Read Achang ESAIA 3 Bible Online

ESAIA 3 - Achang bible

ESAIA 3

¹Gvshih YHENSAIN, Maukhung Jesphung YHENSAIN ka Yuda mau yahge Yerusalem mas dius jens nges toh vyhang yahge dius dvnganh yoeus tyamp dyei bah ge. Nyamoq dah zonoms yahge jeis lyis yoeus tyamp dyei bah ge.

²Nyamoq dah thoeuqzoe jens, jeslo jens, soetuon bang, lvpe jens, botthyet bang yahge logis jens,

³nyamoq dah thoenkgus jesdvp mas bang, dius jens dah uhshe bang, mau guon muh zwi bang, lyes dah loqmuh dap bang,

⁴YHENSAIN ka ung ma gying shih dah yukgis lo jens lyis yah dius jens lyis guon nhang das.

⁵Dius jens dvyuk yah dvyuk zaiq goh das. Wotyamh jens gas nyamoq dah logis jens lyis ma phauh kuot das, cha ma nghuot bang gas nyamoq dah joeuzoe jens lyis ma phauh gis kuot das.

⁶Dvhuh bang gas dius dvyuk lyis khyen lha, Nvng dyimis yoh, hai yaukyenh gyo lyis ngamoq dah uhshe soeu los kuot aq, ge shishenh jweh los das.

⁷Nghuot laus eq nyang gas, Ngos zonoms eq, dyimis eq ma yoh las ngos namoq lyis ma yoh pangh. Ngos lyis namoq dah uhshe soeu vkuot nhang, ge toeuh das.

⁸Nghuot goeus, Yerusalem gas dyoqbis goeus, Yuda mau eq loeu-phanh nyeis goeus. Nyamoq taiq dang yahge kuot cho ka YHENSAIN lhyi tyixo lha, Mangso lhyi ma phauh gis bvng bvng kuot.

⁹Namoq nghamh twih toh cho ka namoq lyis yaudyei los das. Nyamoq gas Sodom bang yaunos kuot teh dede kuot goeus. Nyamoq dyoqbis goeus; hauh zis nyamoq thoq mas nyamoq nyang she los.

¹⁰Dan bang gas nyamoq nyang gis zis kuot thuq las gis xauh das yvmvyah nyamoq xiklyis gis joq las nyamoq pyo das.

¹¹Nghuot laus eq lhung bang gas mvtanhzoe nghuot; gohyuk lyis kuot khoq zis gvshih nyamoq jyank mas jweh los das.

¹²Ngah dius jens lyis wotyamh jens yah zaiq, nyamoq lyis vmesbih jens yah guon zis yah mhuih jyomh. Ngah dius jens eh, namoq lyis choshe bang namoq lyis cho shuot nhang lha namoq khapheh xoeu das zis ma seq mus.

¹³YHENSAIN ka dius jens lyis soetuon das zis nyah soetuon gus mas toq yap.

¹⁴YHENSAIN ka nyah dius jens dah logis jens yahge choshe bang lyis soetuon das xiklyis shwih los las kauq zis gas, Namoq ngah zvbiq khyam lhyi thyoqzo. Nyungs bang dah zisyos lhuot yoeus zis namoq yhen mha dyingh joq.

¹⁵Namoq ngah dius jens lyis thungh thyi das zis yahge nyungs bang lyis toeuh yoeus das toeuh ma bos, ge Maukhung Jesphung YHENSAIN taiq goeus.

¹⁶YHENSAIN taiq zis gas, Zion lonyi jens kha iq khwank! Nyamoq lainzain xing xing suh loh. Nyoq nyik, khyeithoengh shingh shingh nyings shoq khyeisot sot loh.

¹⁷Nghuot laus eq ngos nyamoq lyis joeng das. Ngos nyamoq uhloms yuk dyei las uhtyauh toh das.

¹⁸YHENSAIN ka Zion lonyi jens khwank nyeis dah vyhang dvnganh: khyei mha kat dah khyeithoengh, uhloms mas shauq zis, lainzain mas ywi yoeus tyamp dyei buisnyeis jweh los das.

¹⁹Loq mas thoengh, nyoq nghop,

²⁰uhkyop, nyamoq loqyom mas mandan muot dyei twih, loq mas khamhphaq kat toh zis, xangh coeu thuk yoeus tyamp dyei das.

²¹Loqkyop, nhodangh,

²²lungphauq, dyixing, shanhzoe, ngwis thung,

²³loq mas chi dah misseh yhwiq, lainlyet, uhthop yahge bvngtoenk tsain yoeus tyamp das.

²⁴Xangh shom ka bop shom, dyichih gas twih, cam zaiq gungsthaiq uhyuk zis, dyiyhwiq ka dyityang, yungh zis gas xoqphuh cho thaiq loh das.

²⁵Wus mas bang, yombos thank bang yangh jes mas gyoh das.

²⁶Wus eq wus khomh eq kukxi das, ngaus das. Wus eq nyeisjvng mas shohchen tsung toh dah vmesbih teh nghuot das.