Read Achang ESAIA 48 Bible Online

ESAIA 48 - Achang bible

ESAIA 48

¹Yuda dah vnyau vshih masyah dyos lyih dah Israel jens eh, haih zis gyo geh. Namoq gas YHENSAIN nyings mas maukhi lha Israel Mangso lhyi paiq das xiklyis sang yoeus laus eq namoq taiq khyvlyis ma chank.

²Nghuot laus eq namoq gas gyingshang wus mas dah dius nghuot las Israel Mangso lhyi nges toh. Nyah nyings Maukhung Jesphung YHENSAIN nghuot ge taiq khwank nyeis.

³YHENSAIN Israel jens lyis heisoeh ge: Cha bweh los das zis ngos gohlhain yah uhlhomh taiq toh. Hauh thang lhyi ngos nyetlos nyettant bweh los nhang.

⁴Nah nhaiqlom gas thyeq soeh than, thunk jen teh than yvlyis yoh kyink thuq kat yvlyis ngos seq.

⁵Nah phvra yahge gungslho yah bweh nhang ge nvng taiq yvlyis tomp tyamp das xiklyis hauh zis ma tsain joq shih yoq lyis yah, ngos nah cho lhyi gohlhain yah uhlhomh taiq toh. Hauh cho ma bweh los shih lyis taiq hoeuh.

⁶Ngos uhlhomh taiq toh zis dvnganh gvshih bweh los. Ngos uhlhomh taiq toh cho jens gas jus yvlyis nvng rhen chah. Gvshih ngos nvng lyis xikpheh ma chi thuq xoeuq shih, jweh los das cho saiq taiq kyoh das.

⁷Ngos gvshih dvbweh los nhang. Lai loh goeus shishenh lyis heisoeh teh zis ma bweh ku shih. Hauh zis joq nghuot lyis gas nvng hauh cho dvnganh seq ge sang das.

⁸Nvng gas vjangh yah gomloeus phoq khyvlyis dvseq las, nvng lyis ma yoh loms zis ngos seq. Housoeh yvmvyah haih zis nvng khanhamp eq ma xauhgyo. Nah no mas dang khanhamp eq ma wvng.

⁹Dius jens ngah nyings lyis chungh das xiklyis, ngos nhaiqyo zis lyis zaiq las jhen zis yah ngos nvng lyis ma mhont das.

¹⁰Ngwis lyis tsau mha xet teh, ngos nvng lyis shanghsenh kham ge dah nyi mas khyink yoeuh goeus. Nghuot laus eq nvng gas vkyuh ma bos cho yoh xo nyvng goeus.

¹¹Ngos kuot zis gas ngah nyhenshang dvnghuot. Ngos ngah nyings lyis ma phauh ma danh ma mus nhang das. Nghuot ya ngah phunk hank lyis eq ma dyei das. Houka ngvnyang zis kyingh dvnghuot chah.

¹²YHENSAIN taiq: Ngos Khi yoeus dah Israel jens eh, ngah dang gyo aq. Ngos Mangso nghuot, cangxeih soeu, thang thank soeu dvso kyingh nghuot.

¹³Ngah loq yah nyeisjvng vpom lhyi kuot, maukhung lhyi lhywa toh. Ngos maukhung yahge nyeisjvng lyis lui lyis nyamoq dvlhain dvm lyis thuq los las joq joq.

¹⁴Dvnganhmoq huom lha gyo geh. Babilon lyis zan das zis ngos khyen soeu lhyi mangso jens hank eq uhlhomh ma yoh taiq. Ngos nyang lyis kuot nhang mes zis nyang kuot das.

¹⁵Ngos gas taiq toh las nyang lyis khi soeu nghuot. Ngos nyang lyis shwih thuq las ung cho dyei soeu nghuot.

¹⁶Ngah jyank mas ni los las ngos cha taiq zis gyo geh. Ngos cangxeih lyis yah bvng bvng taiq goeus zis yahge vjangh ngah dang lyis nyuk los nhang. (Gvshih Yomzains YHENSAIN ngos lyis nyah dyos dyei las nhang kat.)

¹⁷Israel dah gyingshang Mangso, nvng lyis khyuot yoeus Soeu YHENSAIN heisoeh ge: Ngos gas nah vkyuh xiklyis nvng lyis jyauh las nvng chank chah cho mha uhshe soeu YHENSAIN, nah Mangso nghuot.

¹⁸Nvng ngah tyingtoh dang lyis chank kuot lyis, khanhamp eq ma kyuk loh dah jeislo lvng teh nah xiklyis shvmanh yoh das. Jeis yvm mas changhboq toeukhuk los teh, nah xiklyis dan cho yoh los das.

¹⁹Nah vnyau vshih sihsho chvp teh nyo das. nyamoq gas khanhamp eq mhont zis ma xauh das oen zis ngos soh soh nghuot.

²⁰Babilon masyah thuq los geh, luiq loh geh! Gausyis zis yah loeus kaiq hoeuh geh; dvkhauyah seq nhang geh. YHENSAIN ka nyah jyeidwis Israel lyis khyuot yoeus goeus.

²¹YHENSAIN ka nyah dius lyis gywes las kyuk dah mhanhdyvp cho shwih lai lyis nyamoq jeis shet zis ma xauh. Nyamoq nyhenshang luk masyah jeis yaus thuq los nhang. Nyang luk lyis khwih las jeis thuq los.

²²Yaunos wons bang xiklyis nyenstap cho ma bos ge YHENSAIN taiq.