Read Achang LEWI 18 Bible Online

LEWI 18 - Achang bible

LEWI 18

¹YHENSAIN Moshe lhyi taiq zis gas,

²Israel jens lyis taiq aq: Ngos gas YHENSAIN, namoq dah Mangso nghuot.

³Namoq nyeis ku, Egutu mau bang, nghuot ya Ngos gvshih namoq lyis shwih toh das Khanan mau bang kuot teh vchank kuot goh.

⁴Ngah lyi lyis domsyos gyo las ngos tyingtoh dang lyis kuot geh. Ngos gas YHENSAIN, namoq dah Mangso nghuot.

⁵Ngos namoq lyis dyei dah lyi yahge tyingtoh dang chank kuot geh. Housoeh kuot zis yah namoq dah kang lhyi khyuot yoeus das. Ngos YHENSAIN nghuot.

⁶YHENSAIN o mha dah lyi dyei. Namoq hank eq namoq nyang sainhchangh yah vyhetgoh.

⁷Nah ungwes yah yhetgoh zis yah nah uwus lyis xoq vphuh nhang. Nvng nvnyang ungwes lyis xoq ma gis phuh nhang.

⁸Gohtoeu nah uwus dah yhensain nyhiq jens hank yah eq yhetgoh zis yah nah uwus lyis xoq vphuh nhang.

⁹Nah nhamhmuh sain laus eq, uwus dah lonyi, ungwes dah lonyi, dvyhen khau mha ma kuh los dah nah nhamhmuh doeus soeu yah vyhetgoh.

¹⁰Nah nyeilo yah vyhetgoh; houka nvng lyis xoqphuh nhang zis nghuot.

¹¹Ungwes gohtoeu toeu laus eq uwus xonh dah nhamhmuh yah vyhetgoh. Nyang eq nah nhamhmuh nghuot.

¹²Nah vyi, nghuot ya vmes doeus soeu yah vyhetgoh: Nyang gas nah uwus dah nhamhmuh nghuot ya ungwes dah vbi vnoeuh nghuot.

¹⁴Nah uwus dah vmang vnoeuh dah yhensain nyhiq yah vyhetgoh. Nyang gas nah vmes nghuot.

¹⁵Nah doeusmuh, nghuot ya,

¹⁶nah vmang vnoeuh dah yhensain nyhiq yah vyhetgoh.

¹⁷Nvng yah yhetgoh goeus dah vmesbih dah lonyi, nghuot ya nyeilo yah vyhetgoh. Hauh bang gas nvng yah dvsuih dvshoh dvnghuot. Houka lhung cho nghuot.

¹⁸Nah yhensain nyhiq kang dwis nyeis shih lyis nah yhensain nyhiq dah vbi vnoeuh lyis nah yhensain nyhiq jens dvyuk khyvlyis vyoeus.

¹⁹Vmesbih mesmus nyeis gyo lyis nyang yah vyhetgoh: khasoeh ge lyis nyang ma lhoq..

²⁰Gohyuk dah yhensain nyhiq yah vyhetgoh. Houka nvng lyis ma lhoq ma shang kuot dyei.

²¹Molek mangso lhyi paiq cho mha yhung das zis nvng nah lo jens hank lyis eq vdyei. Khasoeh ge lyis houka YHENSAIN Mangso dah nyings lyis xoqphuh cho she los.

²²Vbusbih dvyuk gohtoeu vbusbih yah hank eq ma gis yhetgoh. Hauh yvlyis Mangso hoeng.

²³Vbusbih vmesbih hank eq gaunyhauq yah ma gis yhetgoh. Hau phanh loh cho ka nvng lyis vwot v-oeu bweh nhang.

²⁴Hai shuot cho cha yah eq namoq gungs lyis vlhoq lhoeuh goh. Nyamoq gas haih yaunos tsain kuot yvmvyah YHENSAIN ka hau dius nyau lyis hauh mau masyah khat tyamp las hauh mau namoq lyis dyei.

²⁵Nyamoq kuot gvng mas hauh maunyeis eq vwot v-oeu nghuot. Housoeh YHENSAIN hauh mau lyis yau dyei las hauh nyeisjvng gas houmha nyeis bang lyis peq tyamp nhang.

²⁶Nyamoq gas hau choqh phoh zis dvnganh kuot las hauh mau vwot v-oeu bweh nhang. Nghuot laus eq namoq gas housoeh ma gis kuot. Israel laus eq namoq mas nyeis dah lvbaus laus eq dvnganh gas YHENSAIN dah lyi yahge tyingtoh dang chank nyeis chah.

²⁸Housoeh lyis hauh mau mas namoq xik mas nyeis las Mangso lhyi ma seq bang lyis peq tyamp teh ma peq tyamp das.

²⁹Hai vchoqh vlhauq cho chank soeu hank laus eq Mangso dah dius ge ma nghamh dyei lo das yvlyis namoq seq.

³⁰YHENSAIN taiq zis gas, Ngos dyei dah tyingtoh dang lyis domsyos gyo geh. Hauh mau mas namoq dah xik pheh nyeis khoq bang kuot teh vchank kuot goh. Haih cho cha yah eq namoq nyang gungs lyis vlhoq lhoeuh goh. Ngos YHENSAIN, namoq dah Mangso nghuot, ge.