Read Achang LEWI 10 Bible Online

LEWI 10 - Achang bible

LEWI 10

¹Aron loloeu tang Nadab yahge Abihu ka nyang yuk nyang toeu dah nyibvn yoeus, nyi kat, loban kih zis yah YHENSAIN lhyi phudyei. Nghuot laus eq hauh nyi gas YHENSAIN taiq toh nyi ma nghuot yvmvyah ma gyingshang.

²YHENSAIN nyetlos nyettant nyi kat kat las nyah zomh YHENSAIN xikkhonh mas ngeh shei.

³Housoeh Moshe Aron lyis taiq zis gas, Ngos lyis phuqsoe bang dvnganh ngah gyingshang cho lhyi nyoqnho ngelang dyei chah, ngos ngah dius jens lyis ngah phunk thuq xoeuq[3] das, ge YHENSAIN haih cho taiq uhlyis taiq goeus, ge. Aron gas samlo dvnyeis.

⁴Moshe ka Aron dah phvthank Uziel dah lotang Mishael yahge Elzaphan lhyi khi lha taiq zis gas, Los geh, namoq dah boekyis tang dah mvng lyis Zvng masyah dvp nghe pheh yoeus tyamp geh, ge.

⁵Housoeh las nyah zomh eq los las, Moshe taiq toh vgus dyixing wuot toh dah mvng lyis nghe pheh tsain yoeus thuq tyamp.

⁶Moshe ka Aron yahge nyah loloeu tang Eleaza yahge Ithama lyis taiq zis gas, Namoq cam ma tyeh vtoh goh, namoq kuk cho chixoeuq khyvlyis dyi vlang chuiq goh. Namoq housoeh kuot lyis shei das. Hou lho lhyi YHENSAIN ka dius dvphung gonh lyis nhaiqyo das. Nghuot laus eq namoq Israel changh jens dvnganh gas YHENSAIN khyoq dah nyi gvng mas shei cho lhyi kuk bas jungh.

⁷Namoq Zvng khomh nghe pheh vthuq goh: thuq lyis namoq shei das: khasoeh ge lyis namoq gas YHENSAIN dah coeu juot zis yah cheihshang toh, ge. Housoeh las nyamoq gas Moshe taiq vgus kuot.

⁸YHENSAIN Aron lyis taiq zis gas,

⁹Nvng yahge nah loloeu jens zvbiq, yhei shuk las ngah xikkhonh Zvng mas vwvng goh. Namoq housoeh kuot lyis shei das. Heika namoq vnyau vshih mas chank nyeis das lyi nghuot.

¹⁰Kha ka Mangso yah sen, kha ka dvnganhmoq yhung zis nghuot yvlyis namoq seq gvn chah. Kha ka lhoqshang nhang toh, kha ka ma lhoqshang ge zis seq gvn chah.

¹¹Ngos namoq lyis Moshe lhyi yah dyei toh dah lyi dvnganh Israel jens lyis jyauh chah, ge.

¹²Moshe ka Aron yahge nyet shih dah nyah loloeu tang Eleaza yahge Ithama lyis taiq, YHENSAIN lhyi dyei dah zonoms mas nyet dah jyo jyungshuk yoeus geh. Bicheih ma kat ohlhyoq kuot las phon yvm mas zo geh: khasoeh ge lyis houka svsoh gyingshang.

¹³Hauh zis gyingshang joqyos mas zo geh. Houka YHENSAIN lhyi dyei dah zonoms mas zis nghuot las nvng yahge nah loloeu jens yah sen. Hauh zis YHENSAIN ngos lyis tying toh.

¹⁴Nghuot laus eq phudyei bang nyhenshang YHENSAIN lhyi lhyenwhei jyungshuk yahge lhyenwhei vlu khyvlyis dyei dah hau sainhkhonh yahge bungssan ka nvng yahge nah yhenbang gis zo. Namoq hauh yvlyis lhoqshang nhang toh joqyos mas zo chah. Haih jyungshuk gas Israel jens dah nyenstap jyungshuk masyah nvng yahge nah lo jens yah sen khyvlyis dyei toh.

¹⁵YHENSAIN lhyi zonoms jyungshuk khyvlyis coeu chi los dyei uhlyis nyamoq hau sainhkhonh yahge bungssan chi los das. YHENSAIN taiq toh vgus haih gvmboms gas nvng yahge nah lo jens yah vcaiq vto sen, ge.

¹⁶Moshe ka yaunos jyungshuk shvbeq cho nyei lyis houka ngheq phudyei goeus zis yoh seq. Houka Moshe lhyi nhaiqyo nhang lha nyang Eleaza yahge Ithama lyis nhaiqyo las taiq zis gas,

¹⁷yaunos jyungshuk shoh gyingshang joqyos mas chamus ma zo goh? Houka svsoh gyingshang. Dius phung dah yaunos yoeus tyamp dyei das xiklyis YHENSAIN namoq lyis dyei toh goeus.

¹⁸Hauh suih eq gyingshang Zvng mas ma tsain chi los. Housoeh las ngos taiq toh vgus namoq hau phudyei shoh gyingshang joqyos mas zo chah, ge.

¹⁹Aron phuk taiq zis gas, Khvnyhik ngos yaunos jyungshuk zo lyis YHENSAIN lhom yoeus das lah? Khvnyhik dius jens YHENSAIN lhyi yaunos jyungshuk yahge ngheq dyei jyungshuk tsain chi los dyei, nghuot laus eq ngah jyank mas gyukphoh zis bweh los, ge.

²⁰Moshe hauh zis xauhgyo lyis nhaiqtap loh.