Read Achang ESAIA 64 Bible Online

ESAIA 64 - Achang bible

ESAIA 64

¹Nvng chamus maukhung chuiq phank las ma gyoh los? Boms jens nvng lyis nyvng zis yah gyuk las nvn bas jungh.

²Nyamoq gas nyikhyomp mas jeisgywes tsoeu teh nvn bas jungh. Nah jeswus lyis nah yomsoq los chixoeuq las nah xikkhonh mas dius nyau jens lyis gyuk nvn nhang aq.

³Nvng ngamoq ma nghamhloms dah shishenh lyis jweh los las gyukphoh zis vja ja bweh nhang. Housoeh nvng lyis boms jens nyvng las gyuk nvn nyeis.

⁴Nyang lyis nghamhloms nyeis bang xiklyis nvng teh muhzains kuot dah Mangso lhyi hank khanhamp eq ma nyvng ku, ma xauhgyo ku.

⁵Dan cho lhyi gauslaus zis yah chank kuot bang yahge nvng nyamoq lyis kang khasoeh dwis nhang mes yvlyis soh bang lyis nvng lhom yoeus. Nvng ngamoq lyis nhaiqyo goeus laus eq ngamoq gas yaunos tsoq kuot nyeis. Nvng svsoh nhaiqyo lyis yangh ngamoq gas gohlhain lhyi yah teh shuot cho tsoq kuot nyeis.

⁶Ngamoq dvnganh gas yaunos kuot goeus. Ngamoq gis thank shoq kuot goeus oen zis yangh ma lhoq zis vtsank tsank nghuot. Ngamoq dah yaunos gvng mas ngamoq gas saiq huq nyhauh las lyeis yah muot tangh loh teh nghuot.

⁷Nah jyank mas shvmanh dung das zis hank ma tauh los lo. Nvng lyis pangh cho hank ma sang lo. Ngamoq dah yaunos gvng mas nvng ngamoq lyis tamh las ngamoq lyis tyamp toh[13] goeus.

⁸Nghuot laus eq YHENSAIN eh, nvng gas ngamoq uwus nghuot. Ngamoq gas tsohnyhon teh nghuot las Nvng gas auhshonh soeu teh nghuot. Nvng ngamoq lyis gvnkhanh toh.

⁹Housoeh las ngamoq lyis nhaiqgis vjenh yo, ngamoq dah yaunos gvng mas ngamoq lyis vjangh tyi vjenh xo. Ngamoq gas nah dius jens nghuot las ngamoq lyis jenh nhaiqnyen aq.

¹⁰Nah gyingshang wus jens gas mhanhdyvp teh nghuot goeus. Yerusalem eq jyamhjyuklhyuk dyoq gyoh goeus.

¹¹Ngamoq dah phauh thyeih moq nvng lyis chungh joqyos, ngamoq dah gyingshang lha yunghshop yhenmuh eq ngeh tyamp goeus. Ngamoq dah nhaiqdoeus joqyos jens dvnganh gas dyoqbis joq goeus.

¹²YHENSAIN eh, nvng haih dvnganh gvng mas nah ehnyet mas ma zangh lhyeh? Nvng cha ma kuot kuot, ngamoq yoh kham thoq lyis zes shoq ngamoq lyis shanghsenh kham nyeis nhang das lhyeh?