Read Achang ESAIA 35 Bible Online

ESAIA 35 - Achang bible

ESAIA 35

¹Mhanhdyvp gas gausyis das, nyeis gyih yos mas banbuh buh das.

²Jyoengh nyang mhanhdyvp gas gauslaus zis yah chunghthwe kaiq kat das. Hauh zis gas Lebanon boms jens teh yungh las Khamel yahge Sharon pa jens teh nyeis coeu bos das. Yuk khanghmuh YHENSAIN dah yunghshop cho nyvng das, nyah yomsoq yahge kuhxing cho lhyi nyvng das.

³Nyungdaus loq yahge yomnhuk las nvn dah phvlukchvp lyis yom tsain bos nhang geh.

⁴Yomgyau bang yuk khanghmuh lyis, Vgyuk goh, yom huont geh oen taiq kyoh geh. Mangso ka nvng lyis khyuot das zis yahge nah jeswus lyis joeng das nyhenshang los nyeis.

⁵Nyoqjet soeu nyoq nyvng los das, nojet soeu eq xauhgyo das.

⁶Khyei dyoq soeu dyvm las goh das. Nhuotjet bang gaus zis yah kaiq das. Jeislo lvng jens gas mhanhdyvp chank yah yaus loh das.

⁷Hau ngeh dah sihsho ka jeis thomh bweh las kyuk dah maunyeis mas jeisthuq dwang yah dyingh das. Hau ye khuih gyangh nyeis yvmas mhanh noeuh yahge jvmbu yuk das.

⁸Houmha, Gyingshang Talhoeu ge dah chomuh joq das. Hauh talhoeu mha yaunos yoh soeu hank khanhamp eq ma suh das. Hauh cho chank loh dah koh bang cho ma whang das.

⁹Houmha khangkhyi ma tsain nyeis, gyukphoh yewus houcho ma lai. YHENSAIN khyuot yoeus toh bang houchank yah yhen pheh loh das.

¹⁰Nyamoq gas gaus zis yah Yerusalem mas jweh las gausyis zis yah kaiq las chunghthwe kat das. Nyamoq gas vcaiq vto pyo ngon das, kuk cho vcaiq vto ma bos lo.