Read Achang ESAIA 62 Bible Online

ESAIA 62 - Achang bible

ESAIA 62

¹Ngos Yerusalem lyis yomdyei cho taiq thuq das. Nyang khyuot yoeus zis xauh shoq ngos samlo ma nyeis das. Nyah dan cho ka nyenh lyis nyiduk teh bvng joq.

²Yerusalem eh, dius nyau jens nah dan cho lhyi nyvng das. Nyamoq dah hwankti jens dvnganh nah phunk lyis nyvng las, nvng lyis YHENSAIN nyang dyei dah nyings saiq yah lui das.

³Nvng gas YHENSAIN xiklyis yungh dah buismuk teh nghuot das.

⁴Nvng lyis, Tyamp zis xauh soeu, nghuot ya nah mau lyis, Jyamhjyuklhyuk nyhiq, ge ma lui lo das. Nah nyings saiq gas, Mangso Nyang lyis nhaiqdoeus, ge das. Nah maunyeis lyis, Gaus zis yah nyihwank, ge nyhink das. Khasoeh ge lyis YHENSAIN nvng lyis nhaiqdoeus las nah mau dah yhensain teh duot das.

⁵Loyvm phoq gas lonyi gyingh lyis nyihwank teh, nvng lyis kuot toh soeu ka nvng yah phoengh wvng das. Loloeu saiq gas lonyi saiq lyis gaus teh nah Mangso nvng lyis gaus das.

⁶Yerusalem eh, ngos nah ciank thoq mas zungh bang toh. Nyamoq gas nyeih nyenh khanhamp eq samlo ma nyeis das. Nyamoq gas YHENSAIN toh dah dangthoengh lyis soh nhang lha nyang lyis khanhamp eq ma tohnyhik nhang.

⁷Nyamoq gas nyang Yerusalem lyis doms toeu lha, wus doms kuot zis yah mungkvn gonh chungh shoq nyang lyis ma no nhang.

⁸YHENSAIN ka, Ngos namoq jyo lhyi namoq dah jeswus zonoms ma bweh nhang lo das. Namoq dah zvbiq lyis eq lvbaus lyis ma shuk nhang lo das ge maukhi lha dangthoengh toh. Nyang hauh yvlyis nyah yomsoq yah kuot das.

⁹Nghuot laus eq namoq gas jyo khyoq thang lhyi jyo yhomh las zos zo zis yah YHENSAIN lhyi chungh. Namoq zvbiq nwis lyis dyangh kat, zvbiq shih yhomh las ngah Yhenmuh mas zvbiq shuk das, ge.

¹⁰Yerusalem dius jens eh, wus masyah thuq las tauh los nyeis dah nah dius jens xiklyis cho kuot geh! Chomuh sont geh! Lukzains yoeus tyamp geh, dius nyau jens seq das xiklyis khyiq lhangh geh!

¹¹YHENSAIN ka nyeisjvng goms shoq taiq hoeuh. YHENSAIN ka nvng lyis khyuot yoeus das xiklyis los nyeis oen Yerusalem dius jens lyis taiq kyoh geh. Nyang gas nyang khyuot kat dah dius jens shwih las los.

¹²Nyamoq lyis, Mangso dah Gyingshang dius jens, YHENSAIN khyuot zis xauh bang ge lui das. Yerusalem lyis gas, Mangso jyet dah wus, Mangso ma tyamp dah wus, ge lui das.