Read Achang ESAIA 54 Bible Online

ESAIA 54 - Achang bible

ESAIA 54

¹Yerusalem eh, nvng gas lo ma bos dah vmesbih teh nghuot ku. Nghuot laus eq gvshih gas nvng gauslaus zis yah chunghthwe yoh kat. Gvshih nvng gas yhensain phoq yah ma gang dah vmesbih thoq lyis lo jens zes yoh das.

²Nvng nyeis dah zvng jyeq kat aq. Twih chent kat aq, jywangh jens lyis goeng nhang aq.

³Nvng shot khanghmuh maukyo jyeq kat aq. Gvshih gohtoeu dius nyau jens dyingh joq dah mau mas nah dius jens tauh jweh los das. Gvshih jyamhjyuklhyuk mus joq dah wus jens mas nyeis dius dyingh das.

⁴Vchiq, nvng xoq ma doms phuh lo das. Nyhen mha khyoq zis eq ma xauh lo das. Nyenhkyi ngis, lom maluk dah yhensain nyhiq lyis tohnyhik teh, chauhmuh dah nhaiqngis cho lhyi tohnyhik teh nvng eq hau dvnganh yvlyis yoh tohnyhik das.

⁵Nvng lyis gvnkhanh soeu ka nah yhensain phoq teh nghuot das. Nyah nyings Maukhung Jesphung YHENSAIN nghuot. Israel dah gyingshang Mangso ka nvng lyis khyuot yoeus das. Nyang gas mungkvn gonh dah guon soeu nghuot.

⁶Israel eh, nvng gas yhensain phoq yah tyamp toh zis xauh las nhaiqkuk dah nyelo teh nhaiqkuk nhaiqngis zis xauh. Nghuot laus eq YHENSAIN nvng lyis nyah jyank mas doms lui yoeus las taiq:

⁷Ngos nvng lyis dvsoq tyamp toh laus eq jyetdap ehnyet zainsmuh yah nvng lyis doms shwih yoeus das.

⁸Ngos nhaiqyo las nah jyank masyah dvsoq tauh loh. Nghuot laus eq ngos nvng lyis ngah jyetdap cho vcaiq vto chixoeuq das, ge nvng lyis khyuot yoeus soeu YHENSAIN taiq.

⁹Ngos Noa zaih lyis nyeisjvng lyis dvjeis khanhamp eq ma doms lhyi lo oen dangthoengh toh. Gvshih ngos nvng lyis nhaiq ma yo lo das oen dangthoengh toh. Dvm dyei jwangh cho eq ma kuot lo das.

¹⁰Bausdoms jingkank jens gas gwi loh das laus eq ngos nvng lyis jyet cho ka khanhamp eq ma thank loh das. Ngah nyenstap dangthoengh lyis vjangh gomh nyeis das, ge nvng lyis jyetdap dah YHENSAIN taiq.

¹¹YHENSAIN taiq, Yerusalem eh, nvng vshoh vjyen xauh dah wus nghuot. Nvng lyis nhaiq hank ma taink. Ngos nah yhenpom lhyi phauhdap luk yah doms ci das.

¹²Ngos nah tyoeuqzvm jens lyis luknes ci das. Nah khyam khomh lyis nyi soeh bvng dah luk yah kuot das. Nah vyvm mas dah wusciank lyis phauhdap luk yah kuot das.

¹³Nah dius jens lyis ngvnyang jyauh das. Nyamoq lyis nyeisgis yaplhoq cho yahge nyenstap cho dyei das.

¹⁴Lyi jus cho yahge jus cho ka nvng lyis yombos nhang lha nvng gas zaiq cho yahge gyuk dvn cho mhayah luiq das.

¹⁵Ngos ma bauh zis nvng lyis thyoq soeu yahge zan soeu lains das.

¹⁶Nyikhyomp kuot las kyonhkhyi bat dah thyeq shonh soeu lhyi ngos gvnkhanh toh. Hau kyonhkhyi yhung lha sat dah jeslo lyis eq ngos gvnkhanh toh.

¹⁷Nghuot laus eq nvng lyis chah kyonhkhyi yah eq ma yoh nos nhang. Nvng lyis kauq bang dvnganh lyis nvng phuk dang dyei chah. Ngos ngah jyeidwis jens lyis khomp las ung cho dyei das, ge YHENSAIN taiq goeus.