Read Achang ESAIA 27 Bible Online

ESAIA 27 - Achang bible

ESAIA 27

¹Hauh nyeih lyis YHENSAIN ka nyah dah yomsoq bos las mvnbos moengsa yhung lha vguih vkoeu, vnghwi vlhyent mvnjung Lewiathan lhyi joeng das zis yahge thomh mas dah dam lyis sat das.

²Hauh nyeih lyis YHENSAIN ka zvbiq khyam mha zvbiq shih nyoshoq thuq los cho lvkhyank kat das.

³Ngos hauh khyam lhyi zungh las jeis malyen lo tsoq sanh. Ngos nyeih nyenh zungh nyeis las hank ma los yoh nos nhang das.

⁴Ngos zvbiq khyam lhyi nhaiq ma yo lo. Houmha nyoq jens yahge zoeu jens zan goh lyis gas ngos hauh yvlyis dvnganh ngheq tyamp das.

⁵Nghuot laus eq ngah dius jens dah jeswus jens ngos gos dyei das zis o lhyi ka nyamoq ngos yah nyenstap goh cho kuot bas jungh. Nghuot goeus nyamoq ngos yah nyenstap goh cho kuot bas jungh.

⁶Thang pheh Yakop dah dius jangh caiq Israel dius jens gas saiqzains teh vnyet chent las vbuh buh vchvp chvp los das. Mungkvn gas houmha thuq los dah vshih yah dyingh joq das.

⁷Israel lyis YHENSAIN nyah jeswus lyis joeng teh pop pop ma joeng, dius jens eq ma monh loh.

⁸YHENSAIN ka nyah dius jens lyis jonsdoeus loh nhang yvpheh yah joeng. Nyang nyamoq lyis buisthuq pheh yah los dah lyeis muh jyang yah shenh loh nhang.

⁹Nghuot laus eq Israel jens gas phvra paiq bang dah phon luk lyis shvhwih teh thungh thyi lha Asher gywes nyhiq dah vlho ma joq lo, nghuot ya, xangh phon ma joq lo lyis kyingh nyamoq dah yaunos lyis khyuot dyei das.

¹⁰Goeng toenk wus gas dyoq gyoh joq. Houka cha ma joq dah mhanhdyvp teh jyamhjyuklhyuk nghuot goeus. Houka noeu jens mhanh zo las whop joq dah katjang bweh goeus.

¹¹Hau saiqzains jens mas dah saiqko tsain kyuk zis yah gyau tyamp las vmesbih jens thangh kui. Dius jens cha ma seqgyo yvmvyah nyamoq lyis gvnkhanh soeu ka nyamoq lyis nhaiq ma nyen das, nyamoq lyis nhaiqnyen cho ma chixoeuq das.

¹²Hauh nyeih ka Uphrat lvng masyah Egutu maukyo jweh shoq lyis YHENSAIN nyah dius jens lyis thanjang mas sunghso yah phihsan lhyi kangh teh dvyuk dvyuk tsainh yoeus das.

¹³Hauh buisnyeis jweh lyis lvbuh muot kat das las, Asiria mau yahge Egutu pheh jonsdoeus loh dah Israel jens lyis doms lui das. Nyamoq gas gyingshang jing, Yerusalem mas YHENSAIN lhyi los tsain paiq das.