Read Achang ESAIA 42 Bible Online

ESAIA 42 - Achang bible

ESAIA 42

¹YHENSAIN taiq, Haih zis gas ngah jyeidwis, ngos yombos nhang soeu nghuot. Ngos nyang lyis nhaiqdoeus las khyen toh. Ngos nyang lyis ngah Dyos kat dyei las dius nyau khanghmuh lyis lyi jus cho chi los nhang das.

²Nyang ma kaiq das, nyah thwe ma thuq das, talhoeu mha nyang dang ma taiq das.

³Nyang gas nghwi dah jvmbu lyis ma khyauh, nyijyenh gyoh nyeis dah nyibung lyis ma sat das. Nyang gas dvnganhmoq xiklyis vcaiq vto lyi jus cho chi thuq los das.

⁴Nyeisjvng thoq mas nyah lyi jus cho ma doengs dvchank nyang nghamhloms cho ma dyuk, yom ma gyau. We mau mas bang nyah jyauh cho lhyi langh nyeis.

⁵Mangso ka Maukhung lhyi gvnkhanh las lhywa toh. Nyeisjvng yahge houmha nyeis ya nyeis yvlyis shunk toh. Hauh thoq mas nyeis dius jens lyis kang dyei soqshe nhang. Gvshih YHENSAIN Mangso nyah jyeidwis lyis taiq zis gas,

⁶Ngos YHENSAIN ka nvng lyis lui las, nyeisjvng thoq mas lyi jus cho bweh yvlyis nyvng das yomsoq dyei. Nvng masyah ngos dius jens dvnganh lyis thanghchvp toh das. Nvng masyah dius nyau jens xiklyis ngos bvng zis chi los das.

⁷Nvng gas jet dah nyoqjeih lyis phank dyei das, soeng soeng noq dah thung mha tsain lungh joq bang lyis lhuiq kat das.

⁸Ngos kyingh YHENSAIN, nah Mangso nghuot. Ngah phunk gohtoeu mangso lhyi ma dyei. Ngah nyoqnho ngelang eq phvra jens lyis ma dyei das.

⁹Ngos uhlhomh taiq toh zis gvshih bweh los. Gvshih ngos namoq lyis ma bweh los shih dah cho vsaiq taiq kyoh das, ge.

¹⁰YHENSAIN lhyi chunghthwe vsaiq yah chungh geh. Mungkvn gonh nyah nyoqnho ngelang lyis chungh geh! Thomh goeu bang nyang lyis chungh geh. Thomh mas dwis ya dwis zis dvnganh nyang lyis chungh geh! We mau jens yahge houmha nyeis ya nyeis bang chunghthwe kat geh.

¹¹Mhanhdyvp yahge nyah wus jens Mangso lhyi chungh bas jungh. Kedar dius jens nyang lyis chungh bas jungh! Sela wus mas nyeis bang, nyamoq boms thyoh masyah gauslaus kaiq bas jungh!

¹²We mau mas nyeis bang YHENSAIN lhyi chungh cho yahge phunk nyoqnho ngelang dyei bas jungh!

¹³YHENSAIN ka jeszan das ge jeslo teh thuq loh; nyang gas moeng zan das xiklyis nhaiq wvng zis yah cicont nghuot. Nyang gas jeszan dah kaiq thwe thuq kat; houka nyang nyah jeswus jens lyis nyah yomsoq chixoeuq zis nghuot.

¹⁴Mangso taiq, Ngos ngah dius jens lyis ma toeuh samlo nyeis zis nyangh goeus. Nghuot laus eq gvshih gas ngos kuot das shishenh jweh goeus; housoeh ngos lokhoeu nos nos vmesbih teh kaiq.

¹⁵Ngos gas boms jens jing jens lyis mhont das las mhanh yahge saiqzains jens gas kyuk loh. Jeislvng bos dah langhkhau jens lyis jeis kyuk sihyos[8] thaiq tyamp las thomhlo jens kyuk loh.

¹⁶Ngos ngah dius nyoqjet bang lyis nyamoq khanhamp eq ma suh ku cho chank shwih das. Ngos nyamoq dah chuot yvlyis bvng yvpheh thaiq dyei. Yauhyot mau lyis eq nyamoq xikkhonh mas dvm nhang das. Heika ngah dangthoengh tsain nghuot las ma dyoq shoq gomh toh das.

¹⁷Gungslho lhyi nyamoq mangso ge lui las phvra lyis loms bang gas nyoqnho ngelang gyoh las xoqphuh das, ge.

¹⁸YHENSAIN taiq: Nojet bang eh, gyo geh! Nyoqjet bang eh, vlhomuh yoeuh geh!

¹⁹Ngah jyeidwis thoq lyis nyoq zes jet soeu vbos lo lah? Ngos nhang dah loeuswons soeu thoq lyis no zes jet soeu vbos lo lah? Ngos lyis kyauh toh soeu teh nyoq hank jet? YHENSAIN dah jyeidwis teh nyoq hank jet?

²⁰Israel eh, nvng gas nyoshoq nyvng laus eq nah xiklyis chah vjyuk bos? Nvng xauhgyo das no yoh laus eq nvng jyoengh cha xauhgyo?

²¹YHENSAIN ka khyuot yoeus das zis nhaiq wvng dah Mangso nghuot las nyang nyah lyi yahge jyauh cho lhyi chunghtoq toh. Nyang nyah dius jens lyis eq hauh yvlyis nyoqnho ngelang tsain dyei nhang mes.

²²Nghuot laus eq gvshih nyah dius jens gas thyoqzo zis xauh goeus. Nyamoq gas nyeis khau thung mha lhunk shung toh zis xauh goeus. Nyamoq gas lhuot zo, thyoqzo zis xauh goeus. Hank eq nyamoq lyis ma los khyuot lo.

²³Namoq mas haih zis hank gyo das lah? Gvshih masyah vlhomuh gyo das lah?

²⁴Israel lyis thyoqzo bang jyank mas hank kyauh? Yang cu goeus dah YHENSAIN nyang dvkyauh. Yang gas nyang yang lyis kang dwis nhang mes khyvlyis kang ma dwis, nghuot ya nyang yang lyis dyei dah jyauh cho lhyi domsyos ma gyo.

²⁵Housoeh yvmvyah nyah nhaiqyo cho ngamoq lyis zangh nhang, gyukphoh jeszan cho ka ngamoq lyis kham nhang. Nyah nhaiqyo cho ka Israel mau dvkhauyah nyi soeh ngeh nhang. Nghuot laus eq cha bweh nyeis zis ngamoq khanhamp eq ma seq. Ngamoq hou mhayah cha ma xuq.