Read Achang ESAIA 9 Bible Online

ESAIA 9 - Achang bible

ESAIA 9

¹Nyamoq xiklyis hai yau shishenh masyah ma yoh phang luiq das. Xikpheh Zebulun mau yahge Napthali mau gas khoengh shomh laus eq, thang pheh Mediteranean Thomh masyah buisthuq pheh Yodan lvng thyitvp, gohnyau bang nyeis dah Galile gas nyoqnho ngelang yoh los das.

²Chuot yvmas suh e bang gas bvng zainsmuh nyvng goeus. Nyamoq Shei mau dah siyet mas nyeis. Nghuot laus eq gvshih nyamoq lyis bvng zis pank dyei los.

³YHENSAIN eh, nvng gas dius nyau je los nhang zis yah nyamoq lyis svsoh gauslaus nhang;[3] nvng nyamoq lyis pyo nhang. Dius jens gas jyo yhomh uhlyis, nghuot ya nyamoq yoh los dah lvnyhvp gvm goh uhlyis tsain gausyis teh, nyamoq gas nvng kuot cho mha tsain gauslaus nyeis.

⁴Khasoeh ge lyis nyamoq lyis wuq nhang dah tanzoe yahge nyamoq lyis lyuk dah wuseh lyis nvng tsain khyauh tyamp goeus. Nvng gohlhain Midian jes jens lyis ung tyamp teh, nah dius jens lyis zaiq las laihwangh bang lyis ung tyamp.

⁵Jeszan khyop wvng los bang dah thyvkoq jens yahge suih lhoeuh dah dyimis dvnganh lyis nyi yah mhont das.

⁶Ngamoq xiklyis lo khoeu los, ngamoq lyis yukgis lo dyei los las nyang ngamoq dah guon soeu nghuot das. Nyang lyis Mauhphoh Soeu, Joeui da Soeu, Yomzains Mangso, Vcaiq vto Uwus, Nyenstap Zau ge lui das.

⁷Nyah zauguon yomsoq gas tsoq las je los das. Nyah munghdan vjangh nyenstap das. Dawi dah Hwankti tank mas tsung lha hauh munghdan lyis gvshih masyah thang thank jweh shoq nyah yomsoq goeng nhang zis yah, dan las lyi jus khyvlyis guon das. Maukhung Jesphung YHENSAIN ka haih cho dvnganh kuot das zis nghamh thyet goeus.

⁸YHENSAIN ka Yakop dah vnyau vshih, Israel munghdan thoq mas soetuon cho los das yvlyis taiq goeus.

⁹Samari mas nyeis dah Israel jens yuk khanghmuh gas nyang haih zis kuot goeus cho seq das. Gvshih nyamoq khwank las lhoq lhoq teh taiq zis gas,

¹⁰Nyamoq gas jyenhchvp yhen gywis laus eq luk yhen doms ci das. Lvhomp zains thoeuq tyamp laus eq yungh dah Arit zains doms tsungh das, ge.

¹¹YHENSAIN ka nyamoq dah jeswus [4] nyamoq lyis los zan das xiklyis nhauh toq kat.

¹²Israel jens lyis nyhau das zis buisthuq pheh dah Siria, buiswvng pheh dah Philisti jens gas nhuot tsain haq toh. Nghuot laus eq YHENSAIN nhaiqyo ma bi, nyah loq gas nyamoq lyis joeng das zis dvlvm toh shih.

¹³Maukhung Jesphung YHENSAIN Israel dius jens lyis yobos dyei goeus lyis eq nyamoq nhaiqlom ma thaiq, nyah jyank pheh ma tauh los.

¹⁴Dvnyeih gas YHENSAIN Israel jens dah uhshe bang yahge nyah dius jens lyis yobos dyei das; nyamoq lyis uhloms eq lhyank eq thyet tyamp das.

¹⁵Logis jens yahge phauh nyang gis bang gas uhloms nghuot, lhyank gas hwah cho jyauh dah lvpe jens nghuot.

¹⁶Haih dius jens lyis choshe bang gas nyamoq lyis cho shwih whang lha dvnganh yah lhoeu nhunk tyamp. Nyamoq yah choshe zis xauh bang eq dyoqbis tyamp.

¹⁷Housoeh las YHENSAIN ka loyvm jens dvyuk lyis eq ma phang luiq nhang das, chauhmuh chauhlo jens lyis nhaiqnyen cho ma chixoeuq das: khasoeh ge lyis dius jens dvnganhmoq gas mangso ma bos, lhung lha nyamoq taiq zis dvnganh ma gis zis kyingh nghuot. Housoeh las nyang nhaiqyo ma bi, nyamoq lyis joeng das zis nyah loq dvlvm toh shih.

¹⁸Hauh dius jens dah lhung cho ka zoeugyomh yahge zoeu lyis mhont tyamp dah nyi teh ngeh nyeis. Hauh zis gas yoszanh khyam mha nyi ngeh las nyikhauh nhoenk doq loh teh nghuot.

¹⁹Maukhung Jesphung YHENSAIN dah nhaiqyo gvng mas nyah joeng cho ka hauh mau gonh mas nyi soeh ngeh las dius jens lyis mhont tyamp. Hank eq nyah vmang vnoeuh lyis ma lhuiq.

²⁰Hauh mau dvkhauyah dius jens gas nyvng dah zonoms dyvm lhuot zo goh laus eq khanhamp eq ma jo. Yuk khanghmuh vsainnyang lo jens lyis yangh zo tyamp.

²¹Manase dius jens yahge Ephraim dius jens gas nyang changh nyang zan goh. Nyamoq Yuda lyis dvgeh doms zan. Nghuot laus eq YHENSAIN dah nhaiqyo zis ma bi, nyah loq gas joeng das nyhenshang dvlvm toh shih.