Read Achang ESAIA 51 Bible Online

ESAIA 51 - Achang bible

ESAIA 51

¹YHENSAIN taiq, Khyuot yoeus cho xauh mes bang eh, Ngos lyis pangh cho los sang bang eh, ngah dang gyo geh. Namoq thuq los dah luk yahge namoq lyis thyet yoeus dah luk dwang lyis yoeuh geh.

²Namoq yaus lyih dah namoq phauh thyeih Abraham yahge Sara lyis yoeuh geh. Ngos Abraham lyis lui uhlyis nyang lo ma bos. Nghuot laus eq ngos nyang lyis shvmanh dyei las nyang lo bos. Nyah dius jangh caiq lyis nyoshoq jebais los nhang.

³Ngos Yerusalem yahge houmha nyeis bang dvnganh lyis nhaiqnyen cho chixoeuq das. Doeuh tyamp toh dah nyah maunyeis lyis eq ngos tsungh toh dah Eden khyam teh, doms kuot das. Houmha gauslaus cho yahge gausyis cho bos das. Ngos lyis nhaiqshoqlang ge chungh dah chunghthwe tsain kat das.

⁴Ngah dius jens eh, ngah dang gyo geh. Ngos cha taiq zis gyo geh. Ngos dius nyau jens lyis jyauh cho dyei. Ngah lyi gas nyamoq jyank mas bvng zis chi los dyei das.

⁵Ngos lvnyap los las nyamoq lyis khyuot yoeus das. Ngos ung cho yoh das shishenh ni goeus. Dius nyau jens lyis ngos nyang guon das. We mau mas bang ngos los das zis langh nyeis. Nyamoq lyis khyuot yoeus bas jungh ge nghamhloms zis yah ngos lyis langh nyeis.

⁶Maukhung lhyi nghank yoeuh aq, nyeisjvng lyis gop yoeuh aq: maukhung ka nyikhauh teh dyuk loh das. Nyeisjvng gas mistyang seh teh tyang das. Houmha nyeis bang gas yvngkhungh teh shei das. Nghuot laus eq ngos chi los das khyuot yoeus cho ka vcaiq vto joq das. Thang thank gas ngah ung cho nghuot.

⁷Ngos jyauh cho lhyi nhaiqlom mas nghamh suon yoeuh las jus cho cha nghuot yvlyis seq bang eh, ngah dang gyo geh. Dius jens namoq lyis goessang lha ma phauh gis kuot cho lhyi vgyuk goh.

⁸Nyamoq gas dyimis lyis naus zo teh dyoq tyamp das. Nghuot laus eq ngos chi los dah khyuot yoeus cho ka vcaiq vto goeng joq das. Ngah dah ung cho eq vcaiq caiq joq.

⁹YHENSAIN eh, toq las ngamoq lyis bos pangh aq! Gohlhain nvng kuot khoq teh nah yomsoq yhung lha ngamoq lyis khyuot yoeus aq. Jeis dam Rahab lyis vchink chink jap chink soeu ka nvng nghuot.

¹⁰Thomh lyis jeis kanh nhang lha cho kuot zis yah khyuot yoeus zis xauh bang lyis yoh lai loh nhang zis eq nvng nghuot.

¹¹Nvng khyuot lhuiq kat zis xauh bang gas gausyis zis yah Yerusalem mas jweh las gauslaus zis yah chunghthwe kaiq kat das. Nyamoq vjangh pyo das. Kuk cho mhayah vcaiq vto luiq das.

¹²YHENSAIN taiq: Ngos gas namoq lyis yomdyei nyeis soeu nghuot. Mhanh thoq lyis ma zes kham, seq shei dah cangsoeu dius lyis nvng chamus gyuk nyeis lah?

¹³Maukhung lhyi lhywa, nyeisjvng vpom kuot soeu, nvng lyis gvnkhanh YHENSAIN lhyi nvng tohnyhik goeus lhyeh? Nvng lyis zaiq bang dah nhaiqlom dyis zis, nvng lyis mhont das zis cicont nghuot bang lyis chamus vjangh gyuk nyeis goh lah? Nyamoq dah nhaiqlom dyis zis nvng lyis ma los yoh tanh.

¹⁴Thung lungh bang ma nyangh lyis luiq los das. Nyamoq chah dah wom jeis dvnganh yoh das las nyamoq thung mha ma shei das.

¹⁵Ngos gas YHENSAIN, namoq dah Mangso nghuot. Ngos thomh lyis zes nhau lha jeisphauq toq nhang. Ngah nyings Maukhung Jesphung YHENSAIN nghuot.

¹⁶Maukhung lhyi lhywa, nyeisjvng vpom kuot toh. Ngos gas Yerusalem lyis, Nvng ngah dius jens nghuot! Ngos nvng lyis ngah jyauh cho dyei goeus. Ngah loq yah nvng lyis gos toh.

¹⁷Yerusalem eh, soh los aq, toq los aq! YHENSAIN nhaiqyo las shuk nhang, joeng dah kom lhyi shuk goeus. Nvng hauh zis shuk las vtyi vkamh bweh goeus.

¹⁸Nvng lyis choshe das soeu hank ma bos. Nah dius jens mas nvng lyis nah loq lyis yah she das soeu dvyuk eq ma bos.

¹⁹Nah thoq mas thyoqpi cho aiq huon jweh los. Nah maunyeis gas jeszan zis yah jyamhjyuklhyuk mus loh. Nah dius jens mas phanghkhauq gyoh goeus. Nvng lyis hank eq nhaiqnyen cho ma chixoeuq.

²⁰Talhoeu khanghmuh dah chothunk mas nah dius jens yomnhuk las lains phanh nyeis. Nyamoq gas shoh khat soeu dah twih khyoq yvmas nyih dah cvt teh nghuot. Nyamoq gas Mangso dah nhaiqlom tsoeu zis xauh kham goeus.

²¹Yerusalem mas dah shanghsenh xauh bang eh, shuk yet bang teh vtyi vkamh nghuot bang eh,

²²YHENSAIN, namoq dah Mangso namoq lyis khomp las taiq, Ngos nhaiqyo zis yah namoq lyis dyei dah kom yoeus tyamp goeus. Ngos namoq lyis shuk nhang dah zvbiq namoq ma shuk lo noh das.

²³Ngos hauh zis namoq lyis zaiq bang lyis dyei das. Talhoeu mha namoq lyis lains nhang lha phvlhau lhyi teh nang loh bang lyis dyei das.