Read Achang ESAIA 44 Bible Online

ESAIA 44 - Achang bible

ESAIA 44

¹YHENSAIN taiq: Yakop vnyau vshih, ngos khyen yoeus toh bang ngah jyeidwis Israel eh, gvshih gyo yoeus aq.

²Ngos gas nvng lyis gvnkhanh toh dah YHENSAIN nghuot. Nvng khoeu los shishenh lyis yah ngos nvng lyis pangh goeus. Vgyuk, nvng ngah jyeidwis, ngos khyen yoeus dius jens, ngos jyet soeu nghuot.

³Jeis shet dah mau mas ngos jeis dyei das, kyuk dah maunyeis jeislo lvng tsain yaus nhang das. Ngos nah lo jens thoq mas ngah dyos huot khyoq las, nah vnyau vshih thoq mas ngah shvmanh dyei das.

⁴Nyamoq gas yaus nyeis dah jeislo lvng yvm mas yuk dah wonszains teh, jeis gis gis yoh yvmas yuk dah mhanh teh nyeisgis yaplhoq los.

⁵Dius jens dvyuk thang lhyi dvyuk taiq das zis gas, Ngos YHENSAIN dius nghuot, ge. Nyamoq gas Israel dius jens yah los coq das. Dvyuk dvyuk nyah loqyom mas YHENSAIN nyings vsoh tap las, ngos Mangso dah dius dvyuk nghuot ge lui zo das.

⁶Israel lyis guon las gos dyei dah YHENSAIN, Maukhung Jesphung YHENSAIN heisoeh ge: Ngos gas cangxeih soeu, thang thank soeu, dvso kyingh Mangso nghuot. Ngos mas lai las gohtoeu Mangso ma bos.

⁷Ngos kuot goeus zis dvyuk yuk yoh kuot lhyeh? Vsaiq xi masyah thang thank shishenh jweh shoq bweh los cho dvnganh lyis hank yoh taiq thuq lah?

⁸Ngah dius jens eh, vchiqh goh! Gohlhain masyah gvshih jweh shoq ngos taiq toh zis dvnganh bweh los cho namoq seq. Housoeh namoq gas ngah kanghjyoeng jens tsain nghuot. Mangso gohtoeu bos lhyeh? Ngos khanhamp eq ma xauhgyo ku, yomsoq bos dah mangso dvso so bos lhyeh?

⁹Phvra tsain kuot bang dvnganh gas vkyuh ma bos. Nyamoq phauhtap toh dah phvra jens gas yhung pvjus. Haih mangso jens lyis paiq bang gas nyoqjet bang, cha ma seq bang nghuot. Nyamoq xoqphuh das.

¹⁰Mangso khyvlyis paiq das nyhenshang ngwis xing gungslho kuot zis gas vkyuh ma bos.

¹¹Hauh yvlyis paiq soeu khanghmuh gas khoengh shomh das. Phvra kuot bang gas dius dvnghuot las cha ma jes. Nyamoq lyis soetuon jang mas los yap nhang aq, nyamoq gyuk las xoqphuh das.

¹²Thyeq shonh soeu ka thyeq dvjvp yoeus las nyi mas shonh. Nyah yombos loqyom yah doeus bat las vzwvng kuot. Nyang housoeh kuot zis yah dvyhangteh nyang zosyuot jeisshet, nyung eq nyung.

¹³Loqmuh dap soeu ka saiq keq las, vzwvng lyis shvhwih yah khyet, nyah kyahsoe yah thwang lha dius lho yungh yungh kuot las nyah yhen khau mha toh.

¹⁴Nyang yhung das xiklyis saiq khyam mhayah arit zains thoeuq, xoeuh saiq khyen thoeuq, nghuot ya shvxoeuh saiq thoeuq. Nghuot ya xoeuh[9] zains tsungh las yuk los das xiklyis mau lyis langh nyeis.

¹⁵Dius dvyuk gas saiq dvchink lyis thangh kuot, gohtoeu dvchink lyis gas phvra kuot. Dvchink yah nyang thangh zungs las joq khat gvng, ohlhyoq eq piq; gohtoeu dvchink yah gas mangso kuot las tsain paiq.

¹⁶Nyang gas thangh dvkhamh yah nyi ngheq; shoh kank zo las jo. Nyang nyi gvng las taiq zis gas, Nywe goeus, kha iq gis dah nyi, ge.

¹⁷Nyet dah saiq lyis nyang phvra kuot lho lha hauh xik mas gop gyoh las paiq. Nyang hauh yvmas shvmanh dung zis gas, Nvng ngah mangso nghuot, ngos lyis khyuot yoeus aq, ge.

¹⁸Housoeh teh bang gas nyo koh las nyamoq cha kuot nyeis yvlyis nyamoq ma seq. Nyamoq gas jyoeng cho mhayah nyoqjeih eq ehnyet eq chenh toh.

¹⁹Hau phvra kuot soeu ka, Ngos gas thangh dvkhamh lyis ngheq las nyigywe mas ohlhyoq piq, shoh kank las zo. Nyet shih saiq yah ngos phvra kuot. Ngos saiq tungh xik mas paiq gop joq, ge das seq cho ma bos nyvng!

²⁰Nyiyvp lyis zo teh mus nhang. Nyah dah koh dah yoh nghamh thuq cho ka nyang lyis shwih whang lha nyang lyis ma yoh kyoeu lo. Nyah loq mas zwi chi dah phvra gas mangso ma nghuot yvlyis nyang ma rhen das.

²¹YHENSAIN taiq, Israel eh, haih zis soh aq, nvng ngah jyeidwis nghuot zis soh aq. Nvng ngah jyeidwis duot das nyhenshang ngos nvng lyis gvnkhanh toh las ngos nvng lyis khanhamp eq ma tohnyhik, ge.

²²Ngos nah yaunos lyis jyommauh teh shenh tyamp dyei. Ngah jyank mas tauh los aq, ngos gas nvng lyis khyuot yoeus soeu nghuot.

²³Maukhung eh, gauslaus zis yah kaiq aq! Nyeisjvng mas noq dah joqyos jens eh, kaiq geh. Boms jens yahge saiqkhyam mha dah saiqzains khanghmuh eh, gauslaus zis yah kaiq geh! YHENSAIN ka nyah dius Israel lyis khyuot yoeus zis yah nyah kuhxing cho chixoeuq goeus.

²⁴Ngos gas nah khyuot yoeus soeu YHENSAIN nghuot; Ngos gas nvng lyis gvnkhanh toh soeu nghuot. Ngos gas vyhang dvnganh lyis gvnkhanh toh soeu, YHENSAIN nghuot. Ngos kyingh maukhung lhyi lhywa toh; ngos nyeisjvng lyis kuot uhlyis, hank ma pangh.

²⁵Ngos gas botthyet bang lyis koh nhang. Kyi dah vlho lhyi yoeuh las pe cho lhyi ma ung nhang. Joeui bos soeu dang lyis shuot cho chixoeuq las nyamoq joeui ka vkoh vpaq nghuot cho chixoeuq.

²⁶Nghuot laus eq ngah jyeidwis lyis yah pe nhang lha, ngos ngah loeuswons soeu lyis yah ngos nghamh toeuq toh cho chixoeuq nhang lhyi, ngos hau nghamhtoeuq cho kuot zis yahge pe toh cho lhyi bweh los nhang. Houka ngos Yerusalem lyis houmha dius doms nyeis das, Yuda wus jens lyis eq, hauh wus jens doms kuot toh das oen. Hauh wus jens gas dyoq gyoh joq masyah doms toeu das.

²⁷Vmingh dvkhonh yah ngos jeisnyaus thomh lyis kyuk loh nhang.

²⁸Ngos Kuru lyis taiq zis gas, Nvng gas ngah nyhenshang guon das soeu nghuot. Nvng gas ngos nvng lyis kuot nhang mes zis kuot das. Nvng gas, Yerusalem lyis doms kuot toh bas jungh, Yhenmuh yhenpom kuot bas jungh, oen.