Read Achang ESAIA 25 Bible Online

ESAIA 25 - Achang bible

ESAIA 25

¹YHENSAIN eh, nvng gas ngah Mangso nghuot; ngos nvng lyis nyoqnho ngelang dyei las nah nyings lyis chungh das. Nvng gas mauhphoh cho kuot goeus. Gohlhain yah nvng nghamhtoeuq toh cho lhyi wontang kuot thuq kat.

²Wus lyis mhotkhyot boms kuot, nyamoq dah goengtoenk thoenkgus jesdvp lyis mhont tyamp, ngamoq dah jeswus kuot toh dah hwankti yhen jens lyis vcaiq vto dyuk loh nhang goeus.

³Yomsoq bos dah dius nyau jens gas nvng lyis chungh das. Lhoeng dah dius nyau jens dah wus jens mas bang gas nvng lyis gyukwoms das.

⁴Vshoh vjyen nyungs bang gas nah jyank mas phang los las yaukyenh shishenh lyis nyamoq jesluiq. Nvng nyamoq lyis lyeisjyang mhayah khaugus, buis gywes mas buisshen dyei. Lhoeng bang gas lyeis jyang teh zan los.

⁵Kyuk joqyos mas jeis ma joq teh nghuot. Nghuot laus eq nvng YHENSAIN ka ngamoq dah jeswus lyis sam nhang. Buis gywes nyeih lyis jyommauh gos teh lhoeng bang dah kaiq thwe lhyi sam nhang.

⁶Maukhung Jesphung YHENSAIN ka haih Zion boms thoq mas mungkvn mas dius nyau jens dvnganh xiklyis pwe sont das. Gis thank zonoms yahge gis thank zvbiq yah sont das.

⁷Nyang gas heimha dius nyau jens dvnganh thoq mas jyommauh soeh nghop toh dah kuk cho lhyi nyetlos nyettant yoeus tyamp dyei das.

⁸YHENSAIN Mangso ka shei cho lhyi vcaiq vto yoeus tyamp das! Nyang gas yuk khanghmuh dah nyoqjeih mas dah nyoqdyeis buot tyamp dyei das. Mungkvn gonh mas nyah dius jens xauh kham dah xoqphuh cho lhyi eq, yoeus tyamp dyei das ge YHENSAIN nyang taiq goeus.

⁹Hauh zis bweh los lyis yuk khanghmuh taiq los das zis gas, Nyang gas yah Mangso nghuot. Yang nyang lyis loms las nyang yang lyis khyuot yoeus goeus. Nyang gas YHENSAIN nghuot. Yang nyang lyis loms las yang lyis khyuot yoeus goeus yvmvyah gvshih yang pyo zis yah gausyis nyeis.

¹⁰YHENSAIN ka Zion boms lyis gos dyei das, nghuot laus eq Moab dius jens lyis gas huhyau jenh nang teh nang nheh tyamp das.

¹¹Jeisbat bat das teh loq lvm las jweh laus eq Mangso ka nyamoq lyis khyoq las nyamoq ma yoh toeu lo nyop loh das.

¹²Moab dah thoenkgus jesdvp jens lyis ciank nyhang jens yah dvgeh nyeisjvng mas khyoq khyop mhont tyamp das.