Read Achang ESAIA 43 Bible Online

ESAIA 43 - Achang bible

ESAIA 43

¹Israel eh, nvng lyis gvnkhanh toh soeu YHENSAIN heisoeh ge: Vgyuk, ngos nvng lyis khyuot yoeus das. Nvng ngah zis nghuot oen ngos nvng lyis nyings yoeus las khi toh.

²Nvng nauh dah jeis mas goeu lyis ngos nvng yah nghuot das. Nah dah yau cho ka nvng lyis ma nghop das. Nvng nyi mas suh lai lyis ma ngeh das. Yau dah soe thuq los laus eq nvng lyis ma nos nhang das.

³Khasoeh ge lyis ngos gas YHENSAIN, nah Mangso, nvng lyis khyuot yoeus soeu, Israel dah Gyingshang Mangso nghuot. Ngos nvng lyis khyuot das nyhenshang Egutu lyis dyei tyamp. Sudan yahge Seba lyis eq hauh nyhenshang dyei.

⁴Ngos dius nyau dvnganh lyis, nah kang lhyi khyuot kat nhang das: khasoeh ge lyis nvng gas ngah xiklyis phauhdap las ngos nvng lyis jyet zis yah nyoqnho ngelang dyei.

⁵Vgyuk, ngos nvng yah nghuot! We dah buisthuq pheh yah eq we thank buiswvng pheh yah eq nah dius jens lyis yhen pheh shwih los das.

⁶Ngos gas mautsung lhyi, Nyamoq lyis loh nhang aq, mautyi lhyi, Nyamoq lyis vzwi toh, oen taiq das. Ngah dius jens lyis we masyah, mungkvn khyiq khanghmuh masyah tauh los nhang aq, oen das.

⁷Nyamoq gas ngvnyang dius jens nghuot las, ngah xiklyis phunk nyoqnho she los das nyhenshang ngos nyamoq lyis gvnkhanh toh, ge.

⁸Mangso taiq: Ngah dius jens lyis yungh mas shwih los geh. Nyamoq nyoqjeih dap las nyoqjet, no dap las no tsain jet!

⁹Dius nyau jens soe taiq yvmas zain bas jungh. Nyamoq dah mangso jens mas khah mangso ka jweh los das shishenh cho yoh taiq? Khah mangso ka gvshih cha bweh nyeis cho yoh taiq? Hauh zis jus cho kyink das zis yahge hau jyoeng dang lyis taiq toenk dyei das xiklyis hau mangso jens mas dah kanghjyoeng tsain shwih los bas jungh.

¹⁰Israel dius jens eh, namoq gas ngah kanghjyoeng jens nghuot. Ngos namoq lyis ngah jyeidwis jens duot nhang das zis khyen yoeus. Housoeh namoq ngos lyis seq las ngos lyis lomsjingh zis yah ngos gas dvso kyingh dah Mangso nghuot yvlyis seqgyo das. Ngos mas lai las gohtoeu mangso ma bos lo. Xik pheh khanhamp eq ma bos ku, thang pheh eq khanhamp eq ma bos das.

¹¹Ngos dvyuk kyingh YHENSAIN nghuot, Ngos nvng lyis yoh khyuot yoeus soeu nghuot.

¹²Cha bweh los das zis ngos taiq toh las nvng lyis pangh das xiklyis jweh los. Lvbaus mangso ka heiteh zis khanhamp eq ma kuot ku zis namoq ngah kanghjyoeng tsain nghuot.

¹³Ngos gas Mangso nghuot, vjangh yah nghuot das. Hank eq ngah yomsoq masyah ma yoh phang luiq. Ngos kuot yvlyis hank ma yoh thaiq tyamp.

¹⁴Israel dah Gyingshang Mangso, nvng lyis khyuot yoeus YHENSAIN heisoeh ge: Nvng lyis khyuot das nyhenshang ngos Babilon lyis tyi lha jes dvphung nhang das. Ngos hau wus khomh lyis thyoq khyoq das, houmha kaiq dah thwe ka ngaus yvpheh lhaiq kat das.

¹⁵Ngos gas YHENSAIN namoq dah Gyingshang Mangso nghuot. Israel eh, ngos nvng lyis gvnkhanh toh las ngos namoq dah hwankti nghuot.

¹⁶YHENSAIN ka gohlhain thomh mas cho kuot, nesthan jeis mas chokhyoh kuot.

¹⁷Nyang gas jeslhyingh jens yahge nyang jens yah dvgeh kank bos jesphung lyis dyoqbis loh nhang. Nyitoengh mas nyiduk lyis nyizos thyet tyamp teh nyamoq lyis gyoh tyamp nhang lha khanhamp eq ma toq los lo!

¹⁸Nghuot laus eq YHENSAIN taiq zis gas, Namoq lai loh goeus dah cho lhyi vlang toh goh. Gohlhain dah vcauh lyis vnghamh yoeuh lo.

¹⁹Ngos vsaiq kuot das yvlyis zungh yoeuh nyeis aq. Hauh zis bweh joq goeus namoq gvshih yoh nyvng goeus. Ngos mhanhdyvp thyet las cho kuot das, houmha ngos namoq lyis jeislo lvng tsain dyei das.

²⁰Mhanhdyvp yewus jens yangh ngos lyis nyoqnho ngelang dyei das; ye khuih jens, gola-u nghoq jens eq ngos lyis chungh das: Khasoeh ge lyis ngos sihsho yos mas jeislvng tsain yaus nhang lha ngos khyen yoeus ngah dius jens lyis jeis gvmshuk.

²¹Nyamoq gas ngos ngvnyang xiklyis kuot toh dius jens tsain nghuot las ngos lyis chunghthwe kat das.

²²YHENSAIN taiq, Nghuot laus eq, Israel eh, nvng ngos lyis nghoengh las ma paiq lo.

²³Ngheq phudyei das xiklyis nvng nah yvng ngah jyank mas ma chi los. Nah lomhxangh yah ngos lyis nyoqnho ngelang ma dyei. Ngos nvng lyis phudyei jyungshuk ma tsoengh sang, xangh sang lha ma nyung nhang.

²⁴Nvng ngah xiklyis xangh ma wis, nghuot ya nah gaunyhauq coeu yah ngos lyis jo nhang zis ma nghuot. Hauh gungsthaiq nvng nah yaunos yah ngos lyis yvwons lhoq lyei, nah dah lyi ma chi cho yah ngos lyis nyung nhang.

²⁵Nghuot laus eq ngos gas nah yaunos khyuot dyei dah Mangso nghuot. Ngos hauh soeu nghuot yvmvyah nah yaunos khyuot dyei. Ngos nah yaunos lyis ma comh toh dyei lo das.

²⁶Soetuon jang mas loh goh; nah zaukauq cho chi los aq! Nvng gas jus ge zis kyink das nyhenshang nah soe taiq aq.

²⁷Nah dah cangxeih phauh thyeih yaunos kuot goeus, nah uhshe bang ngos lyis tyi lha yaunos kuot goeus.

²⁸Housoeh namoq dah guon bang gas ngah gyingshang joqyos lyis vwot v-oeu kuot. Housoeh las ngos Israel thoq mas dyoqbis cho she los. ngos ngvnyang dius jens lyis goessang joqyos kuot goeus.