Read Achang ESAIA 59 Bible Online

ESAIA 59 - Achang bible

ESAIA 59

¹YHENSAIN ka namoq lyis ma yoh khyuot yoeus shoq yomnhuk, namoq pangh das cho sang lhyi ma xauhgyo shoq no jet oen vnghamh goh.

²Namoq dah yaunos gvng mas nyang ma xauhgyo dyei zis dvnghuot. Nvng Mangso lhyi paiq cho mhayah nvng lyis kangh tyamp zis gas nah yaunos gvng mas dvnghuot.

³Namoq gas hwah, thyoqzo cho yahge dius sat dah yobos bos.

⁴Namoq yungh tsung laus eq, nah shot pheh lyi jus cho ma bos, nvng nah soe ung das xiklyis hwah cho mha nges toh. Nvng gohyuk lyis nos nhang das ge nghamh toeuq cho kuot thuq kat.

⁵Namoq kuot dah ma gis khaujeini cho ka shei nhang dah duk bos lhangnyis uq teh nghuot. Hauh uq khwih lyis lhangnyis thuq los. Nghuot laus eq nah khaujeini cho ka nvng lyis gis cho ma bweh los nhang. Houka janghnyholvkhyank yah misseh yoq teh cha ma yoh yhung.

⁷Nvng gas vjangh ma gis zis nghamh toeuq nyeis, nvng hauh yvlyis ma yoh langh nyeis lo kuot. Nvng yobos ma bos bang lyis sat das zis ma sheq toh lo. Nvng khalhye loh khalhye thyoqpi zis yahge dyoqbis zis kyingh nghuot.

⁸Nvng hau vyvm mas nyeis lyis hank eq jes ma luiq. Nvng kuot zis dvnganh lyi ma chi cho dvnghuot. Nvng gas cho guih cho chank goeus, houcho suh bang hank khanhamp eq jes ma luiq das.

⁹Dius jens taiq, Ngamoq lyis zaiq bang masyah Mangso chamus ma khyuot yoeus zis gvshih ngamoq seq goeus. Ngamoq cho suh das zis bvng yvlyis nghamhloms laus eq, chuot zis kyingh dvnghuot joq.

¹⁰Ngamoq nyoqjet bang teh sop yenh. Nyenh lyis teh ngamoq nyeih gungs lyis khyeiuh thungh. Ngamoq gas shei dah mungkvn soeng soeng noq yvmas nyeis bang teh nghuot.

¹¹Ngamoq gas gyuk las chiqjyen. Ngamoq lyis nhiq zaiq cho yahge cu cho mhayah khyuot yoeus das nyhenshang Mangso lhyi langh nyeis laus eq cha ma bweh los.

¹²YHENSAIN eh, ngos nvng lyis tyi lha dius sat muh nyoshoq nghuot goeus. Ngamoq dah yaunos gas ngamoq lyis lhoq yau goeus. Ngamoq hau dvnganh yvlyis soh nyeis.

¹³Ngamoq gas nvng lyis gomloeus toq, nvng lyis peq las nah thang chank das zis ngoek. Ngamoq gohyuk lyis zaiq zis yah nah jyank masyah tauh loh. Ngamoq nghamh cho shuot loh; ngamoq dah dang eq dvhwah.

¹⁴Lyi jus cho ma bos lo las jus cho ka ma yoh jweh los lo. Jyoeng zis eq dius phung mha khyeiuh thungh gus nghuot goeus. Houmha koptoq cho eq xo ma nyvng lo.

¹⁵Dvyuk yuk ma gis cho kuot masyah no las nyang gungs nyang lyi ma chi cho yah zaiq xauh soeu nghuot ge nyvng las topkoq bang nainlo dvnghuot. YHENSAIN hauh cho lhyi nyvng las lyi jus ma bos yvmvyah ehnyet ma pyo.

¹⁶Zaiq zis xauh bang lyis pangh das zis hank eq ma bos zis nyvng las nyang mauh. Housoeh las nyang nyah yomsoq yhung lha nyamoq lyis khyuot kat zis yah ung cho yoh das.

¹⁷Nyang lyi jus cho lhyi jes dyi teh wuot las, khyuot yoeus yomsoq lyis uhkyop soeh kyop toh. Nyang gas vyhang jus khyvlyis toh das zis yahge dius jens xauh kham dah shuot cho lhyi lvto phuk das zis nhaiq wvng zis yah wuot toh das.

¹⁸Nyang gas nyah jeswus lyis nyamoq kuot vgus joeng das. We mau mas tsain nyeis bang lyis yangh joeng das.

¹⁹Buisthuq mas zis buiswvng jweh shoq yuk khanghmuh nyang lyis eq nyah yomsoq lyis eq tsain gyukwoms das. Nyang gas nes than jeislvng teh, lyeis jyang teh jweh los das.

²⁰YHENSAIN nyah dius jens lyis taiq, Ngos Yerusalem mas los las namoq dah yaunos masyah tauh los bang dvnganh lyis khyuot yoeus las khomp toh dyei das.

²¹Ngos nyamoq yah thanghchvp toh. Vcaiq vto namoq zis nghuot das nyhenshang, ngos namoq lyis ngah dyos yahge ngos jyauh cho dyei goeus. Gvshih masyah jweh los das shishenh lyis namoq ngah domsyos gyo las, namoq lo jens yahge namoq vnyau vshih gas ngah domsyos gyo das xiklyis jyauh das, ge.