Read Achang ESAIA 33 Bible Online

ESAIA 33 - Achang bible

ESAIA 33

¹Ngamoq dah jeswus gas dyoqbis goeus. Nyamoq lyis hank ma thyoq, hank ma phanhlyen laus eq nyamoq thyoq zo, phanhlyen. Nghuot laus eq nyamoq thyoq zo zis yahge phanhlyen shishenh thank loh das las nyamoq gas thyoq zo zis, phanhlyen zis xauh bang bweh los das.

²YHENSAIN eh, ngamoq lyis nhaiqnyen aq: ngamoq nvng lyis nghamhloms nyeis. Dvnyeih dvnyeih ngamoq lyis gos toh dyei aq, ngamoq yaukyenh uhlyis khyuot yoeus aq.

³Nvng ngamoq xiklyis jeszan lyis hauh thwe gvng mas dius nyau jens phang loh das.

⁴Nyamoq yah sen yvlyis dyvm dap nyhik las lvnyhvp lyis teh yoeus loh das.

⁵YHENSAIN ka kha iq kuhxing! Nyang dvnganh yvlyis guon nyeis. Nyang Yerusalem lyis lyi jus cho yahge dan cho yah tyink dyei das.

⁶Dius nyau lyis doengs cho dyei das. Nyang nyah dius jens lyis vjangh yah gos toh dyei, joeui yahge seq cho dyei. Nyamoq dah kuh thank zisyos gas YHENSAIN lhyi phauh nyang cho nghuot.

⁷Nyamoq dah womh bang gas pangh aq, ge kaiq das. Nyenstap cho she los das ge dah lvgyo jens gas svsoh ngaus nyeis.

⁸Talhoeu jens mas svsoh gyukphoh nghuot yvmvyah houcho hank ma suh. Dangthoengh toh goh bang eq dyet loh. Xamxonh goh toh cho eq dyoq dyuk loh. Hank eq ma phauh ma nyang lo.

⁹Nyeisjvng gas cha ma bos jyamhjyuklhyuk joq. Lebanon saiq khyamh eq nyhauh loh, jenh bos dah Sharon langhkhau ka sihmuis yos teh, Bashan yahge Khamel boms mas saiq huq gywis gyoh nyeis.

¹⁰YHENSAIN dius nyau jens lyis taiq zis gas, Gvshih ngos kuot bah. Ngos kha iq yomsoq bos yvlyis chixoeuq bah.

¹¹Nvng vkyuh ma bos nghamhtoeuq cho kuot las nvng kuot zis dvnganh gas yhung pvjus lo. Ngah dyos gas nyi teh nghuot las nvng lyis mhont das.[6]

¹²Nvng gas luk lyis shvhwih phuot teh, zoeu lyis ngheq dah nyiyvp teh dyis das.

¹³Ni mas we mas bang yuk khanghmuh ngos cha kuot cho xauhgyo bas jungh. Ngah yomsoq lyis seq bas jungh.

¹⁴Zion mha dah yaunos dap bang gas gyuk las nvn nyeis. Nyamoq taiq, Mangso dah soetuon cho ka vcaiq vto ngeh nyeis dah nyi yah doeusgoh. Housoeh teh nyi mas yang dvyuk yuk yoh doeng das lah?

¹⁵Jus cho taiq las kuot lyis yoh doeng los. Shohjyen bang lyis nah yomsoq yhung lha vmhuih, khauwhot vzo. Dius sat das nghuot ya gohtoeu ma gis zis kuot das cho nghamh toeuq bang yah vtsoq goh.

¹⁶Housoeh lyis nvng jesluiq das; goeng dah thoenkgus jesdvp mas nyeis lyis sam cho bos teh sam das. Nvng zo das wom yoh das, shuk jeis eq yoh das.

¹⁷Shot khanghmuh lvm loh dah yunghshop cho yah mau lyis guon nyeis dah hwankti lhyi dvlhain doms nyvng das.

¹⁸Nvng gohlhain lvbaus khoengh khywi bang lyis gyuk khoq cho yahge joh yoeuh cho ka soh cho dvnghuot lo.

¹⁹Nvng ma seqgyo dah nyingh kat zis yah lhoq lhoq teh kuot dah lvbaus lyis ma nyvng lo das.

²⁰Ngamoq lomsnoq cho pwe kuot dah Zion wus lyis yoeuh aq. Yerusalem lyis yoeuh aq! Nyeis das zis jesluiq joqyos nghuot! Jywangh khanhamp eq ma nuot, twih ma dyet dah muga zvng teh nghuot.

²¹YHENSAIN ka ngamoq lyis nyah phunk chixoeuq das. Ngamoq gas jeislo lvng jeismuh lvng yvm mas nyeis das. Nghuot laus eq jes sangpho hou cho ma loh.

²²Hauh sangpho jens mas dah misseh ma yoh lhywa lo las hau twih jens gas chah vkyuh ma bos lo. Ngamoq hau jeswus jesphung jens dah dis cho dvnganh nyhik zis yah zisyos sunk nyo las khyei ma gis bang yangh gvmboms yoh. YHENSAIN nyang ngamoq dah hwankti bweh las nyang ngamoq lyis guon zis yah gos toh dyei das.

²⁴Ngamoq mau mas nyeis bang hank khanhamp eq nos ge ma doms lop lo das. Yaunos dvnganh khyuot dyei zis xauh das.