Read Achang ESAIA 56 Bible Online

ESAIA 56 - Achang bible

ESAIA 56

¹YHENSAIN nyah dius jens lyis taiq, Ma nyangh lyis ngos namoq lyis khyuot yoeus das las lyi jus cho yahge jus cho kuot geh. Namoq ma nyangh lyis ngah dan cho nyvng das.

²No nyeih lyis vjangh comh las ma jus khyvlyis ma yhung soeu lhyi ngos shvmanh das. Ma gis cho cha ma kuot bang lyis ngos shvmanh das.

³YHENSAIN dah dius jens yah tsoq dah lvbaus gas, YHENSAIN ngos lyis nyah dius jens yah dvgeh ma paiq nhang oen ma gis sang. Shan dah vbusbih eq, Ngos gas lo ma bos yvmvyah Mangso dah dius jens mas ma yoh bos oen ma gis nghamh.

⁴Houteh vbusbih lyis YHENSAIN heisoeh ge. No nyeih lyis vlhomuh comh zis yah ngos lyis nyoqnho ngelang dyei lyis, ngos nhaiqdoeus zis cha nghuot yvlyis chank kuot las ngah thanghchvp lyis lomluk luk chank nghuot lyis gas,

⁵nvng lo jens yoh thoq lyis zes las nah nyings lyis ngah yhenmuh mas yahge ngah dius jens mas soh nyeis das. Nvng lyis khanhamp eq ma tohnyhik das.

⁶Nyah dius jens bweh los dah lvbaus, nyang lyis jyet zis yah nyang lyis phuqsoe bang, no nyeih lyis comh las nyah thanghchvp lyis lomluk luk chank tyink bang lyis YHENSAIN taiq,

⁷Ngos namoq lyis ngah gyingshang jing, Zion mha shwih loh das. Ngah shvmanh dung yhen mha gauslaus nhang das. Nvng ngah phon mha ngheq dyei dah phudyei jyungshuk lyis lhom yoeus dyei das. Ngah yhenmuh lyis dius nyau jens dvnganh dah shvmanh dung yhen ge lui das.

⁸Nyah dius jens Israel lyis jonsdoeus masyah yhen pheh shwih los dah Yomzains YHENSAIN ka nyamoq yah tsoq das zis gohtoeu dius jens lyis eq shwih los shih das ge dangthoengh toh.

⁹YHENSAIN ka gohnyau bang lyis yewus jens teh los las nyah dius jens lyis nyhau tyamp das xiklyis taiq.

¹⁰Nyang taiq, Ngah dius jens lyis zaih nhang chah dah uhshe bang dvnganh gas nyoqjet, nyamoq cha ma seq. Nyamoq gas ma gyap dah yhen zungh khuih jens yah doeusgoh. Nyamoq lhain lha yhet das zis kha iq ngwis!

¹¹Nyamoq gas nyoqnoq las khanhamp eq ma tham dah lvkhuih jens teh nghuot. Haih uhshe bang gas seqgyo cho ma bos. Nyamoq yuk khanghmuh gas nyamoq nyang o khyvlyis kuot, vsainnyang vkyuh dvxo.

¹²Haih yhei pauhzoe jens gas, zvbiq chi los goh, yoh shuk nyhoq tsain shuk goh! Nvpyo gas khvnyhik thoq lyis yangh zes gis das, ge.