Read Achang LEWI 7 Bible Online

LEWI 7 - Achang bible

LEWI 7

¹Haih o mha zis gas yaunos khyuot jyungshuk lyi nghuot. Heika svsoh gyingshang

²Haih jyungshuk gaunyhauq lyis phon dah mautsung shot pheh hau ngheq dyei jyungshuk sat dah joqyos mas sat chah. Hauh suih lyis phon dah nyei shot pheh doeuh gyon chah.

³Hau coeu dvnganh yoeus las phon mha phudyei chah. Lhyank mas coeu, ungkyo,

⁴jinghloms yahge houmha dap coeu, sainh gis thank vdoeus tsain nghuot.

⁵Phudyei soeu ka hau coeu dvnganh yvlyis phon mha YHENSAIN lhyi zonoms jyungshuk khyvlyis ngheq dyei das. Houka yaunos khyuot jyungshuk nghuot.

⁶Phudyei yhenbang loloeu jens dvnganh hau phudyei shoh gis zo. Nghuot laus eq houka svsoh gyingshang yvmvyah gyingshang joqyos mas zo chah.

⁷Yaunos khyuot jyungshuk yahge yaunos jyungshuk dah lyi dvkoeuq dvnghuot. Hauh shoh gas shangphu dyei dah phudyei soeu yah sen.

⁸Ngheq dyei jyungshuk khyvlyis dyei soeu dah gaunyhauq yeis gas hauh zis phudyei dah phudyei soeu yah sen.

⁹Nyikhyomp mas piq, auhbanh mas sont, thyeq pa mha kyap dah jyo jyungshuk dvnganh gas hauh zis Mangso lhyi phudyei dah phudyei soeu yah sen.

¹⁰Nghuot laus eq coeu kat laus eq, vkyuk laus eq, ma jyauq shih dah jyo jyungshuk dvnganh gas Aron loloeu jens phudyei bang dvnganh yah sen lha dvyih gvm goh chah.

¹¹Hai o mha zis gas YHENSAIN lhyi dyei dah nyenstap jyungshuk lyi nghuot.

¹²Dius dvyuk Mangso lhyi nhaiqshoqlang jyungshuk khyvlyis dyei das lyis, hauh zis yah dvgeh gaunyhauq phudyei das. bicheih ma kat kuot dah ohlhyoq jyungshuk, monh yah tsanlun coeu lhoeuq ohlhyoq thoeu, tsanlun coeu juot dah ohlhyoq bu, monh yah tsanlun coeu lhoeuq dah ohlhyoq phudyei chah.

¹³Hau thoq lyis bicheih yah piq dah ohlhyoq eq tsain lung dyei chah.

¹⁴YHENSAIN lhyi lhyenwhei vlu khyvlyis ohlhyoq dvja mas dvlhyoq yoeus las dyei chah. Houka hau gaunyhauq suih yoeus las phon yvm chank doeuh gyon dah phudyei soeu yah sen.

¹⁵Hau gaunyhauq shoh gas hauh zis phudyei nyeih lyis zo chah. Nungsnvp jweh shoq cha eq ma gis nyhet toh.

¹⁶Nghuot laus eq dius dvyuk nyhen toh zis nyuk los las, nghuot ya xihhonh jyungshuk khyvlyis nyenstap jyungshuk chi los las phudyei lyis hauh nyeih lyis phudyei shoh zo las, nyet zis nungs nyeih gis zo.

¹⁷Somh vnyeih jweh shoq nyet shih shoh lyis gas ngheq tyamp chah.

¹⁸Hauh zis somh vnyeih lyis zo lyis gas Mangso ka hauh soeu dah jyungshuk ma lhom yoeus dyei das. Hauh soeu dah phudyei lyis ma suon dyei, vchoqh vlhauq ge dvnghamh dyei das. Zo soeu ka nyah yobos kham chah.

¹⁹Ma lhoq vyhang zangh dah phudyei shoh ma gis zo: ngheq tyamp chah. Cheihshang goeus bang kyingh phudyei shoh dvgis zo.

²⁰Cheihshang zis ma kham soeu hauh zis zo lyis nyang lyis Mangso dah dius nghuot oen ma nghamh dyei lo das.

²¹Dvyuk yuk nyang dius mas dah vwot v-oeu, gaunyhauq mas dah ma lhoq ma shang zis dvja ja zangh tanh thang lhyi haih jyungshuk shoh zo soeu lyis eq Mangso dah dius oen ma nghamh dyei lo das, ge.

²²YHENSAIN Moshe lhyi yah,

²³Israel dius jens xiklyis o mha dah lyi dyei. Yvng coeu, beq coeu, noeu coeu ma gis zo.

²⁴Nyang pheh shei dah gaunyhauq coeu, yewus ngat sat dah shohcoeu ma gis zo. Nghuot laus eq gohyos gas gis yhung.

²⁵Hank laus eq YHENSAIN lhyi zonoms jyungshuk khyvlyis dyei dah gaunyhauq coeu zo soeu lhyi ka Mangso dah dius oen ma nghamh dyei lo das.

²⁶Israel jens nyeis joqyos khanghmuh mas nghoq suih, gaunyhauq shoh lyis zonoms khyvlyis khanhamp eq ma gis yhung.

²⁷Dvyuk yuk haih lyi lyis thyoq soeu lhyi ka Mangso dah dius dvyuk nghuot oen ma nghamh dyei lo das, ge.

²⁸YHENSAIN Moshe lhyi Israel dius jens xiklyis o mha dah lyi dyei.

²⁹Nyenstap jyungshuk dyei soeu hank laus eq YHENSAIN lhyi lhyenwhei jyungshuk khyvlyis dvkhamh chi los chah.

³⁰Hauh yvlyis zonoms jyungshuk khyvlyis nyah loq yah chi los chah. Nyang hau gaunyhauq coeu yah dvgeh sainhkhonh lyis chi los las YHENSAIN lhyi lhyenwhei jyungshuk khyvlyis dyei chah.

³¹Phudyei soeu ka hau coeu lhyi phon thoq mas ngheq das. Nghuot laus eq hau sainhkhonh gas hau phudyei soeu yah sen.

³²Hau gaunyhauq dah loqyos bungssan lhyi ka hau phudyei soeu lhyi lhyenwhei vlu khyvlyis e dyei chah.

³³Nyang gas hau nyenstap jyungshuk suih yahge coeu yoeus las phudyei soeu nghuot.

³⁴YHENSAIN ka Israel dius jens masyah hau gaunyhauq sainhkhonh lyis lhyenwhei jyungshuk, loqyos bungssan lhyi lhyenwhei vlu khyvlyis yoeus las phudyei bang lyis dyei toh. Heika jweh los das shishenh dvnganh mas Israel jens phudyei bang lyis dyei chah zis nghuot.

³⁵Heika YHENSAIN lhyi dyei dah zonoms goeu, Aron yahge nyah loloeu jens lyis phudyei bang khyvlyis muh huon coeu juot nyeih lyis dyei toh.

³⁶Hauh nyeih lyis YHENSAIN ka hau jyungshuk masyah haih goeu dyei das xiklyis Israel dius jens lyis tying toh. Heika jweh los das shishenh dvnganh mas Israel dius jens domsyos gyo chah dah lyi nghuot.

³⁷Haih goeu gas ngheq dyei jyungshuk, jyo jyungshuk, yaunos jyungshuk, yobos khyuot jyungshuk, muh huon jyungshuk, nyenstap jyungshuk dah lyi tsain nghuot.

³⁸YHENSAIN ka Sina boms mas haih tyingtoh dang Moshe lhyi dyei toh. Houka Sina mhanhdyvp mas Israel dius jens nyah jyank mas nyamoq dah jyungshuk chi los chah cho tying buisnyeis lyis nghuot.