Read Achang ESAIA 5 Bible Online

ESAIA 5 - Achang bible

ESAIA 5

¹Ngah dyenschangh yahge nyah zvbiq khyam lvkhyank, ngos nvng lyis haih lvkhyank kat uhlyis gyo aq. Jenh bos dah jing dvkoeuq thoq mas ngah dyenschangh dah zvbiq khyam dvkhyam joq.

²Nyang yos khop las lukgoq shang tyamp thang lhyi gis thank dah zvbiq nwis tsain tsungh toh. Khyam zungh das xiklyis tyoeuqzvm tsuk las dwang doeu las zvbiq nyhet zwvng kuot toh. Nyang gas zvbiq shih nyhink das xiklyis langh nyeis. Nghuot laus eq hauh shih gas jyen.

³Housoeh las gvshih ngah dyenschangh taiq zis gas, Yuda mau yahge Yerusalem mas nyeis bang eh, ngos yahge ngah zvbiq khyam jo mas soetuon dyei geh.

⁴Ngos houmha kuot chah las ma kuot zis cha bos au? Houlhyi jyen dah zvbiq shih chamus thuq los au! Ngos nghamhloms dah shih gis ma nghuot.

⁵Ngos ngah zvbiq khyam lhyi heisoeh kuot das: hauh khyamdangh yoeus tyamp, gos toh dah ciank thyoq tyamp las, ye gaunyhauq hauh yvlyis zo tyamp zis yah nang nheh tyamp nhang das.

⁶Ngos hauh yvlyis yoshwangh toh das. Zvbiq nwis ma soq, yos ma khop, zoeuzains vja ja yah nghop nhang das. Hauh yvmas mau ma wus das xiklyis eq jyommauh lyis taiq toh das.

⁷Israel gas Maukhung Jesphung YHENSAIN dah zvbiq khyam nghuot. Yuda dius jens gas nyang tsungh toh dah zvbiq nwis nghuot. Nyang gas nyamoq gis zis kuot das yvlyis nghamhloms laus eq hauh gungsthaiq nyamoq dius sat. Nyamoq jus zis kuot das yvlyis nghamhloms laus eq nyamoq yah gyvzaiq gyvnang kuot bang gas lyi jus cho xiklyis tsain ngaus.

⁸Namoq dyoqbis goeus! Yoh joq goeus yvmas yhen eq yos eq tsain wis lhungh. Ma nyangh lyis gohyuk nyeis das joqyos ma bos lo las hauh mau mas namoq nyang kyingh dvnyeis lo das.

⁹Maukhung Jesphung YHENSAIN taiq yvlyis ngos xauhgyo zis gas, Hai kuh las yungh dah yhen dvnganh gas yhen som dvnghuot lo shoq dyoqbis das.

¹⁰Zvbiq khyam oeng eka mas zvbiq oeng galan xiklyis dvxauh yhomh nhang das. Jyo nyau dvci luh mas dvluh dvxauh yhomh das.

¹¹Nvng dyoqbis goeus! Nvpsangh noq yah toq las yhei shuk xi, nyens gonh yhei yhet nyeis.

¹²Namoq pwe mha toenk, khvlhank, janghau yahge zvbiq daq bos. Nghuot laus eq YHENSAIN cha kuot nyeis yvlyis namoq ma seqgyo.

¹³Housoeh yvmvyah namoq gas jonsdoeus loh das. Namoq dah uhshe bang gas yuot shei das, dius laiq jens gas shet shei das.

¹⁴Shei mau gas nyamoq lyis zo mes las yuot nyeis yvmvyah nyah nhuot lvm lvm haq toh. Hauh zis gas Yerusalem mas dah zau jens yah dvgeh hoeu dah diuslaiq moqphung lhyi thonh khyoq.

¹⁵Yuk khanghmuh xoqphuh das, khwank bang dvnganh nyhen mha khyoq zis xauh das.

¹⁶Nghuot laus eq Maukhung Jesphung YHENSAIN ka jus yvlyis kuot zis yah nyah kuhxing cho chixoeuq; nyah dius jens lyis soetuon zis yah nyah gyingshang cho chixoeuq.

¹⁷Wus dyoqbis joq uhlyis yvnglo jens gas mhanh zo las shvbeq lo jens gas katjang nyvng das.

¹⁸Namoq gas dyoqbis goeus! Namoq gas namoq nyang dah yaunos lyis wons yenh.

¹⁹Namoq taiq zis gas, YHENSAIN ka nyang kuot das ge dah muh lyis lvnyap kuot bas jungh. Housoeh lyis yang yoh nyvng das. Israel dah gyingshang Mangso nyang nghamh toh zis kuot bas jungh, nyah uhnuk mas cha nghamh zis yoeuh goh, ge.

²⁰Namoq dyoqbis goeus! Namoq gas ma gis yvlyis gis, gis yvlyis ma gis ge. Bvng yvlyis chuot, chuot yvlyis bvng yvpheh lhaiq kat. Chau yvlyis khoh, khoh yvlyis vchau kuot.

²¹Namoq dyoqbis goeus! Namoq gas, Ngos joeui bos, ngos svsoh yik ge nghamh zo.

²²Namoq dyoqbis goeus. Namoq gas yhei pauhzoe, yhei phau shuk uhlyis ma gyuk, tsain womh.

²³Khauwhot gas yobos bos bang lyis luiq loh nhang, yobos ma bos soeu xiklyis lyi jus cho peq tyamp.

²⁴Namoq Maukhung Jesphung YHENSAIN, Israel dah Gyingshang Mangso yang lyis jyauh yvlyis peq yvmvyah, nyi gas huhyau yahge nyoqkyuk lyis ngeh jom teh, namoq vnyet gas yom las namoq dah vbuh kyuk las muot dang loh das.

²⁵YHENSAIN ka nyah dius lyis nhaiqyo zis yah nyah loq lvm lha nyamoq lyis yobos dyei bah ge. Boms jens nonh das. Nyamoq dah mvng gas talhoeu mha mhotkhyot teh zungs joq. Nghuot laus eq Mangso dah nhaiqyo ma bi, joeng das zis nyah loq dvtuonh toh shih.

²⁶YHENSAIN ka we mau mas dius nyau lyis khi das xiklyis vlho dyei. Nyeisjvng vthang mha bang lyis los aq ge uk las, nyamoq lvnyap jweh los.

²⁷Nyamoq mas hank eq ma nyung, khyeiuh hank ma thungh, yhet mes soeu, yhet soeu hank ma bos, dyichih dvkoeuq eq ma buis, thyvkoq twih eq ma dyet.

²⁸Nyamoq nyo tsain zuk, lyei eq thung toh: nyamoq dah nyang jens dah khyeikhu ka nyibvt luk teh than, nyamoq jes lhyingh gas lyeis lhain lhain nyeis teh nghuot.

²⁹Jeslo jens hoeu thwe ka khangkhyi jens shoh dvdoeu lyis khat las nyamoq jyank masyah hank ma yoh yoeus das joqyos mas she loh dah thwe teh nghuot.

³⁰Hauh buisnyeis jweh lyis nyamoq gas Israel thoq mas thomh nyings huomh toh thwe teh hoeu das. Haih mau lyis yoeuh geh! Chuot cho yahge chiqjyen cho! Bvng yvlyis chuot zis yah nyhau tyamp goeus.