Read Achang ESAIA 55 Bible Online

ESAIA 55 - Achang bible

ESAIA 55

¹YHENSAIN taiq, Jeis shet bang dvnganhmoq eh, jeis joq yvmas los geh. Ngwis ma yoh bang eh, wom los wis zo geh! Phauh ma gyoh zvbiq yahge nauh los wis shuk geh.

²Nhaiq ma tap yvmas chamus ngwis yhung? Nah uhkung phauh yhung lha chamus yuot nyeis shih? Ngah dang gyo las gis zis kuot geh. Housoeh lyis namoq gis thank zonoms xauh zo das.

³Ngah dius jens eh, gvshih kamp gyo las ngah jyank los geh. Namoq ngah jyank los lyis kang yoh das. Ngos namoq yah vcaiq vto thanghchvp toh das. Dawi lyis toh dah dangthoengh ngos namoq lyis shvmanh dyei das.

⁴Ngos nyang lyis dius nyau jens dah uhshe soeu yahge zau kuot nhang toh. Nyang masyah ngos ngah yomsoq chixoeuq.

⁵Gvshih nvng gohnyau bang lyis khi tsainh das. Nyamoq xikpheh nvng lyis ma seq, nghuot laus eq gvshih nyamoq wuih los las nvng yah tsoq goh das! Hai dvnganh lyis ngos YHENSAIN, nah Mangso, Israel dah Gyingshang Mangso kuot das. Ngos namoq lyis phunk yahge nyoqnho ngelang dyei das, ge.

⁶Gvshih YHENSAIN ni nyeis uhlyis nyang lyis xo geh. Nyah jyank pheh xoeu lha shvmanh dung geh.

⁷Lhung bang gas nyamoq dah kang dwis cho toh khoq las nyamoq dah nghamh cho thaiq bas jungh. Ngamoq dah YHENSAIN Mangso jyank pheh tauh los bas jungh. Housoeh lyis nyang nhaiqnyen las yobos khyuot dyei das.

⁸Ngos nghamh cho ka namoq nghamh teh ma nghuot. Ngah cho eq namoq yah shaih, ge YHENSAIN taiq.

⁹Maukhung ka nyeisjvng thoq lyis nyhang teh, ngah cho yahge ngos nghamh zis gas namoq thoq lyis zes nyhang.

¹⁰Ngah dang gas nyeisjvng lyis jyweq nhang das xiklyis maukhung mhayah gyoh dah gyu yahge mau yah doeusgoh. Hauh gyu yahge mau gas jyo yuk los las khyoq das jyo nyau, zo das wom thuq los nhang.

¹¹Housoeh las ngos taiq dang eq bweh los das. Ngos nghamh toeuq zis ma dyoq loh das. Ngos kuot nhang zis dvnganh ung los das.

¹²Namoq lyis Babilon wus masyah nyenstap zis yah shwih las gausyis zis yah thuq los das. Boms jens jing jens chunghthwe kat los das, saiqzains jens dvnganh eq gaus las kaiq das.

¹³Gvshih zoeu zains yuk yvmas xoeuh zains yuk das. Zoeugyomh nghuot yvmas jangnai zains yuk das. Houka ngos YHENSAIN kuot goeus cho taiq kyingh dah vcaiq vto goeng dah vlho duot das, ge.