Read Achang ESAIA 30 Bible Online

ESAIA 30 - Achang bible

ESAIA 30

¹YHENSAIN taiq: Yuda lyis guon bang gas dyoqbis goeus. khasoeh ge lyis nyamoq gas ngos lyis gomloeus toq. Ngos ma kuot dah nghamh toeuq cho mha tsain chank loh. Ngah ehnyet yah tyi goh dah buisnoms xamxonh cho loqyos tsain duon las yaunos dvkoeuq thoq lyis dvkoeuq kih boms joq.

²Joeui dyei das cho ngos lyis ma nyei nyei Egutu lyis pangh das cho e sang. Nyamoq gas Egutu jens nyamoq lyis gos dyei das zis o lha Egutu hwankti lhyi loms toh.

³Nghuot laus eq hwankti ka nyamoq lyis pangh das xiklyis yomsoq ma bos las nyamoq dah gos dyei cho ka dyoqbis zainsmuh yah vthang sau das.

⁴Nyamoq dah lvgyo jens Egutu bang dah wus jens Zoan yahge Hane mas jweh nyeis goeus laus eq,

⁵Yuda dius jens nghamhloms toh yvlyis ma yoh pangh, ma yoh loms dah dius nyau lyis loms yvmvyah nyamoq auhuiq das.

⁶Heika mautyi mhanhdyvp mas nyeis dah yewus dah cho Mangso dah loeus nghuot. Hau lvgyo jens gas khangkhyi jens nyeis, duk bos lhangnyis nyeis, dang dah mvnjung nyeis las jes bos dah mau cho suh lai loh. Nyamoq gas mauhlyihzoe yahge gola-u tu jens mas pangh cho cha ma xauh dyei dah vnyau xiklyis phauhdap zisyos jyungshuk tsain thuq.

⁷Egutu bang dyei dah pangh cho ka yhung pvjus lo. Housoeh las ngos Egutu lyis, Duk ma bos Mvnjung oen lui.

⁸Mangso ngos lyis taiq: Dius jens cha yah doeusgoh cho lhyi sauhbuk mas lhaih toh aq, housoeh nyamoq kha iq ma gis cho houmha vjangh comh toh das.

⁹Nyamoq gas vjangh yah Mangso lhyi gomloeus toq, vjangh hwah, vjangh yah YHENSAIN dah jyauh cho lhyi gyo das zis ngoek.

¹⁰Nyamoq gas lvpe jens lyis samlo nyeis aq, ge sang. Nyamoq gas, Ngamoq lyis jus zis vtaiq goh ngamoq gyo mes zis dvtaiq geh. Ngamoq nyang nghamh shuot zis joq goeus jungh.

¹¹Cho xwiq geh, ngamoq dah cho lhyi vcauq toh goh. Ngamoq Israel gyingshang Mangso cho ma mes gyo, ge.

¹²Nghuot laus eq haih zis Israel dah gyingshang Mangso taiq: Ngos namoq lyis cha taiq yvlyis chaxwe ma nhang lha, mhuih cho yahge thyoq zo cho lhyi tsain nges toh.

¹³Namoq yobos bos, namoq gas ciank nyhang gwi gyoh teh nghuot, namoq nyetlos nyettant phanh nyeis das.

¹⁴Tsoh auh lyis vjvp kui lha jeis bung mas taiq das iq ma bos lo shoq thungh thyi teh nvng eq vdyis vmons mus tyamp das.

¹⁵Israel dah Gyingshang Soeu Yomzains YHENSAIN Mangso dius jens lyis taiq, Tauh los las ngos lyis samlo loms toh geh. Housoeh lyis namoq yombos las gau joq das. Nghuot laus eq namoq housoeh kuot das zis tsain ngoek.

¹⁶Hauh gungsthaiq namoq gas, yvng dah nyang jens ji las namoq jeswus jens masyah phang luiq loh das ge nghamh toeuq. Nghuot goeus, namoq phang luiq shoq kuot chah! Namoq dah nyang jens gas yvng goeus ge nghamh, nghuot laus eq namoq lyis chank khat bang dah nyang jens zes yvng.

¹⁷Namoq jeswus jeslo dvyuk lyis nyvng lyis dvkhyoengh phang loh das. Jeswus jeslo oeng yuk gas namoq dvnganh lyis yoh phang loh nhang. Namoq gas jing thyoh mas khyiq zains dvkoeuq mas lai las hank ma nyet lo shoq phang loh das.

¹⁸Nghuot laus eq YHENSAIN ka namoq lyis nhaiqnyen shih das ge langh nyeis. Nyang gas vjangh yah jus zis kuot yvmvyah nvng lyis nhaiqnyen das zis gas cicont nghuot. YHENSAIN lhyi loms bang gas ngelhoq.

¹⁹Yerusalem mas nyeis bang eh, namoq ma ngaus lo noh. YHENSAIN ka nhaiqnyen shohgyo soeu nghuot las namoq pangh cho dung lyis toeuh das.

²⁰YHENSAIN ka nvng yau shishenh lyis yoh lai nhang laus eq, nvng lyis jyauh das nyhenshang nyang houmha nghuot das las nvng nyang lyis ma xo lo noh das.

²¹Namoq loqwi loqyos whang loh lyis, haih zis cho nghuot, heicho loh aq, ge nah nungsthank masyah taiq dah nyah thwe xauhgyo das.

²²Namoq gas ngwis phvra, xing shauq dah phvra lyis vchoqh vlhauq vyhang teh yoeus doeuh tyamp las, Ma mes yoeuh, ge kaiq das.

²³Nvng jyo khyoq uhlyis YHENSAIN ka mau wus nhang zis yah jyo yuk los nhang lha jyo gis gis xauh yhomh das; nah gaunyhauq jens eq katjang lvm lvm yoh das.

²⁴Nah yos zwi dah noeu yahge mauhlyihzoe jens gas gis thank mhanh, gis thank wom xauh zo das.

²⁵Nah jeswus thoenkgus jesdvp lyis xauh nyhik las nyamoq dah dius sat xauh uhlyis, boms khanghmuh jing khanghmuh masyah jeislo lvng tsain yaus das.

²⁶Lhamhmuh gas buis soeh tso das, buis eq vgus thoq lyis nyhet huon zes bvng das. Hai dvnganh gas YHENSAIN ka nyah dius jens lyis dyei dah dvm lyet dyei yhoh dyei uhlyis hai dvnganh bweh los das. Hau dvnyeih tso zis gas nyhet nyeih tso nyhoq bvng.

²⁷YHENSAIN dah yomsoq yahge phunk lyis we masyah nyvng das. Nyi yahge nyikhauh gas nyah nhaiqyo cho lhyi chixoeuq. Nyang taiq dang gas nyi soeh ngeh.

²⁸Nyang gas vyhang dvnganh lyis shenh loh dah jeis nhauq teh nyah xikkhonh mas lyeis lyis nhang kat. Hauh zis gas dius nyau jens lyis dyoqbis yvpheh shenh loh las nyamoq dah ma gis cho nghamh toeuq yvlyis thank loh nhang.

²⁹Nghuot laus eq Mangso dah dius jens namoq gas namoq gyingshang pwe nyenh lyis kuot teh pyo zis yah chunghthwe kat das. Israel jens lyis khomp dyei, YHENSAIN dah yhenmuh pheh doq loh uhlyis toenk khvlhank yah pyo bang teh pyo das.

³⁰YHENSAIN ka yuk khanghmuh lyis phunk bos thwe gyo nhang, nyah nhaiqyo cho lhyi seq nhang. Houmha nyilhyam, jyommauh bungh, gyutomp mau yahge maumuh jyang yah chixoeuq das.

³¹Asiria gas YHENSAIN dah thwe xauhgyo zis yahge nyah dah joeng yomsoq lyis seq lyis nyamoq svsoh gyuk dvn.

³²YHENSAIN ka nyamoq lyis doms lyuk doms lyuk zis yah dvyhangteh, nyah dius jens gas toenk khvlhank, zains thungh, chont toenk bat zis yah pyo nyeis. Asiria jens lyis gas Mangso nyang jeszan das.

³³Gohlhain yah Asiria hwankti lhyi ngheq das zis nyikhyomp zainsmuh joqyos dvkoeuq sont toh. Houka noq las lvm lvm kuot toh. Houmha thangh nyhang nyhang boms toh. Houmha nyi duk loh das nyhenshang YHENSAIN dah soq gas houmha nyi muot kat.