Read Achang ESAIA 6 Bible Online

ESAIA 6 - Achang bible

ESAIA 6

¹Hwankti Uzia shei zvn lyis ngos YHENSAIN lhyi nyvng. Nyang gas nyhang thank hwankti tank mas tsung toh. Nyah dyixing ka Yhenmuh gonh dyingh joq.

²Nyah yvmlhaink yah Seraphim tsain yap joq, nyamoq dvyuk mas dungs khyuk koeuq koeuq dap. Aiq dungs gas nyah nyoqnho lhyi nghop, aiq dungs gas nyah gungs lyis nghop las aiq dungs yah gas dang.

³Dvyuk yah dvyuk kaiq taiq goh zis gas, Maukhung Jesphung YHENSAIN ka Gyingshang, gyingshang, gyingshang. Mungkvn gas nyah phunk yah dyingh joq, ge.

⁴Nyamoq dah thwe gvng mas Yhenmuh yhenpom nonh los las, hauh Yhenmuh mas nyikhauh dyingh joq.

⁵Ngos taiq, Ngah xiklyis nghamhloms chank ma bos lo! Ngos gas ma lhoq nhuot chi dah dius jens mas nyeis las ngah nhuot masyah chi lai dah dang khanghmuh eq yaunos nghuot yvmvyah, ngos dyoqbis goeus! Khasoeh ge lyis hwankti Maukhung Jesphung YHENSAIN lhyi ngah nyoqjeih yah nyvng goeus, oen.

⁶Hauh thang lhyi Seraphim dvyuk phon mha dah nyvp yah ci yoeus dah nyigywe nyah loq mas chi lha ngah jyank mas dang los.

⁷Nyang hauh nyigywe yah ngah nhuot mha tanh las taiq zis gas, Haih zis yah nah nhuot mas tanh goeus. Nah yobos ma bos lo, nah yaunos khyuot dyei goeus, ge.

⁸Hauh thang lhyi ngos YHENSAIN taiq zis xauhgyo: houka, Ngos hank lyis nhang das? Ngamoq dah lvgyo hank kuot das, ge. Ngos gas, Ngos loh das, ngos lyis nhang aq, oen.

⁹Housoeh las nyang ngos lyis, Dius jens lyis haih loeus loh taiq aq. Namoq gyo laus eq ma daq gyo, yoeuh laus eq cha mus nyeis zis ma nyvng das, oen aq.

¹⁰Hauh thang lhyi nyang ngos lyis taiq zis gas, Haih dius jens nyoq ma nyvng, no eq ma gyo, ehnyet mas eq ma seq gyo bas jungh, nhaiq chuot nhang aq, nyoq jet nhang aq, no jet nhang aq. Ma nghuot lyis gas nyamoq ngah jyank mas lhain los las yhoh dyei zis xauh das. ge.

¹¹Ngos nyei zis gas, YHENSAIN eh, haih zis khanyhank nyangh das, oen lhyi nyang phuk taiq zis gas, wus jens yahge yhen jens mas dius ma nyeis lo shoq mhont tyamp zis xauh las, hauh mau gas jyamhjyuklhyuk shoq, nghuot.

¹²Ngos dius jens lyis we pheh nhang lha, dvmau gonh jyamhjyuklhyuk kuot das.

¹³Hauh mau mas dvci mha dvyuk nyet shih zis yangh mhont tyamp zis xauh das. Hauh soeu ka wons zains lyis thoeuq tyamp dah saiq ngot teh nghuot das. (Hauh saiq ngot gas Mangso dah dius jens xiklyis vsaiq xi cho lhyi taiq.)