Read Achang ESAIA 66 Bible Online

ESAIA 66 - Achang bible

ESAIA 66

¹YHENSAIN heisoeh ge: Maukhung ka ngah hwankti tank, nyeisjvng gas ngah nangte nghuot. Ngah xiklyis khasoeh teh yhen kuot das lah? Ngos no das joqyos khasoeh teh zis nghuot das lah?

²Maukhung nyeisjvng dvnganh lyis ngvnyang gvnkhanh toh! Ehnyet nyhen mha gyoh las nhaiqlom thaiq bang, ngos lyis gyukwoms zis yah ngah domsyos gyo bang lyis ngos nhaiqdoeus.

³Dius jens gas nyamoq nyang nhaiqdoeus khyvlyis tsain kuot. Nyamoq noeulu sat las lomhxangh lainh zis yahge dius yah lomhxangh lainh zis, yvnglo yah lomhxangh lainh zis nghuot nghuot, lvkhuih lainzain lhyent thyet las nghuot nghuot: Zonoms jyungshuk dyei cho laus eq, wuq suih dyei cho laus eq; loban ngheq dyei, nghuot ya phvra lyis shvmanh dung laus eq nyamoq xiklyis cha khamzo cho ma bos dvyhangteh dvnghuot. Nyamoq gas vchoqh vlhauq paiq cho mha tsain pyo nyeis.

⁴Housoeh las ngos nyamoq thoq mas nyamoq loh thank gyuk nyeis dah dyoqbis zainsmuh she los das: Khasoeh ge lyis ngos lui lyis nyamoq hank ma toeuh, ngos taiq lyis hank ma gyo. Nyamoq gas ngah domsyos ma gyo das zis yahge ma gis zis kuot das yvlyis khyen yoeus.

⁵YHENSAIN lhyi gyukwoms las nyah domsyos gyo bang namoq eh, nyang cha taiq yvlyis gyo geh. Namoq ngos lyis lomluk gvng mas namoq nyang dius jens mas dvyhamh namoq lyis hoeng lha namoq yah ma zomh das. Nyamoq gas namoq lyis jwangh las, YHENSAIN ka nyah kuhxing cho chixoeuq las namoq lyis khyuot yoeus bas jungh, housoeh lyis ngamoq namoq dah gauslaus cho yoh nyvng mvbeh, ge. Nghuot laus eq nyamoq gas xoqphuh das.

⁶Gyo geh, wus mas hoeu thwe, yhenmuh masyah nyings thwe, YHENSAIN nyah jeswus lyis joeng dah thwe nghuot.

⁷Ngah gyingshang wus gas lokhoeu nos ma nos shih lyis loshang nyetlos nyettant khoeu los dah vmesbih yah doeusgoh.

⁸Housoehteh cho hank xauhgyo ku? Hank nyvng ku? Dvnyeih dvm lyis dius nyau dvkoeuq khoeu los ku lhyeh? Zion ka dius nyau ma khoeu shih lyis shanghsenh cho nyangh shoq ma xauh kham lo das.

⁹Ngos ngah dius jens lyis lokhoeu shishenh jweh nhang lha Lokhoeu das toeuh ma dyei oen vnghamh, ge YHENSAIN taiq goeus.

¹⁰Yerusalem wus lyis jyet bang dvnganh eh, nyang yah dvgeh gauslaus zis yah pyo nyeis geh. Nyah cho kuk ngaus goeus bang dvnganh eh, gvshih nyang yah dvgeh gauslaus geh.

¹¹Loshang ka nyah ungwes sainhkhonh mas pyo teh nvng eq nyah nyeisgis yap lhoq yvmas gauslaus pyo das.

¹²YHENSAIN taiq, Ngos namoq lyis mathank magons nyeisgis yaplhoq cho shwih los dyei das. Dius nyau jens dah zisyos lyis nah jyank mas khanhamp eq ma kanh loh dah jeislvng teh yaus wvng los nhang das. Nvng gas ungwes nauh gvmshuk las nyah loqyom mas jyetdap zis yah po lha dyangh teh nghuot das.

¹³Ungwes gas nyah lo lyis nhaiqtaink dyei teh ngos Yerusalem mas nvng lyis nhaiqtaink das.

¹⁴Nvng hau bweh cho lhyi nyvng lyis nvng gausyis das. Hauh zis nvng lyis yombos las yanghzan nhang das. Housoeh lyis ngos YHENSAIN ngah domsyos gyo bang lyis pangh las ngah jeswus lyis ngos nhaiqyo cho chixoeuq zis nvng seq das, ge.

¹⁵YHENSAIN ka nyang nhaiqyo bang lyis joeng das zis nyi yah jweh los das. Nyang gas lyeis jyang dah dungs yah ji los.

¹⁶Mungkvn dius jens mas yobos bos ge xo nyvng bang dvnganh lyis nyi yah eq, moengsa yah eq joeng das nyoshoq sat zis xauh das.

¹⁷YHENSAIN taiq, Silho lhyi paiq las vsainnyang gungs lyis cheihshang bang, gyingshang khyam mha e bang, wuq shoh, gyuq shoh yahge vchoqh vlhauq zonoms zo bang dah vthang ka jweh los nyeis.

¹⁸Ngos nyamoq muhzoh yahge nghamh cho seq. Dius nyau dvnganh dah dius jens lyis tsainh das zis ngos los nyeis.[14] Nyamoq dvgeh huom uhlyis ngah yomsoq cha yoh kuot yvlyis nyvng das.

¹⁹Ngos gas nyamoq lyis joeng soeu nghuot yvlyis seq das. Nghuot laus eq ngos dvyhamh lyis nyhet toh las dius nyau jens yahge we mau mas nyeis, ngah nyings hoeuh cho ma xauhgyo bang, ngah kuhxing cho yahge yomsoq bos cho ma nyvng bang ge Spain, Libya,[15] Lydia teh lyei baiq lyes bang jyank mas, Tubal yahge we dah Greece mas tsain nhang das. Nyamoq haih dius nyau jens mas ngah kuhxing cho taiq hoeuh das.

²⁰Nyamoq gas nah dius jens lyis dius nyau jens masyah ngah jyank mas jyungshuk khyvlyis tsain shwih tauh los das. Nyamoq lyis ngah gyingshang jing, Yerusalem mas Israel jens gas nyamoq zonoms jyungshuk lyis lhoqshang khuq masyah Yhenmuh mas thuq los teh, nyang jens, luzoe jens, gola-u, jeslhyingh yah tsain thuq wvng los das, ge.

²¹Ngos nyamoq dvyhamh lyis phudyei bang yahge Lewi jens kuot das.

²²Maukhung vsaiq yahge nyeisjvng vsaiq gas ngah yomsoq yah doengs joq zis yah dvyhangteh, nah vnyau vshih yahge nah nyings eq doengs joq das.

²³Lohcanh khanghmuh, no nyeih khanghmuh, dius nyau khanghmuh mas dah dius jens gas ngos lyis haih Yerusalem mas los tsain paiq das, ge YHENSAIN taiq.

²⁴Nyamoq thuq loh lyis ngos lyis gomloeus toq bang dah mvng lyis tsain nyvng das. Nyamoq lyis zo dah luk khanhamp eq ma shei, hau nyamoq lyis ngeh dah nyi eq khanhamp eq ma shei. Hauh zis gas dius nyau jens dvnganh xiklyis vchoqh vlhauq nghuot, ge.