Read Achang ESAIA 19 Bible Online

ESAIA 19 - Achang bible

ESAIA 19

¹Heika Egutu dah loeus cho nghuot. YHENSAIN ka jyommauh ji las Egutu mas lvnyap jweh los. Egutu mau mas dah phvra jens gas nyah xikkhonh mas nvn las, Egutu bang womh cho ma bos lo.

²Ngos gas Egutu mau bang nyang changh lyis zan goh nhang lha, yuk khanghmuh nyah vmang vnoeuh yah yhenkyoh nyang changh, wus nyang changh, munghdan hwankti nyang changh yomsoq lhuot goh das.

³Ngos Egutu bang dah nghamh toeuq cho yahge nyamoq dah womh ehnyet lyis lhoeu thyoq das. Nyamoq gas phvra lyis pangh aq ge sang. Gyuiswvng bang lyis, shei bang dah sidyos lyis joeui tsain nyei das.

⁴Ngos Egutu bang lyis lhoeng soeu, nyamoq lyis guon das gyukphoh hwankti loq mas kyauh das. Ngos Maukhung Jesphung YHENSAIN taiq goeus.

⁵Nile lvng mas jeis gyoh las zoh zoh yah kyuk loh das.

⁶Jeislvng dah tvp jens gas zoh yah kyuk loh lyis tsain bop das. Jvmbu yahge mhanhlo zains tsain nyhauh loh das.

⁷Nile lvng yvm chank yah xoh toh dah jyo zains dvnganh kyuk las muot tangh tyamp das.

⁸Nile lvng mas oeng nhoh zis yah kang khoeu bang yuk khanghmuh gas noskyingh ngaus das; nyamoq dah oeng nghweh yahge nyho ka yhung pvjus lo.

⁹Jeimuh misseh kuot bang yomgyau das.

¹⁰Yoqgan yoq bang yahge lyes dah muh zwi bang gas dyoqbis tyamp das las yomgyau das.

¹¹Zoan wus mas dah uhshe bang gas koh. Egutu mas dah joeui bos thank bang vkoh vbang joeui dyei! Nyamoq gas gohnhamp xuq cho nyhang bang dah lo jens, hwankti jens dah lo jens nghuot ge hwankti lhyi khasoeh womh taiq das lah?

¹²Egutu hwankti eh, nah dah yik joeui dyei bang khalhye gah? Maukhung Jesphung Yhensain ka Egutu nyhenshang nghamh toeuq zis cha bos yvlyis nyamoq yoh taiq mvbeh.

¹³Zoan yahge Memphi wus mas dah uhshe bang gas koh. Nyamoq dius nyau lyis uhshe chah laus eq chowhang shwih whang loh.

¹⁴YHENSAIN ka nyamoq lyis nhunk dah joeui dyei nhang. Egutu mau gas ja khanghmuh kuot shuot las yhei yet soeu nyang duk toh yvmas jyuot loh teh vtyi vkamh mus nyeis.

¹⁵Egutu mas dis soeu, nyungs soeu, yhaugyen soeu, hank ma seq soeu, hank eq ma yoh pangh.

¹⁶Egutu bang gas vmesbih jens gyuk nvn teh bweh das buisnyeis jweh los das. Maukhung Jesphung YHENSAIN ka nyamoq lyis joeng das xiklyis nyah loq yings toh zis nyvng las gyuk zis yah nvn nyeis.

¹⁷Maukhung Jesphung YHENSAIN ka Egutu mau xiklyis sont toh cho taiq kyingh khanghmuh Egutu dius jens gas Yuda jens lyis gyuk nyeis.

¹⁸Hauh buisnyeis jweh los lyis Egutu mau mas dah wus oeng koeuq mas Hebre nyingh kat das. Houmha dah dius jens gas Maukhung Jesphung YHENSAIN dah nyings mas maukhi das. Houmha dvwus lyis, Buis dah wus, ge lui das.

¹⁹Hauh shishenh jweh los lyis Egutu mau mas YHENSAIN xiklyis phon dvkoeuq joq das. Maukyo mha eq nyah xiklyis luk dvlom cuk toh das.

²⁰Hauh zis gas Egutu mau mas Maukhung Jesphung YHENSAIN nyeis dah vlho nghuot. Houmha dah dius jens zaiq zis xauh lyis YHENSAIN pangh das xiklyis lui las nyamoq lyis khyuot das nyhenshang dvyuk yuk nhang kat das.

²¹YHENSAIN nyang Egutu dius jens lyis thuq xoeuq das las nyamoq seq los zis yah nyang lyis paiq das; lomhxangh yahge jyungshuk eq chi los das. Nyamoq YHENSAIN lhyi nyhen toh das; housoeh nyhen toh zis yah dvyhangteh kuot dyei das.

²²YHENSAIN ka Egutu bang lyis joeng das laus eq doms gis los nhang das. Nyamoq gas YHENSAIN jyank tauh los las nyang gas nyamoq dung dang lyis gyo dyei las gis los nhang das.

²³Hauh buisnyeis jweh los lyis Egutu yahge Asiria mau jo mas talhoeu joq das. Hai aiq mau gas nyamoq jo mas e los suh las hau aiq nyau dvgeh paiq das.

²⁴Hauh buisnyeis jweh lyis Israel gas Egutu yahge Asiria yah dvyih nghuot das. Hai somh nyau gvng mas mungkvn gas shvmanh jyehjuh yoh das.

²⁵Maukhung Jesphung YHENSAIN nyamoq lyis shvmanh zis gas, Ngah Egutu dius jens, ngos gvnkhanh toh dah Asiria, ngos khyen yoeus dah Israel dius jens eh, ngos namoq lyis shvmanh dyei das, ge.