Read Achang ESAIA 41 Bible Online

ESAIA 41 - Achang bible

ESAIA 41

¹Mangso taiq: We mau mas nyeis bang eh, samlo nyeis las ngah dang gyo geh! Soetuon jang mas nah soe taiq das zis cicont kuot aq. Nvng taiq das toeuh yoh das, hank jus zis thyet das nyhenshang dvgeh huom goh.

²Buisthuq pheh dah ung soeu lhyi shwih los soeu hank nghuot? Nyang lyis nyang khalhye loh khalhye ung nhang. Nyang lyis hwankti jens yahge dius nyau jens thoq mas ung cho hank dyei? Nyah moengsa yah nyamoq lyis tsohmop teh nghuot shoq thyoq khyoq. Lyeis yah huhyau muot sanh teh nyah nyo yah nyamoq lyis sanh tyo tyamp.

³Nyang gas duons shoq jesluiq shohluiq chank loh. Housoeh svsoh nyap las nyeisjvng mas yangh vluk ma tanh loh.

⁴Heisoeh bweh shoq kuot zis hank? Hauh sungson cho thyet zis hank? Ngos YHENSAIN ka cangxeih lyis yah houmha nyeis. Ngos YHENSAIN Mangso ka thang thank lyis eq houmha nyeis das.

⁵We mau mas dah dius jens gas ngos kuot cho lhyi nyvng goeus; nyamoq gas gyuk dvn las nvn nyeis. Housoeh las nyamoq dvnganh huom lha los.

⁶Loqmuh dap bang dvyuk yah dvyuk pangh goh, yomdyei goh.

⁷Yhen kuot soeu ka xing shonh soeu lhyi, Svsoh gis shoq kuot goeus, ge. Phvra jyot jyot bat soeu ka thyeq shonh tap soeu lhyi yomdyei nyeis. Nyamoq taiq zis gas, shonh tap zis gis - phvra lyis nyah joqyos nyang toenk toenk shonh tap goeus.

⁸Nghuot laus eq ngah jyeidwis Israel eh, nvng gas ngos khyen yoeus dah dius jens, ngah dyenschangh Abraham dah vshih nghuot.

⁹Ngos nvng lyis nyeisjvng vthang mhayah shwih los. Ngos nvng lyis we thank mau thunk jens masyah lui yoeus. Nvng gas ngah jyeidwis, ngos nvng lyis ma peq, dvkhyen yoeus toh.

¹⁰Vgyuk, ngos nvng yah nghuot! Ngos nah Mangso nghuot las nvng lyis cha yah eq ma los yoh kyuk nhang! Ngos nvng lyis yombos nhang zis yah pangh das. Ngos nvng lyis gos las khyuot yoeus das.

¹¹Nvng lyis nhaiqyo bang gas somh las xoqphuh cho lhyi seq das. Nvng lyis jeszan bang shei das las,

¹²nyeisjvng thoq masyah dyuk loh das.

¹³Ngos YHENSAIN, nah Mangso nghuot. Ngos nvng lyis yombos nhang lha taiq zis gas, Vgyuk, nvng lyis pangh das.

¹⁴YHENSAIN taiq, Namoq teh ngis las yomnhuk dah Israel jens eh, vchiqh goh, ngos namoq lyis pangh das. Ngos Israel dah gyingshang Mangso ka, namoq lyis khyuot yoeus soeu nghuot, ge.

¹⁵Ngos nvng lyis zwis zuk vsaiq tsain bos dah guknis jak bweh nhang lha, nvng gas boms jens lyis bat thyi, jing jens lyis phvlhau teh mhont tyamp.

¹⁶Nvng hauh yvlyis lyeis mas lhank las, lyeis yah muot tangh loh das. Lyeisjyang yah sanh tyo tyamp das. Housoeh ngos nah Mangso nghuot yvmvyah nvng pyo das; nvng gas ngos Israel dah Gyingshang Mangso lhyi chungh das.

¹⁷Ngah dius jens jeis shet khyungh kyuk zis yah nyamoq jeis chah las xo lhyi Ngos YHENSAIN ka nyamoq dung dang gyo dyei das; ngos Israel Mangso ka nyamoq lyis khanhamp eq ma tyamp toh das.

¹⁸Ngos tyeihgesles jing jens mas jeislvng jens, langhkhau mha jeisthuq dwang jeis tsain yaus nhang das. Mhanhdyvp mas jeis thomh, nyeis kyuk yos mas jeisthuq dwang jeis tsain yaus nhang das.

¹⁹Ngos mhanhdyvp mas Arit zains, zoeukyank zains, mhanh gyomh, tsanlun zains eq yuk nhang das. Tyeihgesles joqyos mas saiq khyam yuk das, xoeuh khyam, shvxoeuh khyam cypress khyam yuk nhang das.

²⁰Dius jens haih zis tsain nyvng das las, ngos YHENSAIN yah kuot toh yvlyis seq das. Israel dah Gyingshang Mangso yah bweh nhang cho lhyi nyamoq seqgyo los das.

²¹YHENSAIN, Israel dah hwankti haih zis taiq chah: Namoq dius nyau jens dah mangso jens eh, Namoq dah soe chi thuq geh. Namoq yoh, gis thank taiq goh das cho chi los geh!

²²Heimha los las cha bweh los das zis taiq geh. Hauh zis bweh los lyis ngamoq yoh seq das. Bweh lai goeus cho soetuon jang mas los phui kyoh las hauh vjyuk eq taiq geh.

²³Jweh los das shishenh lyis cha bweh das zis taiq kyoh geh, housoeh lyis namoq gas mangso jens nghuot zis ngamoq yoh seq das. Ngamoq gyuk las mauh shoq gis zis dvja ja, nghuot ya dyoqbis zainsmuh dvja ja kuot geh.

²⁴Namoq eq namoq kuot zis dvnganh eq cha eq ma nghuot; namoq lyis paiq bang eq vchoqh vlhauq nghuot.

²⁵Ngos buisthuq pheh nyeis soeu lhyi khyen yoeus. Mautsung pheh yah thyoq das xiklyis nyang lyis shwih los. Nyang gas guon bang lyis thomhbop lyis soeh nang das. Houka auh shonh soeu tsohnyhon nang teh nghuot.

²⁶Haih zis bweh los das oen namoq mas hank yoh taiq toh? Housoeh lyis, Nvng jus oen ngamoq yoh taiq das. Namoq mas hank eq hauh cho dvkhonh eq ma taiq. Namoq cha taiq sam hank eq ma xauhgyo.

²⁷Ngos YHENSAIN ka Zion lhyi hauh loeus cangxeih taiq soeu nghuot. Ngos Yerusalem lyis, Nah dius jens los nyeis, nyamoq yhen pheh los nyeis oen taiq das zis loeus kyoh soeu nhang kat.

²⁸Ngos hauh mangso jens mas yoeuh lyis, hank eq cha ma taiq. Ngos nyeidang lyis eq hank ma yoh toeuh.

²⁹Hai mangso jens dvnganh gas cha yhung pvjus. Nyamoq cha eq ma yoh kuot. Nyamoq dah phvra jens gas yomnhuk las yomsoq ma bos.