Read Achang ESAIA 61 Bible Online

ESAIA 61 - Achang bible

ESAIA 61

¹Yomzains YHENSAIN ka ngos lyis nyah dyos tyink dyei. Nyang ngos lyis khyen lha shohjyen bang lyis Loeus Gis chi los dyei das xiklyis, Ehnyet dyet bang lyis yhoh das xiklyis, jonsdoeus bang lyis luiq cho taiq das xiklyis yahge thung lungh bang lyis phank kat goeus cho taiq das xiklyis nhang kat.

²YHENSAIN nhaiq doeus zvn lyis nyah dius jens lyis khyuot yoeus las nyamoq dah jeswus lyis ung das shishenh jweh los das cho loh taiq hoeuh das xiklyis ngos lyis nhang kat. Nhaiqkuk bang lyis nhaiqtaink das xiklyis Nyang ngos lyis nhang kat.

³Zion wus mas kukxi bang lyis, kukxi gungsthaiq gauslaus cho yahge gausyis cho, kuk dah gungsthaiq chungh dah chunghthwe dyei das xiklyis nhang. Nyamoq gas YHENSAIN nyang tsungh toh dah saiqzains teh nghuot. Nyamoq dvnganh gas jus zis lyis tsain kuot das las Mangso ka nyang kuot goeus cho lhyi chungh das.

⁴Nyamoq gas nyangh lyis yah dyoq joq dah wus jens lyis doms soq das.

⁵Gohmau bang, ngah dius jens nvng lyis phuqsoe das. Nyamoq nah yvng phung lyis dyangh das. Nah maunyeis mas jyo khyoq las nah zvbiq khyam lhyi ba das.

⁶Namoq lyis YHENSAIN dah phudyei bang, yah Mangso dah jyeidwis jens khyvlyis seq das. Dius nyau jens dah zisyos mas pyo das. Hauh zis gas nah zis nghuot gvng mas nvng yoh khwank das.

⁷Nah xoq cho yahge xoqphuh cho ka thank goeus. Nvng nvnyang mau mas nyeis das las nah zisyos gas aiq huon je los das. Nah gauslaus cho ka vcaiq vto goeng joq das.

⁸YHENSAIN taiq, Ngos lyi jus cho lhyi jyet las, zaiq cho yahge dius sat cho lhyi hoeng. Ngos ngah dius jens lyis lomluk luk phauh shangh las nyamoq yah vcaiq vto thanghchvp toh das.

⁹Nyamoq gas dius nyau jens mas nyings hoeuh das. Nyamoq gas ngos shvmanh dyei dah dius jens nghuot yvlyis nyamoq lyis nyvng bang dvnganh seq das.

¹⁰YHENSAIN kuot goeus cho gvng mas Yerusalem gas gauslaus nyeis. Nyang gas phoengh wvng das xiklyis shunk toh dah lonyi saiq teh nghuot. Mangso ka nyang lyis khyuot yoeus cho yahge dan cho gvmhuot toh.

¹¹Shih nyau yuk las kuh los teh Yomzains YHENSAIN ka nyah dius lyis khyuot yoeus das las dius nyau jens dvnganh gas nyang lyis chungh das.