Read Achang LEWI 21 Bible Online

LEWI 21 - Achang bible

LEWI 21

¹YHENSAIN Moshe lhyi taiq zis gas, Aron loloeu jens phudyei bang lyis taiq aq: Phudyei soeu hank eq buisnoms shei khyomp mas bos zis yah nyah gungs lyis vwot v-oeu vkuot.

²Nghuot laus eq nyah ungwes uwus, lo jens, vmang vnoeuh yahge,

³nyah yhen mha nyeis, yhen ma loh dah nhamhmuh sain gvng mas vwot v-oeu kham gis.

⁴Yhen loh las buisnoms doeus bang dah shei khyomp mas nyah gungs lyis vwot v-oeu ma gis bweh nhang.[9]

⁵Phudyei soeu hank eq nyang kuk nyeis cho chixoeuq khyvlyis uhloms vdwang dwang ma gis yuk, nhuotmi ma gis dainh, nyah gungs lyis ma gis lhyamh cwe.

⁶Nyang gyingshang chah, ngah nyings lyis ma phauh ma danh ma gis kuot. Nyang ngos lyis zonoms jyungshuk phudyei las nyang gyingshang chah.

⁷Phudyei soeu dvyuk gas gyingshang yvmvyah nghe nyhiq bweh ku dah vmesbih, lonyi gyingh ma nghuot soeu, nyah yukgis yah gang goh dah vmesbih lyis nyi ma gis hwank.

⁸Dius jens gas phudyei soeu lhyi gyingshang oen nghamh chah. Khasoeh oen lhyi nyang gas ngos lyis zonoms jyungshuk phudyei. Ngos YHENSAIN nghuot. Ngos gyingshang lha ngah dius jens lyis gyingshang nhang.

⁹Phudyei soeu dah lonyi nghe nyhiq duot lyis nyang nyah uwus lyis xoqphuh nhang yvmvyah nyang lyis ngheq sat chah.

¹⁰Phudyei Zainsmuh gas nyah uhloms mas coeu huot kat, phudyei dyimis wuot das xiklyis cheihshang lha gyamh huon zis xauh kham soeu ka, cam ma tyeh, dyimis langchuiq zis yah nyang kuk cho ma gis chixoeuq.

¹¹Nyang gas ngos lyis kyauh toh las Zvng masyah thuq las dius shei mvng nvm mas loh zis yah nyah gungs lyis ma gis lhoq lhoeuh, gyingshang Zvng lyis vwot v-oeu ma gis bweh nhang. Nyah ungwes uwus shei lhyi yangh ma gis loh.

¹³Nyang lonyi gyingh lyis nyihwank chah.

¹⁴Chauhmuh, yhensain phoq yah gang dah vmesbih, nghe nyhiq kuot ku dah vmesbih lyis phoengh ma gis hwank. Nyah vhuh mas dah lonyi gyingh lyis yoeus chah.

¹⁵Ma nghuot lyis gas, gyingshang chah dah nyah lo jens ma lhoq ma shang mus das. Ngos YHENSAIN nghuot las nyang lyis Phudyei Zainsmuh khyvlyis gvn toeuq toh, ge.

¹⁶YHENSAIN Moshe lhyi tying toh zis gas,

¹⁷Aron lyis taiq aq: Namoq dah dius jangh caiq mas dah lo jens hank laus eq gungs mas nos bos soeu ka ngos lyis zonoms jyungshuk ma gis phudyei. Heika jweh los das vcaiq caiq xiklyis nghuot.

¹⁸Gungs mas nos bos ge zis gas, nyoqjet, khyei gyau, vgus gus ma nghuot dah nyoqnho, gungs ma dyinghjet,

¹⁹loq dung, khyei dung,

²⁰nungsgoeuh, koek, nyoq ma gis, shohyeis noslom yoh soeu yahge nyhihjeih dyoq soeu teh zis nghuot.

²¹Phudyei Aron vnyau mas gungs mas nos bos soeu hank eq ngah jyank mas zonoms jyungshuk ma gis chi los.

²²Housoeh teh soeu ngos lyis phudyei dah gyingshang zonoms jyungshuk yahge gyingshang thank zonoms jyungshuk aiq ja yah gis zo.

²³Nghuot laus eq nyah gungs mas nos bos yvmvyah, gyingshang gosseh nvm mas ma gis los, nghuot ya phon mha ma gis ni los. Nyang hai gyingshang dah vyhang lhyi vwot v-oeu ma gis kuot. Khasoeh ge lyis ngos YHENSAIN nghuot las hauh yvlyis gyingshang nhang toh, ge.

²⁴Heika Moshe Aron yahge nyah loloeu jens, Israel dius jens dvnganh lyis taiq zis nghuot.