Read Achang ESAIA 32 Bible Online

ESAIA 32 - Achang bible

ESAIA 32

¹Dvnyeih gas dan khyvlyis guon dah hwankti dvyuk thuq los das, lyi jus khyvlyis guon dah dius nyau jens dah uhshe bang thuq los das.

²Nyamoq dvyuk dvyuk gas lyeis los lyis khaugus, lyeis jyang los lyis tamh das joqyos teh tsain nghuot. Nyamoq gas sihmuis yos mas yaus nyeis jeislo lvng teh, nyeis kyuk yos mas lukmuh lom dah buisshen teh nghuot das.

³Nyamoq dah nyoqjeih nokhyvp gas chah nyeis dah dius jens xiklyis phank toh.

⁴Nyamoq ma yoh jhen nyeis lo das, nghuot laus eq nyamoq seqgyo zis yah kuot loh das, hauh vjyuk cha ge zis eq taiq das.

⁵Koh soeu lhyi phauh nyang gis ge hank ma nghamh, dius gang lyis koptoq soeu hank ma ge.

⁶Koh soeu ka vkoh vpaq dang taiq las nyah ehnyet mas ma gis cho kuot das zis nghamh thuq kat. Nyamoq kuot cho yahge taiq dang gas YHENSAIN lhyi ma phauh gis kuot. Nyang gas yuot bang lyis khanhamp eq ma tsoh, shet bang lyis eq ma gvmshuk.

⁷Dius gang gas ma gis zis kuot; nyang gas shohjyen bang lyis khaujeini zis yah hwah las nyamoq dah toeuh dyoq dyuk loh nhang.

⁸Nghuot laus eq phauh nyang gis soeu ka kop toq khyvlyis kuot las nyang jus cho mha goeng goeng yap joq.

⁹Chiq cho ma bos pyo pyo nyeis dah vmesbih jens eh, ngos cha taiq nyeis zis gyo geh.

¹⁰Namoq gvshih nhaiq dainh nyeis mvbeh, nghuot laus eq sangnhaiq zvbiq shih yhomh das zis ma bos yvmvyah namoq yomgyau das.

¹¹Namoq gas chiq cho ma bos pyo pyo nyeis khoq dah vmesbih jens eh, gyuk las nvn geh! Dyimis khyuot tyamp las thyikdom mas yanghthung dyichih chih geh.

¹²Jenh gis dah yos yahge zvbiq khyam dyoqbis goeus yvmvyah kuk zis yah sainhkhonh loq bat geh!

¹³Ngah dius jens dah maunyeis mas zoeu yahge nyoq yuk gyomh joq; dius jens pyo dah yhen jens yahge dius jens dyingh shoq nyeis dah wus jens dvnganh xiklyis ngaus geh.

¹⁴Hwankti yhen yangh tyamp toh zis xauh las wusmuh gas jyamhjyuklhyuk bweh das. Yhen jens yahge zungh nyeis dah thoenkgus jesdvp jens gas vcaiq caiq dyoq gyoh tyamp das. Mauhlyihzoe lamh jens houmha nyeis das. Yvng jens houmha katjang xo nyvng das.

¹⁵Nghuot laus eq Mangso ka yang lyis nyah Dyos dvlhain doms nhang kat dyei las hau hwangh toh dah yos gas nyeis coeu bos los las yos masyah jyo nyau nyoshoq doms xauh yhomh das.

¹⁶Hauh mau mas dvkhauyah dan cho yahge lyi jus cho bweh los das.

¹⁷Yuk khanghmuh dan cho kuot das yvmvyah houmha nyenstap cho, gau cho vcaiq vto joq das.

¹⁸Mangso dah dius jens gas chiq cho ma bos das. Nyamoq dah yhen jens eq nyenstap las gau joq.

¹⁹(Nghuot laus eq yoszanh khyam mha gyutomp mau gyoh das, hauh wus eq thyoq khyoq zis xauh das.)

²⁰Jyo xiklyis dvkhauyah jeis nyoshoq yoh las kha iq pyo! Mauhlyihzoe yahge noeu jens xiklyis dvkhauyah jesluiq dah katjang yoh las kha iq pyo!