Read Achang ESAIA 57 Bible Online

ESAIA 57 - Achang bible

ESAIA 57

¹Dius gis jens shei lhyi hank ma seqgyo dyei, hank chaxwe ma nhang. Nghuot laus eq nyamoq shei lhyi shanghsenh cho nyamoq lyis ma yoh zangh.

²Gis khyvlyis kang dwis bang gas nyenstap dah kang dwis cho yoh las shei yvmas yoh no nyeis.

³Yaunos dap bang eh, soetuon zis xauh das nyhenshang heimha los geh. Namoq gas jonzwi bang, nyi shuot lvng shuot bang yahge nghe nyhiq jens thoq lyis ma zes gis.

⁴Namoq gas hwah bang tsain nghuot.

⁵Namoq dah gyingshang saiqzains khyei mha nye-yukgis zomhgoh zis yah mangso lhyi tsain paiq. Jeislo lvng nvm mas dah luk khyung mha namoq dah loshang jens lyis lomhxangh kuot las phudyei.

⁶Houmha dah luk jyuot dvkhamh yoeus las mangso lhyi teh tsain paiq. Hauh thoq mas zvbiq huot kat las jyungshuk kuot. Zonoms jyungshuk eq chi los. Ngos hauh yvlyis nhaiqdoeus das oen nghamh lhyeh?

⁷Namoq lomhxangh lainh das zis yahge nye-yukgis zomhgoh das zis boms nyhang thoq mas doq loh.

⁸Nvng nah ma lhoq dah phvra lyis nah ganthoq khomhthunk mas toh. Nvng ngos lyis tyamp goeus. Nvng nah dyimis khyuot tyamp las nvng jyet soeu, nvng yah yhet das xiklyis lhung toh soeu yah yhetyos lywas mas zomhgoh. Houmha nah nyetnau cho lhyi tyink yoeus.

⁹Nvng gas xangh shom yahge coeu juot las Molek mangso lhyi loh paiq. Nvng gas paiq das mangso jens lyis xo das xiklyis loeuskyoh bang lyis we mas lvm mas, shei mau mas yangh jweh shoq nhang.

¹⁰Nvng gohtoeu mangso jens lyis xo lha nah kang thank loh nhang goeus. Nghuot laus eq nvng khanhamp eq vsomh ma kham. Nah vchoqh vjyot phvra gas nvng lyis yomdyei las nvng khanhamp eq yom ma nhuk ge nghamh.

¹¹YHENSAIN taiq, Nvng lyis gyuk nhang lha ngos lyis hwah zis yah ngos lyis tohnyhik tyamp shoq kuot dah mangso jens gas hank tsain nghuot? Ngos samlo nyeis zis nyo nyangh goeus yvmvyah nvng ngos lyis nyoqnho ngelang dyei cho no toh goeus lhyeh?

¹²Nvng gas nvng kuot cho jus ge nghamh. Nghuot laus eq ngos nah wotwu lyis chixoeuq das, nah phvra jens nvng lyis ma yoh khyuot yoeus das.

¹³Nvng pangh cho dung lyis nah phvra jens nvng lyis khyuot yoeus bas jungh. Lyeis yah muot tangh loh das! Nghuot laus eq ngos lyis loms bang gas hauh mau mas nyeis das las ngah Yhenmuh mas ngos lyis paiq das, ge.

¹⁴YHENSAIN taiq, Ngah dius jens lyis ngah jyank pheh tauh los nhang geh. Nyamoq cho mha pahkai zis dvnganh yoeus tyamp geh! Cho doeu geh, cicont kuot geh!

¹⁵Ngos gas vcaiq vto nyeis, nyhang lha gyingshang dah Mangso nghuot. Ngos gas nyhang lha gyingshang joqyos mas nyeis. Nghuot laus eq ehnyet nyhen mha gyoh las nhaiqlom thaiq bang yah dvgeh nyeis las, nyamoq lyis nghamhnywe cho yahge nghamhloms cho dyei nyeis.

¹⁶Ngos ngah dius jens lyis kang dyei las nyamoq lyis zau ma tsoq kauq lo, nghuot ya vjangh nhaiq ma yo lo das.

¹⁷Ngos nyamoq dah yaunos yahge nyoqnoq gvng mas nhaiqyo las nyamoq lyis joeng zis yah tyamp khoq goeus. Nghuot laus eq nyamoq nhaiqlom than lha nyamoq nyang o yvpheh nungsdoms loh.

¹⁸Ngos nyamoq khasoeh kuot zis nyvng goeus. Nghuot laus eq ngos nyamoq lyis yhoh das, ngos nyamoq lyis cho shwih she lha pangh das, kuk bang lyis nhaiqtaink das.

¹⁹Ngos ni mas we mas bang lyis nyenstap cho dyei das. Ngos ngah dius jens lyis yhoh dyei das, ge.

²⁰Ma gis bang gas jeisphauq toq dah thomh yah doeusgoh. Hauh jeisphauq gas khanhamp eq ma no vchoqh vlhauq jenh she los.

²¹Yaunos wons bang xiklyis nyenstap cho ma bos, ge YHENSAIN taiq.