Read Achang LEWI 14 Bible Online

LEWI 14 - Achang bible

LEWI 14

²o mha dah lyi dyei. Heika dvmjot dap soeu gis los lyis dah cheihshang lyi cho nghuot. Nyang lyis lhoqshang goeus ge dyei nyeih lyis phudyei soeu jyank mas e kyoh chah.

³Phudyei soeu ka dvp nghe pheh nyah jyank mas thuq e lha hau dvmjot yoeuh dyei das. Nyah dvmjot nos gis los goeus lyis gas,

⁴phudyei soeu taiq kat las nyang gas tsingh kan dah nghoq aiq doeu yah dvgeh, arit saiq dvkoeuq, twih nes dvkhvt, shomnhamh dvkyang chi lyih nhang das.

⁵Hauh thang lhyi yaus nyeis jeis kham kat toh tsoh khuq thoq mas nghoq dvdoeu sat nhang chah.

⁶Hau nghoq suih bos dah jeis khuq mas gohtoeu nghoq yah dvgeh arit saiq, twih nes, shomnhamh yoeus jen lho lha,

⁷dvmjot cheihshang kham soeu lhyi nyhet lhain tyitsant las, hauh soeu lhoqshang oen kyoh chah. Nghoq dwis lyis kat kat chah.

⁸Cheihshang yoeus soeu ka nyang nyah uhloms, nhuotmi, nyoqmi teh nyah gungs mas mauh dvnganh yuk, dyimis cheih, gungs cheih das. Housoeh lyis nyang lhoqshang das. Hauh thang lhyi nyang dvp khau mha gis wvng das, nghuot laus eq nyah zvng nghe pheh nyhet nyeih nyeis chah shih.

⁹Nyhet vnyeih lyis nyah uhloms, nhuotmi, nyoqmi teh gungs mas mauh dvnganh yuk tyamp das las, nyah dyimis cheih, gungs cheih zis yah lhoqshang das.

¹⁰Xet vnyeih lyis nyang gas, nos ma bos dvzvn dyingh yvnglus lo aiq doeu, yvngmuh dvdoeu yah dvgeh zonoms jyungshuk xiklyis tsanlun coeu yah lhoeuq dah monh oeng paung yahge tsanlun coeu dvpint dah dvgohyih chi los das.

¹¹Phudyei soeu ka nyang lyis haih jyungshuk yah dvgeh YHENSAIN xikkhonh Zvng khomh mas shwih e das.

¹²Hauh thang lhyi phudyei soeu ka yvnglus lo dvdoeu yah dvgeh coeu lhyi yoeus las yobos khyuot jyungshuk khyvlyis phudyei das. Phudyei soeu nyhenshang YHENSAIN lhyi lhyenwhei jyungshuk khyvlyis dyei das. Hauh zis phudyei soeu xiklyis YHENSAIN lhyi lhyenwhei jyungshuk khyvlyis dyei das.

¹³Nyang hau yvnglo lyis yaunos jyungshuk yahge ngheq dyei jyungshuk sat, gyingshang joqyos mas sat chah: khasoeh ge lyis yobos khyuot jyungshuk gas, yaunos jyungshuk teh phudyei bang yah sen lha svsoh gyingshang.

¹⁴Phudyei soeu ka hau yvnglo suih dvkhamh yoeus las, cheihshang kham das soeu dah loqyos nodyen mas eq, loqyos loqmuhchamh mas eq, loqyos khyeimuhchamh mas eq juot dyei chah.

¹⁵Phudyei soeu ka tsanlun coeu dvkhamh yoeus las nyah loqwi loqwu mas kat lho lha,

¹⁶nyah loqyos loqnyhauh yah hauh yvlyis thauh las YHENSAIN xikkhonh mas nyhet lhain tyitsant das.

¹⁷Nyah loqwu mas bos dah coeu dvkhamh yoeus las, lhoqshang ge hoeuh das soeu dah loqyos nodyen, loqyos loqmuhchamh, loqyos khyeimuhchamh mas juot dyei das.

¹⁸Nyah loqwu mas nyet shih coeu lhyi ka hauh soeu dah uhloms mas huot kat dyei das. Heisoeh khyvlyis nyang cheihshang cho kuot das.

¹⁹Housoeh phudyei soeu ka yaunos jyungshuk phudyei las cheihshang cho kuot das. Hauh thang lhyi nyang ngheq dyei jyungshuk sat das las,

²⁰jyo jyungshuk yah dvgeh phon mha phudyei das. Heisoeh khyvlyis Phudyei soeu ka nyah xiklyis cheihshang cho kuot dyei las hauh soeu lhoqshang das.

²¹Nyang nyungs las ma thyeh dyei lyis gas, nyah xiklyis cheihshang das zis yobos khyuot jyungshuk khyvlyis yvngmuh lo dvdoeu, phudyei soeu xiklyis YHENSAIN lhyi lhyenwhei jyungshuk chi los chah. Nyang jyo jyungshuk xiklyis Tsanlun coeu yah lhoeuq dah monh aiq paung, tsanlun coeu dvpint dah dvgohyih chi e das.

²²Nyang khotjyauh, nghuot ya guzoe aiq doeu eq chi los chah. Houka yaunos jyungshuk xiklyis dvdoeu, ngheq dyei jyungshuk xiklyis dvdoeu nghuot.

²³Nyah cheihshang dah xet vnyeih lyis hauh zis hau Zvng khomh, phudyei soeu jyank mas chi e das.

²⁴Phudyei soeu ka yvnglo yahge coeu yoeus las, phudyei soeu xiklyis YHENSAIN lhyi lhyenwhei jyungshuk khyvlyis dyei das.

²⁵Nyang hau yvnglo sat dah suih dvkhamh yoeus las hauh soeu dah loqyos nodyen mas, loqyos loqmuhchamh mas, loqyos khyeimuhchamh mas tsain juot dyei das.

²⁶Phudyei soeu ka coeu dvkhamh nyah loqwi loqwu mas huot kat las,

²⁷nyah loqyos loqnyhauh yah dvkhamh YHENSAIN xikkhonh mas nyhet lhain tyitsant das.

²⁸Nyang coeu dvkhamh lyis suih juot dah loqyos nodyen, loqyos loqmuhchamh, loqyos khyeimuhchamh dvyhangteh joqyos mas puk juot das.

²⁹Phudyei soeu loqwu mas nyet shih coeu lhyi ka nyah uhloms mas huot kat dyei zis yah cheihshang cho kuot.

³⁰Hauh thang lhyi nyang khotjyauh, nghuot ya guzoe dvdoeu yah phudyei das.

³¹Dvdoeu gas yaunos jyungshuk khyvlyis, gohtoeu dvdoeu lyis gas ngheq dyei jyungshuk khyvlyis jyo jyungshuk yah dvgeh nghuot. Heisoeh khyvlyis phudyei soeu ka cheihshang cho kuot dyei chah.

³²Haih zis gas dvmjot dap soeu nyah cheihshang cho mha gyangh dyei chah jyungshuk ma thyeh dyei soeu xiklyis lyi nghuot.

³³YHENSAIN Moshe yahge Aron lyis,

³⁴o mha, yhen khau mha mauhjungh yuk dyos loh cho dah lyi dyei. Heika YHENSAIN Israel jens lyis nyamoq vso mau khyvlyis dyei das Khanan mau mas jweh wvng thang lhyi toeuq cho nghuot.

³⁵YHENSAIN ka dvyuk yuk dah yhen khau mha mauhjungh yuk nhang lhyi phudyei soeu jyank mas hauh cho e taiq kyoh chah.

³⁶Phudyei soeu hauh yhen khau mha mauhjungh ma e wvng yoeuh shih lyis hauh yhen mha dah vyhang dvnganh nghe pheh tyungh thuq nhang chah. Ma nghuot lyis gas hauh yhen mha dah vyhang dvnganh vwot v-oeu nghuot ge taiq hoeuh das. Hauh thang lhyi nyang hauh yhen mha loh das las,

³⁷mauhjungh lyis yoeuh das. Hau ciank lyis zo loh teh nyaus, nghuot ya nes vdwang dwang mus lyis,

³⁸phudyei soeu yhen nghe pheh thuq las hauh yhen lhyi nyhet nyeih nyheih toh das.

³⁹Nyhet vnyeih lyis phudyei soeu e doms yoeuh las, hau mauhjungh dyos loh lyis gas,

⁴⁰hau mauhjungh dap dah luk lyis yoeus las wus nghe, ma lhoq ma shang joqyos mas yoeus tyamp nhang das.

⁴¹Hauh thang lhyi yhen khau tyoyvm yvmlhaink yah khyik tyamp nhang chah. Gyoh dah vmop lyis eq wus nghe ma lhoq joqyos mas huot tyamp chah.

⁴²Luk yoeus tyamp dah joqyos mas gohtoeu luk yoeus kat las mu tsoh vsaiq nyen chah.

⁴³Housoeh luk yoeus tyamp, khyik tyamp las mu tsoh vsaiq dye nyen thang lhyi, hau yhen mha mauhjungh doms dyos loh lyis gas,

⁴⁴phudyei soeu e doms yoeuh las hauh yhen mha hauh zis doms dyos loh lyis, hauh yhen ka ma lhoq ma shang.

⁴⁵Hauh yvlyis thyoq tyamp chah, nyah luk, nyah thyeh, mu dvnganh lyis wus nghe pheh ma lhoq ma shang joqyos mas doeuh tyamp chah.

⁴⁶Yhen nyheih toh gyo lyis hauh vkhau mha wvng soeu hank laus eq nyenhthang jweh shoq ma lhoq.

⁴⁷Yhen khau mha wvng yhet soeu wvng zo soeu hank laus eq nyah dyimis cheih tyamp chah.

⁴⁸Hauh yhen lhyi mu tsoh vsaiq dye nyen thang lhyi phudyei soeu los yoeuh lyis mauhjungh ma doms thuq los lo lyis gas, nyang hauh yhen lhyi lhoqshang oen taiq dyei chah: khasoeh ge lyis hau mauhjungh dvnganh yoeus tyamp goeus.

⁴⁹Hau yhen cheihshang das xiklyis nyang nghoq aiq doeu, arit saiq dvkhamh, twih nes dvkhvt, shomnhamh dvkyang chi lha,

⁵⁰yaus nyeis jeis cingh bos dah tsoh khuq mas nghoq dvdoeu sat las,

⁵¹hau arit saiq, shomnhamh, twih nes yah nghoq dwis lyis nghoq suih bos dah jeis cingh mas jen lho lha hauh yhen lhyi nyhet lhain tyitsant chah.

⁵²Heisoeh khyvlyis nyang hau nghoq suih, yaus nyeis jeis, nghoq dwis, arit saiq, shomnhamh, twih nes yah hau yhen lhyi cheihshang das.

⁵³Hauh thang lhyi nghoq dwis lyis gas wus nghe pheh mhanhdyvp mas kat kat das. Heisoeh khyvlyis nyang hauh yhen xiklyis cheihshang cho kuot las houka lhoqshang das.

⁵⁴Heika dvmjot nos cho dah lyi tsain nghuot.

⁵⁵Dvm, dyings, nghuot ya lungsbus; dyimis, nghuot ya yhen mha dah mauhjungh cho nghuot.

⁵⁶

⁵⁷Haih lyi gas dvja ja ma lhoq ma shang cho yahge lhoqshang cho lhyi tsain thyet dyei.