Read Achang ESAIA 53 Bible Online

ESAIA 53 - Achang bible

ESAIA 53

¹Dius jens phuk taiq zis gas, Ngamoq loeus lyis hank lomsjingh lah? Haih yvmas YHENSAIN dah loq hank lyis chixoeuq ku lah?

²YHENSAIN dah jyeidwis jens gas nyeis gyih yos mas vnyet chent dah vzains teh kuh los das zis gas nyang o cho nghuot. Nyang gas shop shop ma nghuot, ma yungh las yoeuh phoh ma duot. Nyang mas yoeuh mes phoh zis cha ma bos.

³Yang nyang lyis diusngis khyoq las peq. Nyang gas nos cho yahge shanghsenh cho lhyi kham. Nyang lyis hank ma yoeuh - yang eq nyang cha ma nghuot soeu lhyi teh chaxwe ma nhang.

⁴Nghuot laus eq nyang, yah shanghsenh kham tyamp dyei. Yah noslom wons tyamp dyei laus eq yang gas, Nyang lyis Mangso yah bat las shanghsenh zis xauh, oen nghamh.

⁵Yah yaunos gvng mas nyang dvmdap. Yang ma gis zis kuot gvng mas nyang bat zis xauh. Nyang yobos dyei dah shanghsenh kham gvng mas yang gis los. Nyang xauh kham dah chwiq cho gvng mas yang gis los.

⁶Yang dvnganh gas yvng teh chowhang loh goeus. Yuk khanghmuh vsainnyang cho pheh loh. YHENSAIN ka yang kham vvng dah joeng cho dvnganh nyah thoq mas kih dyei.

⁷Nyang gas zaiq zis xauh las shanghsenh laus eq nyang nyah nhuot ma haq. Sat das zis she loh yvnglo teh, yvng mauh gom soeu xikkhonh mas taih toh yvng teh, nyang nyah nhuot ma haq.

⁸Nyang lyis nyhik las soetuon zis yah shei nhang das zis shwih thuq loh. Nyah cho lhyi hank ma nghamh dyei. Nyang gas yah dius jens dah yaunos xiklyis sat zis xauh goeus.

⁹Nyang khanhamp eq dius sat cho ma kuot. Nyah nhuot mas mhuih dang ma bos laus eq, nyang lyis lhung bang yah dvgeh lop kuot toh. Nyang dis soeu yah dvgeh nyhop zis xauh.

¹⁰YHENSAIN taiq zis gas, Nyang shanghsenh das zis ngos o cho nghuot. Nyang shei zis gas yobos khyuot jyungshuk phudyei zis nghuot. Housoeh nyang nyah vnyau vshih nyvng das, kang eq xing das las nyang masyah ngos nghamh toeuq cho ung los das.

¹¹Nyang shanghsenh kham thang lhyi doms gauslaus das. Nyang shanghsenh cho ka vkom ma nghuot yvlyis nyang seq. Ngos nhaiqdoeus dah ngah jyeidwis, nyoshoq moq xiklyis joeng cho kham yoeus. Nyah gvng mas ngos nyamoq dah yobos khyuot dyei das.

¹²Ma gis bang dah xiklyis nyah kang lhyi dyei tyamp mes zis yah dyei. Nyang yaunos wons bang nyoshoq dah yaunos kham wons tyamp dyei zis yah nyamoq yobos khyuot zis xauh bas jungh ge shvmanh dung. Housoeh las ngos nyang lyis kuhxing lha yomsoq bos bang mas chunghtoq das.