoeuh soeu duot das las nyamoq lyis jesluiq shohluiq nyeis nhang das. Nghuot laus eq nyang namoq Philisti jens thoq mas gyukphoh phanghkhauq khyoq das. Hauh zis yah namoq hank eq ma doeng lo das.

³¹Philisti wus jens eh, pangh das xiklyis kaiq ngaus geh! Dvnganhmoq gyuk dvn geh, Phvlhau bungh gas mautsung pheh yah los. Houka nyah vkeq nyang ma gyuk ma yet dah jesphung nghuot.

³²Yang Philisti masyah los dah loeuswons bang lyis khasoeh phuk taiq das lah? YHENSAIN ka Zion lhyi kuot toh las nyah dah shanghsenh dius jens lyis houmha jesluiq joqyos xo nyvng das, oen taiq das.