Read Achang LEWI 15 Bible Online

LEWI 15 - Achang bible

LEWI 15

¹YHENSAIN ka Moshe yahge Aron lyis o mha dah lyi dyei.

²Houka Israel jens xiklyis nghuot. Yukgis dvyuk yuk ri nos lyis, hauh gvng mas nyang ma lhoq.

³Ri nos jeis ma lyen thuq nyeis laus eq, doms laus eq nyang ma lhoq.

⁴Nyang yhet yhetyos yahge nyang tsung joqyos eq ma lhoq.

⁵Nyah yhetyos mas zangh soeu hank eq, nyang tsung khoq yvmas tsung soeu hank laus eq, nyah dyimis cheih, gungs cheih chah. Nyenhthang jweh shoq ma lhoq.

⁷Ri nos soeu lyis zangh tanh soeu hank laus eq dyimis cheih, gungs cheih chah. Nyenhthang jweh shoq ma lhoq.

⁸Lhoq shang nhang toh soeu lyis ri nos soeu svkanh dyeh zis zangh lyis, nyang nyah dyimis cheih, gungs cheih chah. Nyenhthang jweh shoq eq ma lhoq.

⁹Ri nos soeu tsung dah anhzoe, tank cha laus eq ma lhoq.

¹⁰Nyang tsung dah vyhang lhyi zangh soeu eq nyenhthang jweh shoq ma lhoq: hauh vyhang lhyi wuq soeu eq dyimis cheih, gungs cheih chah. Nyenhthang jweh shoq ma lhoq.

¹¹Ri nos soeu loq shih ma cheih gohyuk lyis zangh tanh lyis hauh soeu ka dyimis cheih, gungs cheih chah. Nyang nyenhthang jweh shoq ma lhoq.

¹²Ri nos soeu zangh dah tsoh auh gas khwih tyamp chah. Saiq khuq nghuot lyis gas jeis yah cheih chah.

¹³Ri nos soeu gis thang lhyi, nyhet nyeih langh chah, hauh thang lhyi nyah dyimis cheih, yaus nyeis jeis mas gungs cheih zis yah lhoqshang das.

¹⁴Hauh soeu ka xet vnyeih lyis khotjyauh nghuot ya guzoe aiq doeu YHENSAIN xikkhonh Zvng khomh, phudyei soeu jyank mas e kyauh chah.

¹⁵Phudyei soeu ka yaunos jyungshuk xiklyis dvdoeu, ngheq dyei jyungshuk xiklyis dvdoeu phudyei das. Heisoeh khyvlyis nyang gas hauh soeu xiklyis cheihshang cho kuot dyei das.

¹⁶Yukgis dvyuk yuk shauq thuq lyis nyah dvgungs gonh cheih chah, nyang nyenhthang jweh shoq eq ma lhoq.

¹⁷Misseh yah, nghuot ya shohyeis yah kuot dah kyahsoe dvja ja mas shauq gyoh zangh lyis hauh zis cheih tyamp chah. Nyenhthang jweh shoq ma lhoq.

¹⁸Vbusbih yah vmesbih yhetgoh thang lhyi aiq yuk yah gungs cheih chah. Nyah aiq yuk nyenhthang jweh shoq eq ma lhoq.

¹⁹Vmesbih gas mesmus lyis nyhet nyeih top ma lhoq. Nyang lyis zangh tanh soeu ka nyenhthang jweh shoq ma lhoq.

²⁰Mesmus shishenh gyo lyis nyang tsung, nghuot ya lhain dah vyhang cha eq ma lhoq.

²¹Nyah yhetyos lyis zangh tanh soeu, nyang tsung vyhang cha lhyi laus eq tanh soeu ka nyah dyimis cheih, gungs cheih chah. Nyang nyenhthang jweh shoq eq ma lhoq.

²⁴Mesmus vmesbih yah yhetgoh dah vbusbih gas hau vmesbih dah ma gyingshang gvng mas nyang nyhet nyeih ma lhoq. Nyang lhain dah yhetyos cha eq ma lhoq.

²⁵Vmesbih dvyuk mesmus yoq ma nghuot, suih shon, nghuot ya mesmus yoq lai shoq suih ma doms lyis, suih ma doms dvchank mesmus yoq lyis teh ma lhoq.

²⁶Haih shishenh gyo lyis nyang yhet dah yhetyos, nyang tsung joqyos cha laus eq ma lhoq.

²⁷Hauh vyhang lhyi zangh tanh soeu hank eq ma lhoq las, nyah dyimis cheih, gungs cheih chah. Nyenhthang jweh shoq eq ma lhoq.

²⁸Suih shon zis doms thang lhyi nyang nyhet nyeih langh chah. Hauh thang lhyi nyang lhoqshang das.

²⁹Xet vnyeih lyis nyang gas khotjyauh aiq doeu, nghuot ya guzoe aiq doeu chi e lha, YHENSAIN xikkhonh Zvng khomh, phudyei soeu lhyi kyauh chah.

³⁰Phudyei soeu eq yaunos jyungshuk khyvlyis dvdoeu, ngheq dyei jyungshuk khyvlyis dvdoeu phudyei chah. Heisoeh khyvlyis phudyei soeu ka nyah xiklyis cheihshang cho kuot dyei das.

³¹YHENSAIN ka Israel dius jens nyamoq dah ma lhoq cho lhyi taiq kyingh das xiklyis Moshe lhyi taiq. Housoeh nyamoq gas dvp vgungs mas joq nyang nyeis dah Zvng vwot v-oeu ma bweh bas jungh ge zis nghuot. Nyamoq lhoq lhoeuh lyis nyamoq sat zis xauh das.

³²Haih goeu gas ri nos yoh soeu, shauq thuq las ma lhoq dah vbusbih;

³³mesmus vmesbih, nghuot ya vbusbih gas ma lhoq dah vmesbih yah yhetgoh cho dah lyi nghuot, ge.