Read Achang ESAIA 40 Bible Online

ESAIA 40 - Achang bible

ESAIA 40

¹Ngah dius jens lyis nhaiqtaink geh, nyamoq lyis nhaiqtaink geh! ge yah Mangso taiq.

²Yerusalem mas bang lyis yomdyei geh. Nyamoq xauh kham zis nyangh goeus las gvshih nyamoq dah yaunos khyuot dyei goeus. Nyamoq dah yaunos dvnganh gvng mas ngos nyamoq lyis dyingh shoq joeng las thank goeus, ge.

³Kaiq thwe dvkoeuq thuq los, Mhanhdyvp mas YHENSAIN dah cho lhyi sont toh geh! Yah Mangso xiklyis Sihyos pa mha talhoeu soq geh.

⁴Langhkhau khanghmuh yoh tyink das. Boms khanghmuh, jing khanghmuh lyis chink khyoq das. Cho yauhyot lyis yoh xiq das.

⁵Hauh thang lhyi YHENSAIN dah phunk thuq xoeuq das las, suihshoh bos bang dvnganh nyvng das. YHENSAIN nyah nhuot yah taiq goeus.

⁶Kaiq thwe thuq los zis gas, Loeus taiq hoeuh aq, ge lyis ngos gas, Ngos chah loeus taiq hoeuh das, oen. Suihshoh bos bang dvnganh gas mhanh teh nghuot; Nyamoq gas mhanh buh thoq lyis ma nyangh.

⁷YHENSAIN lyeis muot los nhang lha mhanh gas kyuk las ban eq nyhauh loh. Dius jens eq mhanh thoq lyis ma zes yoh kham.

⁸Mhanh kyuk las ban nyhauh laus eq yah Mangso dang gas vcaiq vto goeng joq, ge.

⁹Yerusalem eh, boms nyhang thoq mas doq las loeus gis taiq hoeuh aq. Zion eh, thwe than yah kaiq aq, loeus gis taiq tyo aq! Vgyuk, taiq thuq aq, nyamoq dah Mangso jweh los nyeis oen Yuda wus jens mas taiq aq.

¹⁰Yomzains YHENSAIN ka yomsoq yah guon das zis nyang khyuot yoeus toh goeus bang lyis shwih las los nyeis.

¹¹Nyang gas yvng yoeuh soeu teh nyah yvng phung lhyi gomh das; Yvnglo jens lyis dvgeh tsainh las nyah loqyom mas po das, Yvngzains jens lyis zoh yah shwih das.

¹²Dvyuk yuk thomh jeis lyis nyah loqkhyont yah yoh laiq las, maukhung lhyi nyah loq yah yoh thu lhyeh? Dvyuk yuk tsohmop lyis kom masyah, boms jens jing jens lyis jvng mas yoh laiq lhyeh?

¹³Dvyuk yuk YHENSAIN lhyi cha kuot das zis yoh taiq lhyeh? Nyang lyis hank jyauh? Nyang lyis joeui hank dyei?

¹⁴Mangso ka vyhang khasoeh kuot toh das zis seq das zis yahge seqgyo las xuq das xiklyis hank yah xamgoh?

¹⁵YHENSAIN xiklyis dius nyau jens gas cha ma nghuot. Jeiszoq thoq lyis ma zes. We mau goeujo jens gas, phvlhau teh somh.

¹⁶Lebanon saiq khyam mha dah yewus dvnganh gas ngamoq dah Mangso lhyi dvlhain phudyei das xiklyis ma tham, houmha saiqzains jens eq ngheq das thangh kuot das zis svsoh nain.

¹⁷Dius nyau jens gas nyah xiklyis cha eq ma nghuot.

¹⁸Mangso lhyi hank yah yoh byi das lah? Nyang gas cha yah doeusgoh oen nvng khasoeh yoh taiq kyoh das lah?

¹⁹Nyang gas gungslho thwang lha ngwis xing shonh bang gas ngwis yah nyhoeuh, xing yah shauq toh dah Gungslho yah ma doeusgoh.

²⁰Ngwis xing ma yoh thyeq soeu ka, ma cuih dah saiq lyis khyen lha ma lains das gungslho lhyi thwang das xiklyis lyes dah loqmuh dap soeu lhyi xo.

²¹Namoq ma seq lhyeh? Gohlhain yah namoq lyis ma taiq kyoh ku lhyeh? Mungkvn khasoeh xi los cho ma xauhgyo ku lhyeh?

²²Nyeisjvng dah vthoq pheh, maukhung dah thyitvp pheh nyah hwankti tank mas tsung soeu kuot toh. Hauh o mha dah dius jens lyis gas janghgyik jens teh ngis ngis dvnyvng lo. Nyang gas maukhung lhyi gosseh teh lhywa lha, nyeis das zvng teh kuot toh.

²³Nyang gas yomsoq bos dah guon bang lyis khyoq las, nyamoq lyis vkyuh ma bos mus nhang.

²⁴Nyamoq gas dvtoh las vnyet ma chent dah jyo lo zains teh tsain nghuot. YHENSAIN lyeis muot nhang lhyi hauh vzains jens gas kyuk loh las nyoq kyuk lyis teh muot tangh tyamp.

²⁵Gyingshang Mangso lhyi hank yah yoh byi das? Nyang yah doeusgoh soeu hank bos lah?

²⁶Maukhung lhyi nghank yoeuh aq, Nvng nyvng dah kyi jens lyis hank gvnkhanh toh? Jes dvphung lhyi shwih thuq soeu ka houmha khanyhoq yuk bos zis seq las dvyuk dvyuk nyings yoeus las lui teh nghuot. Nyah yomsoq gas svsoh kuhxing lha dvkoeuq eq khanhamp ma dyuk.

²⁷Housoeh lyis Israel eh, YHENSAIN nah yau cho ma seq dyei, nvng ma jus khyvlyis xauh kham yvlyis ma yoeuh dyei oen chamus lop goh?

²⁸Nvng ma seq lhyeh? Ma xauhgyo ku lhyeh? YHENSAIN ka mathank magons Mangso nghuot. Nyang mungkvn gonh lyis gvnkhanh toh. Nyang khanhamp eq ma nyung ma daus. Nyang nghamh cho hank eq ma daq gyo dyei.

²⁹Nyang gas nyungdaus bang, yomnhuk bang lyis yombos nhang.

³⁰Loyvm jens yomnhuk las. Loyangh jens daus las lains das.

³¹Nghuot laus eq YHENSAIN lhyi pangh cho loms toh bang gas yomsaiq xo nyvng das. Nyamoq zonsmuh teh dang doq das. Nyamoq wuih lyis eq ma nyung, suh lyis yom ma nhuk.