Read Achang ESAIA 52 Bible Online

ESAIA 52 - Achang bible

ESAIA 52

¹Yerusalem gas yombos las doms kuhxing das! Mangso dah gyingshang wus eh, shoenkkhyi yah wuot toh aq. Mangso lhyi ma seq bang nah khyam khomh mas khanhamp eq ma doms wvng das.

²Yerusalem eh, nah gungs lyis ko tyamp aq. Phvlhau mhayah toq las nah hwankti tank mas tsung aq. Jonsdoeus dah Zion dius jens eh, nvng lyis twih dah shamjvng phui tyamp aq.

³Yomzains YHENSAIN nyah dius jens lyis heisoeh ge: Namoq jonsdoeus loh lyis ngwis ma dyei zis yah dvyhangteh namoq doms luiq das nyhenshang ngwis ma gyoh noh.

⁴Namoq Egutu mas boengh e duot nyeis das xiklyis vsainnyang ehnyet yah loh. Nghuot laus eq Asiria jens gas nyamoq xiklyis chah phauh ma dyei tsoengh shwih loh.

⁵Babilon mas eq houyah dvyhangteh bweh. Namoq jonsdoeus loh, namoq xiklyis cha ma dyei. Namoq lyis guon bang gas moengs, khwank zis yah ngos lyis vjangh loeusmus soqzo.

⁶Jweh los das shishenh lyis ngos Mangso nghuot las ngos namoq cha bweh das zis taiq cho lhyi namoq yoh seq das.

⁷Boms jens lyis lai las loeus gis, nyenstap loeus wons los dah khyei ka kha iq yungh joq lah! Nyang gas Khyuot yoeus cho lhyi taiq hoeuh zis yah Zion lhyi taiq zis gas, Nah Mangso ka Hwankti nghuot, ge.

⁸Wus zungh bang kaiq, Gaus zis yah dvgeh tsain kaiq. Zion pheh YHENSAIN tauh los yvlyis nyamoq nyang nyoqjeih yah yoh tsain nyvng.

⁹Yerusalem mas dah jyamhjyuklhyuk joqyos jens eh, gauslaus zis yah kaiq geh: YHENSAIN ka nyah wus lyis khyuot las nyah dius jens lyis nhaiqtaink goeus.

¹⁰YHENSAIN ka nyah gyingshang yomsoq lyis yhung das. Nyang nyah dius jens lyis khyuot yoeus das las hauh yvlyis mungkvn gonh nyvng das.

¹¹Yhenmuh vyhang dvng bang dvnganh eh, Babilon masyah thuq das cho sont geh. Tung toh vyhang lhyi vzangh tanh goh. Namoq nyang gungs gyingshang nhang lha thuq geh.

¹²Haq lhain ka namoq gyen gyen thuq das zis ma nghuot. Phang teh eq ma thuq: YHENSAIN, nah Mangso namoq lyis shot khanghmuh mas gos las cho she das.

¹³YHENSAIN taiq, Ngah jyeidwis gas nyah muh mas ung los das. Nyang nyhang nyhang chunghtoq zis xauh das.

¹⁴Dius nyoshoq nyang lyis nyvng lyis svsoh dvn. Nyang gas dius teh ma doeus lo shoq gungskhyank dyoq.

¹⁵Nghuot laus eq gvshih dius nyau jens nyoshoq nyang lyis tsain mauh. Hwankti jens eq mauh las dang ma yoh taiq lo das. Nyamoq nyvng las khanhamp eq ma seq ku dah seqgyo cho bos los.