Read Achang YEREMIA 10 Bible Online

YEREMIA 10 - Achang bible

YEREMIA 10

¹Israel jens eh, gyo geh, namoq xiklyis YHENSAIN mas dah loeus bos.

²Nyang taiq: Gohnyau bang cho vchank goh; gohnyau bang gyuk dvn laus eq namoq gas maukhung dah lhyenwhei vlho lhyi vgyuk vdvn goh.

³Haih dius jens dah lomsnoq cho ka vkyuh ma bos. Saiq khyam mha saiq thoeuq las saiq ze soeu dah kyonhkhyi yah kyungh toh yvlyis,

⁴ngwis xing yah shunk thang lhyi ma lains loh das xiklyis tyinghzoe yah toenk toenk bat tap toh.

⁵Housoeh teh phvra jens gas lvxau yos mas shohlho teh nghuot. Nyamoq dang ma yoh jis, nyamoq ma yoh loh yvmvyah dvng loh chah. Nyamoq lyis vgyuk, nyamoq nvng lyis ma yoh nos nhang. Nyamoq nvng lyis gis zis cha ma yoh kuot dyei.

⁶YHENSAIN eh, nvng yah doeus zis hank ma bos. Nvng gas yomzains bos, nah nyings gas kuhxing lha yomsoq bos.

⁷Dius nyau jens dvnganh dah hwankti eh, nvng lyis ma chungh zis hank bos? Nvng gas chungh mon soeu nghuot. Dius nyau jens dah joeui bos bang mas, nyamoq dah hwankti jens mas nvng teh zis hank ma bos?

⁸Nyamoq dvnganh gas bang las tsain koh. Nyamoq saiq phvra masyah cha yoh xuq?

⁹Nyamoq dah phvra gas Spain mha dah ngwis, Uphaz mas dah xing yah kyop toh. Hau dvnganh gas loqmuh dap bang dah muh nghuot. Nyamoq hauh phvra lyis lyes dah yoqgan yoq bang yoq dah mislanh seh, nesnoq seh tsain gvmhuot toh.

¹⁰Nghuot laus eq nvng YHENSAIN ka jyoeng dah Mangso nghuot. Nvng gas kang dwis Mangso yahge vcaiq vto hwankti nghuot. Nvng nhaiqyo lyis mungkvn gas nvn. Dius nyau jens gas nvng nhaiqyo yvlyis ma yoh kham.

¹¹Nvng nyamoq lyis taiq chah zis gas, Maukhung yahge nyeisjvng lyis ma kuot toh dah mangso jens gas dyoqbis das. Nyamoq gas nyeisjvng khamha eq ma joq lo das.

¹²YHENSAIN ka nyah yomsoq yah nyeisjvng lyis kuot toh. Nyah joeui yah mungkvn lyis gvnkhanh las maukhung lhyi lhywa toh.

¹³Nyang vmingh yah maukhung thoq mas jeis nyings los. Nyeisjvng vthang mhayah jyommauh shwih los. Nyang mau wus yvmas mau nyoq nyik nhang lha nyah jyi mhayah lyeis nhang kat.

¹⁴Haih zis nyvng lyis dius jens gas bang las cha ma soh lo mus. Phvra kuot bang gas nyamoq kuot cho ma jus yvlyis nyvng los. Khasoeh ge lyis nyamoq kuot dah mangso jens gas shuot, kang eq ma bos.

¹⁵Hauh zis gas phauh ma dap las dius ngis khyoq chah. YHENSAIN soe los tuon lhyi hauh zis gas dyoqbis tyamp das.

¹⁶Yakop dah Mangso ka hauh bang yah ma doeusgoh; nyang gas dvnganh lyis kuot Soeu nghuot. Nyang gas Israel lyis nyah dius jens khyvlyis khyen toh. Maukhung Jesphung YHENSAIN ka nyah nyings nghuot.

¹⁷Yerusalem dius jens eh, Namoq gas lhaink toh zis xauh goeus. Namoq yah sen dah vyhang lhyi tsainh toh geh.

¹⁸YHENSAIN ka namoq lyis haih mau masyah doeuh tyamp bah ge. Nyang gas namoq lyis dvyuk eq ma nyet lo shoq thungh thyi bah ge. YHENSAIN taiq goeus, ge.

¹⁹Yerusalem dius jens kaiq ngaus. Ngamoq nos zis kha iq xungh! Ngamoq dah dvm ma yoh yhoh. Haih zis gas ngamoq yoh kham chah zis nghuot oen ngamoq nghamh.

²⁰Ngamoq dah zvng dyoq gyoh goeus, zwi toh dah twih eq tsain dyet goeus. Ngamoq dah lo jens eq dvnganh loh dyuk goeus. Ngamoq dah zvng doms toeu das zis hank ma nyet lo. Hau gosseh eq hank ma tsain lhangh lo, ge.

²¹Ngos toeuh zis gas, Ngamoq dah uhshe bang gas koh loh goeus. Nyamoq YHENSAIN lhyi choshe das xiklyis ma dung. Housoeh yvmvyah nyamoq somh las, ngamoq dah dius jens dyos sanh loh.

²²Gyo aq, loeus jweh los! mautsung pheh dah dius nyau mas hoeu cho zainsmuh bos. Hauh dah jesphung ka Yuda wus jens lyis sihyos kuot tyamp das. Houmha ye khuih jens nyeis das.

²³YHENSAIN eh, ngamoq gas hank eq vsainnyang dah vthang lhyi ma guon, ngamoq hank eq vsainnyang kang lhyi ma joeu yvlyis ngos seq.

²⁴YHENSAIN eh, nah dius lyis soq dyei aq, nghuot laus eq nvng nhaiqyo uhlyis ngamoq lyis than than vkuot, than than vjoeng. Houka ngamoq dah vthang nghuot.

²⁵Nvng lyis ma paiq dah dius nyau thoq mas yahge nvng lyis peq tyamp bang thoq mas nah nhaiqyo cho lhaiq kat aq. Nyamoq gas nah dius jens lyis sat, ngamoq lyis shank shoq mhont las ngamoq dah mau lyis thyoq khyoq khoq.