Read Achang ESAIA 45 Bible Online

ESAIA 45 - Achang bible

ESAIA 45

¹YHENSAIN ka Kuru lyis hwankti bweh das nyhenshang khyen. Nyang gas Kuru lyis dius nyau jens lyis ung das xiklyis toeuq toh. Nyang gas Kuru lyis hwankti jens dah yomsoq lyis yoeus tyamp nhang. YHENSAIN ka nyah xiklyis wus khomh tsain phank toh dyei das. Kuru lyis YHENSAIN taiq zis gas,

²Ngvnyang nah cho lhyi sont toh das, boms jens jing jens lyis tamp das. Thunk khyam khomh lyis khyauh las thyeq khomh kyank lyis vdoeus doeus kuot das.

³Ngos nvng lyis soeng soeng noq mas dah, gau joqyos mas shung toh zisyos dyei das. Housoeh lyis ngos gas YHENSAIN nghuot cho nvng seq das. Israel Mangso ka nvng lyis nyings yoeus las lui zis nvng seq das.

⁴Ngos khyen yoeus toh ngah dius jens, ngah jyeidwis Israel lyis pangh das xiklyis ngos nvng lyis toeuq toh. Nvng ngos lyis ma seq laus eq ngos nvng lyis nyoqnho ngelang zainsmuh dyei.

⁵Ngos YHENSAIN nghuot, gohtoeu mangso ma bos lo. Nvng ngos lyis ma seq laus eq nvng chah nyeis dah yom ngos nvng lyis dyei das.

⁶Ngos haih zis kuot zis gas, mungkvn dvthang mhayah gohtoeu dvthang mha jweh shoq bang yuk khanghmuh gas Ngos YHENSAIN nghuot, gohtoeu mangso ma bos lo zis yoh seq das xiklyis nghuot.

⁷Ngos bvng zis yahge chuot zis aiq ja yah gvnkhanh toh. Ngos shvmanh cho yahge thyoqpi zainsmuh aiq ja yah she los. Hai dvnganh yvlyis ngos YHENSAIN kuot toh.

⁸Mau wus teh ngos maukhung mhayah dan cho nhang kat das. Hauh yvlyis nyeisjvng gas lhom yoeus las luiq cho yahge lyi jus cho vbuh buh das las, ngos YHENSAIN hauh yvlyis bweh los nhang das.

⁹Gohtoeu tsoh auh dvnganh yah doeusgoh dah tsoh auh dvkoeuq gas nyang lyis kuot toh soeu yah nyingh womh nyo goh lhyeh? Tsohnyhon ka auh shonh soeu lhyi, Nyang cha kuot nyeis ge nyei lhyeh? Auh gas nyang lyis kuot toh soeu lhyi lyes cho ma bos ge lop lhyeh?

¹⁰Dvyuk yuk nyah nyhiphoq lyis, Nvng ngos lyis heisoeh chamus kuot ge womh sang lhyeh?

¹¹Thang pheh bweh los das cho kuot soeu, YHENSAIN Israel dah Gyingshang Mangso heisoeh ge: Nvng ngos lyis ngah lo jens cho nyei, nghuot ya ngos cha kuot chah zis taiq das toeuh ma bos.

¹²Ngos gas nyeisjvng lyis kuot toh las houmha nyeis das dah dius lyis gvnkhanh toh soeu nghuot. Ngos ngah yomsoq yah maukhung lhyi lhywa toh. Ngos buislom lhamhmuh yahge kyi jens lyis joeu nyeis.

¹³Ngos nghamh toeuq cho tyink dyei das zis yahge jus khyvlyis kuot das xiklyis Kuru lyis ngvnyang nhauh toq kat. Ngos nyang suh cho khanghmuh lyis dan nhang das. Nyang ngah dah wus Yerusalem lyis doms kuot das. Jonsdoeus loh dah ngah dius jens lyis lhuiq kat das. Haih zis kuot das nyhenshang nyang lyis hank ma nghoh, khauwhot eq hank ma dyei, ge. Maukhung Jesphung YHENSAIN taiq goeus.

¹⁴YHENSAIN Israel lyis heisoeh ge: Egutu yahge Sudan dah yoh khuiq cho nah zis nghuot. nyhang dah Sabean dius jens gas nah jons jens nghuot das. Nyamoq gas shamjvng twih zis nah thang mha chank los. Nyamoq gas nah jyank mas gop zis yah, Mangso ka nvng yah nghuot, nyang kyingh Mangso nghuot, ge rhen das.

¹⁵Nyah dius jens lyis khyuot yoeus Soeu, Israel Mangso ka nyah gungs lyis nghop shung dah Mangso nghuot.

¹⁶Phvra kuot bang dvnganh gas xoq das, dvnganh gas xoqphuh das.

¹⁷Nghuot laus eq Israel gas YHENSAIN yah khyuot yoeus zis xauh goeus las nyah ung cho ka vcaiq vto goeng joq. nyah dius jens gas khanhamp eq xoq ma phuh das.

¹⁸YHENSAIN ka maukhung lhyi gvnkhanh toh. Nyang gas Mangso nghuot soeu nghuot. Nyang nyeisjvng lyis vzwvng toeuq las kuot. Nyang hauh yvlyis goeng toenk joq nhang. Nyang nyeisjvng lyis jyamhjyuklhyuk ma kuot toh, dius jens nyeis das joqyos dvkuot toh. Heika nyang taiq zis nghuot. Ngos gas YHENSAIN nghuot, gohtoeu mangso ma bos lo.

¹⁹Ngos ma gauh taiq, nghuot ya ngos nghamh toeuq toh cho lhyi ma shung toh. Ngos lyis, Vkom dvxo geh, oen Israel dius jens lyis ma sang. Ngos YHENSAIN nghuot las dang jyoeng taiq. Ngos jus cho lhyi seq nhang.

²⁰YHENSAIN taiq: Gyoh tyamp munghdan masyah doeng los bang dvnganh, dius nyau jens mas bang dvgeh los huom geh. Soetuon jang mas namoq nyang los taiq geh. Dius jens nyamoq saiq phvra lyis chixoeuq las nyamoq lyis ma yoh khyuot yoeus dah mangso lhyi tsain dung. Hauh bang gas cha eq ma seq bang nghuot.

²¹Soetuon jang mas namoq dah soe chi los geh, khomp bang dvyuk yah dvyuk taiq goh bas jungh. Cha bweh los das zis gohlhain yah taiq toh zis hank? Nyah dius jens lyis khyuot yoeus soeu YHENSAIN Mangso ngos ma nghuot lhyeh? Gohtoeu mangso ma bos lo.

²²Mungkvn gonh mas nyeis bang eh, khyuot yoeus zis xauh bas jungh gvshih ngah jyank mas lhain los geh. Ngos kyingh Mangso nghuot.

²³Ngah dangthoengh gas jyoeng lha hauh zis khanhamp eq ma thaiq loh das. Ngos ngvnyang maukhi lha dangthoengh toh. Yuk khanghmuh ngah xikkhonh mas los dupaiq las, lhyo khanghmuh gas, Ngos lyis lomluk das, ge nyhen toh das.

²⁴Nyamoq gas ngos masyah kyingh ung cho yahge yom dvxo nyvng ge taiq das! Nghuot laus eq ngos lyis hoeng bang dvnganh gas xoqphuh cho xauh khamzo das.

²⁵Ngos YHENSAIN ka Yakop dah vnyau vshih dvnganh lyis khyuot das las nyamoq ngos lyis chungh das.