Read Achang ESAIA 16 Bible Online

ESAIA 16 - Achang bible

ESAIA 16

¹Moab dius jens gas mhanhdyvp wus Sela masyah Yerusalem lyis guon soeu jyank mas yvnglo dvdoeu jyungshuk huon kat.

²Vmesbih jens gas, Arnon lvng nyeismhung mha sot masyah khat tyamp dah nghoq jens teh, lvlaihsoe e los langh nyeis.

³Nyamoq Yuda dius jens lyis taiq. Ngamoq khasoeh kuot das zis taiq geh. Nyeih gungs ngeh yvlyis jyamh nhang das buisshen dyei teh ngamoq lyis gos dyei geh. Ngamoq lyis nah buisshen mha no nhang aq. Ngamoq gas jes phang bang nghuot. Hank ma yoh nyvng yvmas jenh shung dyei geh.

⁴Ngamoq lyis nah mau mas khau nhang aq. Ngamoq lyis mhont tyamp mes bang masyah gos kat aq. Zaiq cho yahge mhont cho thank loh das. Hauh mau lyis thyoq tyamp mes bang jom tyamp das.

⁵Hauh thang lhyi Dawi dah dius jangh caiq mas dvyuk hwankti bweh das. Hauh soeu ka dius jens lyis jyet zis yah lomluk luk guon das. Nyang gas jus yvlyis kuot das las lyi jus cho lhyi nyvng das.

⁶Yuda dius jens taiq zis gas, Moab jens kha iq khwank zis ngamoq xauhgyo. Nyamoq lhoq lhoq teh nghamh Kuh, nghuot laus eq nyamoq khwank zis gas vkom dvnghuot.

⁷Moab mau bang gas nyamoq xauh kham dah yau cho gvng mas ngaus das. Nyamoq dvnganhmoq Kir Hareset wus mas gyangh zo, nghamh dah zonoms lyis soh las ngaus das, nyamoq yom gyau das.

⁸Heshbon nvm mas dah khyam jens yahge Sibma zvbiq khyam jens monh loh. Hauh zvbiq khyam jens mas dah zvbiq gas dius nyau jens dah guon bang shuk yet zis nghuot. Gohnhamp hauh zvbiq nwis gas Yazer wus jweh shoq nwis loh las buisthuq pheh mhanhdyvp jweh shoq, buiswvng pheh Thomh Shei jweh shoq nwis loh.

⁹Ngos Yazer gvng mas ngaus teh gvshih Sibma zvbiq khyam nyhenshang ngaus. Ngah nyoqdyeis gyoh zis gas Heshbon yahge Eleale dah xiklyis nghuot. Khasoeh ge lyis houmha jyo yhomh cho ma bos.

¹⁰Gvshih jenh bos dah yos jens mas hank ma pyo. Zvbiq khyam mha chunghthwe hank ma kat, hank ma kaiq. Zvbiq kuot das zis zvbiq shih hank ma nang; gaus dah thwe ma bos lo.[5]

¹¹Ngos Moab yahge Kir Here xiklyis kuk zis yah noskyingh nyeis.

¹²Moab dius jens gas boms mas nyamoq dah phvra yhen pheh, yhenmuh pheh vkyuh dung loh das zis tsain lhoq nyung zo. Nghuot laus eq hauh zis nyamoq lyis vkyuh ma dyei.

¹³Haih loeus gas Moab yah sen lha YHENSAIN noq yah dyei toh zis nghuot.

¹⁴Gvshih YHENSAIN taiq zis gas, somh zvn top gyo lyis Moab dah dis cho dyuk loh das. Nyah dius jens eq nainlo dvdoeng lo das las nyamoq yomnhuk das.