Read Achang ESAIA 8 Bible Online

ESAIA 8 - Achang bible

ESAIA 8

¹YHENSAIN ngos lyis taiq, Sauhdain kuh yoeus las houmha sauhchvp kuh kuh yah Maher-Shalal-Hash-Baz[2] xiklyis, oen lhaih toh aq, ge.

²Kanghjyoeng khyvlyis wontang dah dius aiq yuk ge phudyei Uria yahge Yeberekhia lo Zekharia lyis shwih toh aq.

³Dvyoq nyangh thang lhyi ngah yhensain nyhiq loshang gungs lyis chi los. Housoeh hauh yukgis lo khoeu los lyis YHENSAIN ngos lyis taiq, Nyang lyis Maher-Shalal-Hash-Baz oen nyhink aq.

⁴Hauh loshang ma kuh shih las, Ungwes, uwus ge ma seq lui shih lyis Damasku dah dis cho yahge Samari mas lvnyhvp dvnganh lyis Asiria hwankti yoeus loh das, ge.

⁵YHENSAIN ngos lyis doms taiq,

⁶Haih dius jens gas zoh yah yaus nyeis dah Shiloa lvnglo ge dah Mangso lyis peq tyamp las, hwankti jens Rezin yahge Remalia lo Peka lyis gaus nyeis yvmvyah,

⁷Ngos YHENSAIN ka, Yuda lyis zan das xiklyis Asiria hwankti yahge nyah jesphung dvnganh shwih los das. Nyamoq gas Uphrat lvng gas nyah nyeismhung lyis nhauq nghop teh los nhoenk toh das.

⁸Houka Yuda mau masyah shenh las kvtoq nyhank nyhang lha dvnganh lyis yaus nghop loh das, ge. Mangso ka ngamoq yah dvgeh nyeis. Nyah dungs tyo lha hauh mau lyis gos toh dyei das.

⁹Dius nyau jens eh, gyuk zis yah dvgeh huom geh! Nyeisjvng we yvmas nyeis bang eh, kamp gyo geh, gyuk zis yah jeszan das zis cicont kuot geh, gyuk zis yah jeszan das zis cicont kuot geh.

¹⁰Joeui da geh, nghuot laus eq nyamoq khanhamp eq ma ung. Taiq mes zis dvnganh taiq geh, nghuot laus eq houka chah vkyuh ma bos: khasoeh ge lyis Mangso ka ngamoq yah dvgeh nghuot.

¹¹Ngos gas dius jens loh dah chochank ma loh das xiklyis YHENSAIN ka nyah kuhxing yomsoq yah ngos lyis zaih nhang lha taiq.

¹²Dius jens dah joeui da cho mha vbos goh. Nyamoq gyuk nyeis dah vyhang lhyi vgyuk goh.

¹³Ngos Maukhung Jesphung YHENSAIN ka gyingshang yvlyis soh geh. Ngos gas namoq gyukwoms chah soeu nghuot.

¹⁴Ngos gas gyingshang cho, dius jens thungh lains das luklom, Israel yahge Yuda munghdan dius jens yahge Yerusalem dius jens xiklyis lhyik nghuot das.

¹⁵Nyoshoq moq houmha thungh lains las thungh thyi das. Nyamoq lhyik mas nyih das, ge.

¹⁶Namoq ngah changlo jens gas ngos lyis Mangso dyei dah loeus lyis zungh las tsomh toh geh.

¹⁷YHENSAIN ka nyah dius jens lyis tamh joq, nghuot laus eq ngos nyang lyis loms, ngah dah nghamhloms cho nyang mas toh.

¹⁸Ngos gas heimha YHENSAIN ngos lyis dyei toh dah loshang jens yah nyeis. Maukhung Jesphung YHENSAIN dah hwankti tank gas Zion boms mas joq. Nyang ngamoq lyis Israel dius jens jyank mas dwis nyeis loeus khyvlyis nhang kat.

¹⁹Nghuot laus eq dius jens namoq lyis, Botthyet bang yahge, domdom soqsoq ge lop las gyuiswvng bang lyis nyei das nyhenshang taiq das. Nyamoq gas, Dwis nyeis bang dah gungsthaiq shei bang dah sidyos masyah loeus gis nyei lhyeh, ge.

²⁰Namoq nyamoq lyis phuk taiq das zis gas, YHENSAIN namoq lyis cha jyauh zis gyo geh. Gyuiswvng bang dah dang vgyo goh! Nyamoq taiq zis gas namoq xiklyis ma gis zis bweh los.

²¹Hauh mau chank lai loh bang gas yomgyau las yuot shet. Nyamoq dah yuot shet cho yahge nhaiqyo cho ka nyamoq dah hwankti yahge nyamoq dah Mangso lhyi nhoengh das. Nyamoq maukhung pheh nghank yoeuh,

²²nghuot ya nyeisjvng mas yoeuh lyis, yaukyenh cho yahge soeng soeng noq cho, gyukphoh soeng soeng noq zis dvnyvng das. Gyukphoh soeng soeng noq yvmas khat kat zis xauh. Houmha yaukyenh bang xiklyis soeng soeng noq cho, nghuot ya nhaiqkuk yomgyau cho ma bos lo das.