Read Achang LEWI 2 Bible Online

LEWI 2 - Achang bible

LEWI 2

¹Dvyuk yuk YHENSAIN lhyi jyo jyungshuk dyei das lyis, nyang cangxeih lyis phih moq chah. Hauh yvmas tsanlun coeu yahge loban kat chah.

²Nyang hauh yvlyis Aron lo jens phudyei bang jyank mas chi e lha, phudyei muh wons soeu ka monh dvtsop, coeu yahge loban dvnganh yoeus las YHENSAIN lhyi dvnganh dyei goeus khyvlyis dah jyungshuk phon mha ngheq dyei das. Hai zonoms jyungshuk xangh shom ka YHENSAIN lhyi nhaiqdoeus nhang.

³Nyet dah jyo jyungshuk gas phudyei bang yah sen. Houka YHENSAIN lhyi dyei dah zonoms masyah yoeus zis nghuot las svsoh gyingshang.

⁴Hauh jyungshuk gas nyi mas piq goeus ohlhyoq nghuot lyis, bicheih ma kat kat kuot chah. Houka tsanlun coeu yah monh lhoeuq dah ohlhyoq thoeu, nghuot ya bu dah monhlhyoq mas tsanlun coeu juot zis nghuot.

⁵Hau jyungshuk gas thyeq auh lywas mas kyap ohlhyoq nghuot lyis gas, monh lyis bicheih ma kat, tsanlun coeu yah lhoeuq las kuot chah.

⁶Nvng hauh zis jyungshuk khyvlyis dyei uhlyis, hauh ohlhyoq lyis khyiq las hauh thoq mas coeu huot kat aq.

⁷Hauh jyungshuk gas auhbanh mas kyap dah ohlhyoq nghuot lyis, monh yahge coeu yah kuot chah.

⁸Hauh zis YHENSAIN lhyi jyungshuk khyvlyis chi los las phudyei soeu lhyi dyei lyis, nyang phon mha chi e das.

⁹Phudyei soeu ka houmha zis dvkhamh yoeus las YHENSAIN lhyi dvnganh phudyei goeus khyvlyis dah jyungshuk lyis phon mha ngheq dyei das. Hai zonoms jyungshuk dah xangh shom ka YHENSAIN lhyi nhaiqdoeus nhang.

¹⁰Nyet dah jyungshuk gas phudyei bang yah sen. Houka YHENSAIN lhyi dyei dah zonoms masyah yoeus zis nghuot las gyingshang thank.

¹¹Namoq YHENSAIN lhyi dyei dah jyo jyungshuk cha mha eq bicheih kat las ma gis kuot. YHENSAIN lhyi dyei dah zonoms jyungshuk mas bicheih, nghuot ya dyoyhei khanhamp eq ma gis yhung.

¹²Namoq dvzvn dvzvn yhomh dah Jyo uh YHENSAIN jyank mas jyungshuk chi los chah. Nghuot laus eq hauh zis phon mha ma gis ngheq.

¹³Zonoms jyungshuk khanghmuh mas coh kat geh: khasoeh ge lyis Coh gas namoq yahge Mangso jo mas soh nhang thanghchvp nghuot. Namoq dah jyungshuk dvnganh mas coh kat chah.

¹⁴Cangxeih yhomh dah Jyo uh YHENSAIN jyank mas jyungshuk chi los lyis, guk shenh[1] dyei chah.

¹⁵Houmha tsanlun coeu huot kat las hauh thoq mas loban kat lung chah.

¹⁶Phudyei soeu ka hau guk shenh soemus yahge phuqsoe jyungshuk khyvlyis coeu yahge loban dvnganh lyis ngheq dyei chah. Houka YHENSAIN lhyi zonoms jyungshuk khyvlyis nghuot.