Read Achang ESAIA 21 Bible Online

ESAIA 21 - Achang bible

ESAIA 21

¹Heika Babilon cho dah loeus nghuot. Gyukphoh mau masyah, lyeis lhain teh shenh los dah dyoqbis cho ka sihmuis pa lhyi thyet las jweh los das.

²Ngos lhoeng cho nyoqnyvng nyvng; phanhlyen cho yahge thyoqpi cho nghuot. Elam jesphung eh zan aq, Media eh wus jens lyis lhaink toh aq. Mangso ka Babilon gvng mas xauh kham zo cho lhyi thank loh nhang das.

³Nyoqnyvng mas ngos nyvng zis yahge xauhgyo zis gas ngos lyis gyuk cho yah dyingh nhang, vmesbih lokhoeu nos nos teh nos nhang.

⁴Ngah uhloms lhain nyeis, ngos gas gyuk zis yah nvn nyeis. Ngos gas nyenhthang jweh los nhang mes nyeis laus eq gyuk cho kyingh dvjweh los.

⁵Nyoqnyvng mas pwe cicont nghuot goeus; boenghwus tsung das xiklyis misseh nyhoeuh goeus. Nyamoq zo shuk nyeis. Vmingh dvkoeuq nyetlos nyettant thuq los zis gas, Zau jens eh, namoq dah gos tsain sont geh, ge.

⁶Hauh thang lhyi YHENSAIN ngos lyis taiq. Loh aq, zungh soeu toh las, nyang nyvng zis taiq nhang aq.

⁷Nyang gas, dius jens dvzomh dvzomh nyang ji los zis nyvng, mauhlyihzoe ji los, gola-u ji los zis nyvng lyis vlhomuh yoeuh chah.

⁸Zungh soeu taiq, Svra eh, ngos ngah joqyos mas nyeih nyenh yap las zungh nyeis.

⁹Nyetlos nyettant! Nyang ji bang vzomh zomh los nyeis, ge zungh soeu loeus dyei los. Babilon gyoh goeus! Nyamoq paiq nyeis dah phvra dvnganh gas nyeisjvng mas gyoh sanh joq.

¹⁰Guk soeh nang zis xauh goeus dah ngah dius Israel jens eh, Ngos Israel Mangso, Maukhung Jesphung YHENSAIN jyank masyah xauhgyo dah loeus gis nvng lyis taiq kyoh bah.

¹¹Heika Edom cho dah loeus nghuot. Dius dvyuk ngos lyis Edom masyah lui nyeis. Zungh soeu eh, nyenh lai das zis vnyangh lo lah? Nyenh khanhamp thank das zis ngos lyis taiq kyoh aq, ge.

¹²Ngos gas, Nvpsangh jweh los nyeis, nghuot laus eq nyenh doms jweh los das. Nvng doms nyei mes lyis tauh los las nyei aq, oen.

¹³Heika Arabia dah cho loeus nghuot. Dedan bang eh, namoq gyung cho thoenggus gas tyeihgesles Arabia mau mas joq.

¹⁴Namoq jyank mas los bang jeisshet lyis jeis dyei geh.Tema mas nyeis bang eh, jesphang phang bang lyis zonoms dyei geh.

¹⁵Nyamoq gas yings toh sham jes, baiq bah ge yings toh lyei, jeszan dah gudwvng cho dvnganh masyah phang luiq los bang nghuot.

¹⁶Hauh thang lhyi YHENSAIN ngos lyis heisoeh ge. Dvzvn top lyis Kedar vkoq dah kuhxing cho ka thank tyamp das.

¹⁷Lyei baiq bang gas Kedar dah womh thank bang nghuot laus eq nainlo dvnyet lo das. Ngos YHENSAIN, Israel Mangso taiq goeus.