Read Achang ESAIA 29 Bible Online

ESAIA 29 - Achang bible

ESAIA 29

¹Mangso dah phon Yerusalem gas dyoqbis goeus. Dawi thoeng dah wus dyoqbis goeus. Dvzvn aiq zvn nyah pwe mha e los suh shih bas jungh.

²Hauh thang lhyi Mangso ka, Mangso Phon ge dah wus thoq mas dyoqbis zainsmuh she los das. Houmha ngaus cho, kuk cho bos das. Wus gonh gas suih yah dyingh dah phon teh nghuot das.

³Mangso hauh wus lyis thyoq das, yvmlhaink thoenkgus jesdvp yah lhaink toh das.

⁴Yerusalem gas nyeis khau mhayah dang taiq das ge loeu tyonh dah sidyos teh nghuot. Nyang gas tsohmop masyah ma dyeh dah thwe thuq los das.

⁵Yerusalem eh, nvng lyis thyoq los dah gohnyau bang gas tsohmop teh muot tangh loh das. Nyamoq dah gyukphoh jes jens gas huhyau teh dang loh das. Cha yos ma soh lyis nyetlos nyettant,

⁶Maukhung Jesphung YHENSAIN ka nvng lyis than dah maujau yahge maunyeis dwis zis yah khyuot yoeus das. Nyang gas lyeismuh jyang yahge lhyoq tyamp dah nyilhyam nhang kat das.

⁷Hauh thang lhyi gohnyau bang dah jes jens gas Mangso dah wus lyis thyoq las nyamoq dah kyonhkhyi dvnganh, jeszis, vyhang dvnganh nyenh lyis dah yhetmoq teh dyuk loh das.

⁸Yerusalem lyis thyoq das ge huom dah dius nyau jens dvnganh gas, yuot soeu ka yhetmoq mas xauh zo laus eq, soh los lyis yuot nyeis teh, shet soeu ka yhetmoq mas xauh shuk laus eq soh los lyis khyung kyuk teh nghuot das.

⁹Tsoq las koh geh! Nyoq tsoq las jet geh! Zvbiq ma bos bos yet geh! Zvbiq dvzoq eq ma bos bos vtyi vkamh mus geh!

¹⁰YHENSAIN ka namoq lyis yhet nguis las yhet muh muih nhang. Lvpe jens gas dius jens dah nyoqjeih duot chah laus eq Mangso ka nyamoq nyoq lyis jet nhang.

¹¹Nyoqnyvng dvnganh dah vjyuk gas namoq masyah gos tyamp goeus. Houka kyihau tap toh dah sauhdain teh nghuot. Hauh zis maussauh seq nghap soeu jyank mas chi loh nghap nhang lhyi, hauh soeu ka, Haih zis kyihau tap toh las ngos ma yoh nghap, ge.

¹²Maussauh ma yoh nghap soeu lhyi dyei las, Haih zis nghap kyoh aq ge lyis, nyang gas, Ngos khasoeh nghap das zis ma seq, ge das.

¹³YHENSAIN taiq zis gas, Haih dius jens ngos lyis paiq dung laus eq nyamoq dang gas vjyuk ma bos, nyamoq ehnyet gohyos dvnghuot. Nyamoq dah paiq cho ka nyamoq comh toh, dius dah lyi yahge lyi thungh dvtsain nghuot.

¹⁴Housoeh las ngos nyamoq ma nghamh dah bat cho dvkoeuq thang lhyi dvkoeuq thuq los nhang das. Joeui bos bang lyis koh yvpheh lhaiq kat das las nyamoq dah yik cho ka cha yhung pvjus mus das, ge.

¹⁵YHENSAIN ma seq shoq gauh nghamh toeuq bang gas dyoqbis das! Nyamoq gauh nghamh toeuq cho lhyi kuot thuq kat las nyamoq lyis hank ma nyvng das, nyamoq cha kuot zis hank ma seq das ge nghamh.

¹⁶Nyamoq gas dvnganh yvlyis vtauh pheh kuot tyamp goeus. Auh shonh soeu yahge tsoh gas khah zis zes yhaugyen lah? dius yah kuot toh vyhang dvkoeuq koeuq gas kuot toh soeu lhyi, Nvng ngos lyis ma kuot, nghuot ya Nvng cha kuot nyeis zis nvng ma seq, ge yoh sang lhyeh?

¹⁷Sangkhyangh dvkoeuq taiq zis gas, Ma nyangh lyis Lebanon saiq khyam ka xoh zo yos duot las xoh zo nyeis yos gas saiqkhyam doms duot das, ge.

¹⁸Hauh buisnyeis jweh lyis nojet bang gas sauhbuk khyangh khyangh nghap zis xauhgyo das. Nyoqjet las soeng soeng noq yvmas nyeis bang gas nyamoq nyoq bangh los las nyvng das.

¹⁹Shohjyen lha ehnyet nyhen mha gyoh bang gas YHENSAIN Israel dah Gyingshang Mangso dyei dah pyo cho lhyi dvlhain doms xo nyvng das.

²⁰Gohyuk lyis nhiq zaiq bang yahge Mangso lhyi ma phauh ma danh cho chixoeuq bang cho thang thank nghuot lo das. Yaunos bos bang yuk khanghmuh gas dyoqbis das.

²¹Gohyuk lyis ma gis cho taiq hoeuh bang, dius sat bang lyis joeng das cho lhyi khomp khyoq bang, dius gis lyis lyi jus ma yoh nhang hwah bang gas Mangso yah thyuk zis xauh das.

²²Housoeh las gvshih Abraham lyis yau cho mhayah khyuot kat dah YHENSAIN, Israel Mangso taiq zis gas, Ngah dius jens eh, namoq xoq ma phuh lo das, nyoqnho dyoq cho ma bos lo das.

²³Namoq lyis ngos dyei das dah loshang jens lyis nyvng lyis ngos gas Israel dah gyingshang Mangso nghuot yvlyis yoh seq das.

²⁴Koh bang seqgyo shoq xuq das, vjangh yah hoeu yenh bang gaus gaus yis yis xuq mes das.