Read Achang YEREMIA 14 Bible Online

YEREMIA 14 - Achang bible

YEREMIA 14

¹Mau ma wus das cho yah sen lha YHENSAIN ngos lyis taiq.

²Yuda gas kuk nyeis, nyah wus jens eq shei loh nyeis, nyah dius jens gas kuk zis yah nyeisjvng mas lains joq. Yerusalem gas pangh das xiklyis kaiq ngaus.

³Dis bang gas nyamoq dah jyeidwis jens lyis jeis yoeus nhang. Nyamoq jeis bung mas loh laus eq jeis xo ma nyvng; nyamoq jywang vkom yah tauh los. Nyamoq yom gyau, khamkhvv zis yah nyamoq nyoqnho shung toh.

⁴Houmha mau ma wus las nyeisjvng kyuk yvmvyah yos zwi bang ehnyet nos las nyamoq nyoqnho shung tyamp.

⁵Boms mau mas mhanh ma bos yvmvyah cvtzains gas vsaiq sot dah cvtlo lyis tyamp khoq.

⁶Mauhlyihzoe lamh jens gas jing thyoh mas yap las ye khuih teh lyeis jyop soq she. Nyamoq zonoms ma joq yvmvyah nyamoq nyoqjeih yom ma bos.

⁷Ngah dius jens ngos lyis kaiq sang zis gas, Ngamoq dah yaunos gas ngamoq lyis kauq nyeis laus eq YHENSAIN eh, nvng dangthoengh toh zis yah dvyhangteh ngamoq lyis pangh aq. Ngamoq nah jyank masyah nungs phuk loh zis nyoshoq lhain nghuot goeus, ngamoq nvng lyis tyi lha yaunos kuot goeus.

⁸Nvng gas Israel dah dvyuk kyingh dah nghamhloms soeu nghuot. Nvng gas ngamoq lyis dyoqbis zainsmuh masyah khyuot yoeus soeu nghuot. Nvng chamus ngamoq dah mau mas boenghwus teh nghuot, gyung suh las dvnyens dvyhet soeu teh nghuot?

⁹Nvng gas dvn las mauh nyeis soeu teh, pangh das yomsoq ma bos dah jeslo teh, chamus bweh nyeis lah? YHENSAIN eh, nvng jyoengh nyang ngamoq yah dvgeh nghuot! Ngamoq gas nah dius jens nghuot las ngamoq lyis vjenh tyamp toh.

¹⁰YHENSAIN haih dius jens cho taiq: Nyamoq ngah jyank masyah phang das zis ngwis, nyamoq nyang gungs lyis ma joeu. Housoeh las ngos nyamoq lyis nhaiq ma doeus. Nyamoq kuot goeus dah ma jus cho lhyi soh las nyamoq dah yaunos gvng mas joeng das.

¹¹YHENSAIN ngos lyis taiq: Haih dius jens lyis pangh aq oen ngos lyis vdung.

¹²Nyamoq womkyi laus eq nyamoq lyis pangh aq ge sang yvlyis ngos ma gyo dyei das. Nyamoq ngheq dyei jyungshuk yahge jyo jyungshuk dyei laus eq, ngos nhaiq ma doeus das. Hauh gungsthaiq ngos nyamoq lyis jes mas, yuot zis yahge noslom yah sat das, ge.

¹³Hauh thang lhyi ngos taiq zis gas, Yomzains YHENSAIN eh, lvpe jens gas dius jens lyis jes ma bos das, yuot cho ma bos das, khasoeh ge lyis nvng dangthoengh dyei toh. Nyamoq gas, yah mau mas nyenstap zis kyingh dvbos das ge yvlyis nvng seq.

¹⁴Nghuot laus eq YHENSAIN toeuh zis gas, Lvpe jens gas ngah nyings masyah hwah taiq. Ngos nyamoq lyis ma nhang, vmingh ma dyei, dvkhonh eq ma taiq. Nyamoq taiq dah nyoqnyvng cho ka ngah jyank masyah zis ma nghuot; nyamoq nghamh thuq los las vkyuh ma bos cho pe zis dvnghuot.

¹⁵Haih mau mas jes, phanghkhauq ma bos das ge, ngos ma nhang zis ngah nyings yoeus las pe dah lvpe jens lyis ngos, YHENSAIN cha kuot bah oen zis nvng lyis taiq kyoh. Ngos nyamoq lyis jes mas gyoh nhang das, yuot shei nhang das.

¹⁶Hau pe dang gyo bang lyis eq dvyhangteh shei nhang das. Nyamoq dah mvng lyis hank ma nyhop, Yerusalem talhoeu mha tyamp toh das. Haih zis gas nyamoq eq nyamoq dah yhensain nyhiq jens, loloeu lonyi jens dvnganhmoq mas bweh das. Ngos hai nyamoq dah lhung cho nyamoq thoq mas dyei das.

¹⁷YHENSAIN ka ngos kuk cho dius jens lyis taiq aq ge vmingh dyei. Houka: Ngah dius jens svsoh xungh dah dvmdap las svsoh nos goeus yvmvyah ngah nyoq mas nyoqdyeis gas nyeih nyenh yaus las ngaus zis khanhamp eq ma doms bas jungh.

¹⁸Ngos boms mau pheh thuq loh lyis jes mas gyoh bang dah mvng lyis tsain nyvng, wus vkhau mha wvng los lyis eq yuot shei loh bang lyis nyvng. Lvpe jens yahge phudyei bang gas nyamoq dah muh tsoq kuot nyeis laus eq nyamoq cha kuot yvlyis nyamoq ma seq,[6] ge.

¹⁹YHENSAIN eh, nvng Yuda mau lyis shank shoq peq goeus lah? Nvng Zion bang lyis hoeng lah? Nvng ngamoq lyis ma yoh yhoh shoq hou iq chamus nos nhang? Ngamoq nyenstap cho xo laus eq gis cho ma yoh. Ngamoq yhoh das cho nghamhloms laus eq hauh gungsthaiq gyukphoh cho dvjweh los.

²⁰YHENSAIN eh, ngamoq nvng lyis tyi lha yaunos kuot goeus. ngamoq nyang dah yaunos lyis eq ngamoq phauh thyeih moq dah yaunos lyis eq rhen.

²¹Nah dangthoengh soh las ngamoq lyis vjenh choqh. Nah phunk bos hwankti tank joqyos Yerusalem lyis xoqphuh cho vjenh she los. Nvng ngamoq yah kuot toh dah thanghchvp lyis vjenh thyoq.

²²Dius nyau jens dah phvra khah zis eq mau ma yoh wus nhang. Maukhung eq mau ma yoh wus nhang. YHENSAIN, ngamoq dah Mangso eh, ngamoq nvng lyis nghamhloms toh. Khasoeh ge lyis nvng gas haih vyhang lhyi kuot soeu nghuot.