Read Achang ESAIA 7 Bible Online

ESAIA 7 - Achang bible

ESAIA 7

¹Yuda hwankti Uzia lo Yotham dah lo Ahaz guon zaih lyis, Siria hwankti Rezin yahge Israel hwankti Remalia lo Peka gas Yerusalem lyis loh zan laus eq ma ung.

²Siria jeswus jens gas Israel jens yah pangh thuk goh das xamxonh goh goeus ge dah loeus Yuda hwankti xauhgyo lyis, nyang yahge nyah dius jens dvnganh gas gyuk las lyeis los lyis saiqzains nonh teh tsain nvn nyeis.

³YHENSAIN Esaia lyis taiq, Nvng nah lo Shear-yashub lyis shwih las hwankti Ahaz yah loh xauhgoh aq. Nyang lyis khying cauh soeu dah yos cho dah bvlang whomh mas nyvng das.

⁴Nyang lyis taiq das zis gas, Zoehsoe lha samlo nyeis aq, hwankti Rezin yahge nyah Siria dius jens, Remalia lo hwankti Peka moq dah nhaiqyo yvlyis vgyuk vdvn goh, Houka nyikhauh thuq dah nyizoh aiq koeuq thoq lyis gyukphoh cho ma yoh dyei, ge.

⁵Siria, Israel jens yahge Remalia lo gas nvng lyis ma gis khaujeini nyeis.

⁶Yang Yuda mau mas wvng las dius jens lyis kyuk tant zis yah nyamoq jyank pheh dap Tebel dah lo lyis hwankti toh goh, ge.

⁷Nghuot laus eq, Haih cho khanhamp eq ma bweh das oen ngos, YHENSAIN taiq hoeuh.

⁸Chamus? Khasoeh ge lyis Siria gas Damasku thoq lyis yom ma zes bos; Damasku eq wusmuh nghuot las hwankti Rezin thoq lyis yom ma zes bos. Israel xiklyis gas khyukci oeng zvn gyo lyis dius dvnyau ma yoh doeng lo shoq dyoqbis das.

⁹Israel gas Samari thoq lyis yom ma zes bos; houka wusmuh nghuot las Samari gas Remalia lo hwankti Peka thoq lyis yom ma zes bos. Nah lomsjingh cho ma doengs lyis gas ma yoh doengs das, ge.

¹⁰YHENSAIN Ahaz lyis gohtoeu loeus dvkoeuq doms dyei zis gas,

¹¹YHENSAIN, nah Mangso nvng lyis vlho dyei das zis dung aq. Houka shei dah mungkvn noq thank masyah, nghuot ya nyhang thank maukhung thoq masyah gis bweh, ge.

¹²Ahaz phuk taiq zis gas, Ngos YHENSAIN lhyi vlho ma sang das, ngos YHENSAIN lhyi ma shi yoeuh das, ge.

¹³Esaia phuk taiq, Dawi dah vnyau vshih jens eh, gvshih gyo geh. Namoq gas dius lyis nyungdaus nhang goeus ngah Mangso lhyi eq nyungdaus nhang das lah?

¹⁴Housoeh YHENSAIN nyang namoq lyis vlho dyei das: lonyi gyingh gas loshang gungs lyis chi lha yukgis lo khoeu los das, nyah nyings lyis Immanuel[1] ge lui das.

¹⁵Nyang gas ma gis yvlyis he lha gis yvlyis seq khyen yoeus shoq nauh yahge dyoyhei zo shuk las nyeis.

¹⁶Hauh shishenh yangh ma jweh shih lyis hau namoq lyis los kyuk tant dah hwankti aiq yuk guon dah mau gas jyamhjyuklhyuk mus das.

¹⁷Israel munghdan Yuda yah gang loh nyeih masyah ma bweh ku dah yau cho YHENSAIN ka nvng yahge nah dius jens thoq mas eq, nah hwankti yhenbang thoq mas eq jweh nhang das. Nyang Asiria hwankti lhyi shwih los das.

¹⁸Hauh nyeih jweh lyis YHENSAIN ka Egutu bang lyis vsoh dyei las we thank Nile lvng nvm mas dah yvngkhungh jens los teh los das xiklyis uk das. Asiria mau bang eq nyamoq mau masyah dyo jens teh los das.

¹⁹Nyamoq gas langhkhau, lukkhyung, luk-uk, zoeu gyomh, katjang dvnganh mas los boms toh das.

²⁰Hauh shishenh jweh lyis, YHENSAIN ka Uphrat lvng thyitvp mas dah uhyuk soeu ge Asiria hwankti lhyi nghoh las namoq dah nhuotmi, cam, gungs mas mauh tsain yuk tyamp dyei das.

²¹Hauh buisnyeis jweh lyis yos zwi soeu dvyuk gas noeupon dvdoeu, shvbeq aiq doeu yoh nyhoeu toh.

²²Nyamoq nauh nyoshoq dyei las yos sain chah zis dvnganh yoh. Nghuot goeus, hauh mau mas nainlo doeng nyet nyeis shih bang gas nauh yahge dyoyhei xauh zo das.

²³Hauh buisnyeis jweh lyis ngwis kyvp dvkhyoengh khyoengh phauh dah zvbiq nwis dvkhyoengh khyoengh bos dah khyam yungh jens gas zoeuzains yahge nyoq kyingh yuk das.

²⁴Mau gonh mas zoeu gyomh nyoq gyomh kyingh nghop joq yvmvyah, dius jens lyei chi nyo chi lha houmha shoh khat loh das.

²⁵Jyo khyoq khoq dah jing jens dvnganh gas zoeu gyomh nghuot las houmha hank ma loh, noeu katjang, yvng yoeuh joqyos bweh das, ge.