Read Achang ESAIA 63 Bible Online

ESAIA 63 - Achang bible

ESAIA 63

¹Edom mau Bozra wus masyah hai los nyeis soeu hank nghuot? Dyi nes shunk las yomsoq yah yombos bos jens los[11] nyeis zis hank? Heika khyuot yoeus yomsoq bos YHENSAIN nghuot. Nyang hai nyah dan cho hoeuh das xiklyis los nyeis.

²Zvbiq kuot das xiklyis zvbiq shih nang soeu dah dyimis teh, nyah dyimis hou iq chamus nes?

³YHENSAIN phuk taiq. Ngos dius nyau jens lyis zvbiq shih lyis teh nang goeus. Ngos lyis hank ma los bos pangh. Ngos nyamoq lyis nhaiqyo zis yah nang las nyamoq dah suih ngah dyimis mas dap.

⁴Ngos ngah dius jens lyis khyuot yoeus das shishenh jweh goeus oen nghamh thyet. Heika nyamoq dah jeswus jens lyis joeng dah shishenh nghuot.

⁵Ngos yoeuh lyis, houmha ngos lyis pangh das soeu hank ma bos las ngos mauh. Nghuot laus eq ngah nhaiqyo cho ka ngos lyis yombos nhang lha ngos khyuot yoeus cho yoh.

⁶Ngos nhaiqyo zis yah dius nyau gonh lyis nang nheh las thyoqpi tyamp goeus. Ngos nyamoq dah suih lyis nyeisjvng mas huot goeus.

⁷Ngos YHENSAIN dah mathank magons jyetdap cho lhyi taiq das. Nyang ngamoq nyhenshang kuot dyei cho dvnganh xiklyis ngos nyang lyis chungh. Nyah nhaiqnyen cho yahge jyetdap sainhnos cho gvng mas nyang Israel dius jens lyis magons magoh shvmanh dyei goeus.

⁸YHENSAIN taiq, Nyamoq ngah dius jens nghuot las nyamoq ngos lyis ma mhuih jyomh das. Housoeh las nyang nyamoq lyis

⁹nyamoq dah shanghsenh dvnganh masyah khyuot yoeus. Houka loeuswons soeu ma nghuot, nyamoq lyis khyuot yoeus zis gas YHENSAIN nyang dvnghuot. Nyah jyetdap zis yahge nhaiqnyen shohgyo zis yah nyang nyamoq lyis khyuot kat. Lai loh goeus yoq lyis nyang vjangh nyamoq lyis gomh los.

¹⁰Nghuot laus eq nyamoq gas gomloeus toq las nyah gyingshang Dyos lyis nhaiqkuk nhang. Housoeh las YHENSAIN ka nyamoq dah jeswus duot las nyamoq lyis zan.

¹¹Nyamoq[12] gas lai loh goeus YHENSAIN dah jyeidwis Moshe dah buisnyeis lyis soh las tsain nyei zis gas, Thomh masyah nyah dius jens dah uhshe bang lyis khyuot yoeus soeu hauh YHENSAIN gvshih khalhye gah? Moshe lhyi nyah dyos kat dyei soeu hauh YHENSAIN khalhye nyeis?

¹²Nyah yomsoq yah kuhxing cho Moshe lhyi yah kuot nhang lha thomh jeis nauh yvlyis kangh las nyah dius jens lyis shwih los zis yah vcaiq vto nyah nyings hoeuh nhang dah YHENSAIN ka khalhye nyeis? YHENSAIN yah shwih las nyamoq dah khyei ka ye nyang jens dah khyei teh goeng las khanhamp eq ma thungh lains.

¹⁴Noeu jens lyis jenh bos langhkhau mas shwih loh teh, YHENSAIN ka nyah dius jens lyis noyos dyei.

¹⁵YHENSAIN eh, gyingshang lha phunk bos, nvng nyeis joqyos maukhung mhayah yoeuh kat aq. Nvng ngamoq xiklyis nhaiq wvng cho ka khalhye gah? Nah yomsoq khalhye gah? Nah jyetdap cho yahge nhaiqnyen cho khalhye gah? Ngamoq lyis vyoeuh lhaiq toh.

¹⁶Nvng gas ngamoq dah uwus nghuot. Ngamoq dah phauh thyeih moq Abraham, Yakop ngamoq lyis ma seq, nghuot laus eq nvng YHENSAIN ka vjangh ngamoq lyis khyuot kat soeu, ngamoq dah uwus nghuot.

¹⁷Nvng ngamoq lyis nah cho mhayah chamus whang loh nhang? Nvng ngamoq lyis nah jyank masyah tauh loh shoq chamus ehnyet than nhang? Nvng lyis phuqsoe bang gvng mas, khanhamp eq nah dius nghuot nyeis bang gvng mas tauh los aq.

¹⁸Nah gyingshang dius jens ngamoq gas ngamoq dah jeswus yah dvsoq khat thuq tyamp zis xauh. Nyamoq nah gyingshang joqyos lyis nang nheh loh.

¹⁹Nvng ngamoq lyis guon soeu ma nghuot ku teh kuot, ngamoq nah dius ma nghuot ku teh kuot goeus.