Read Achang YEREMIA 17 Bible Online

YEREMIA 17 - Achang bible

YEREMIA 17

¹YHENSAIN taiq: Yuda jens eh, namoq dah yaunos gas thyeq pen yah lhaih toh. Houka sing tsenh yah nah nhaiqlom mas, nah phon thunk mas tsain thwang tap toh.

²Namoq dah dius jens gas jing thyoh, saiq nyaus zains khanghmuh dah vyvm mas gywes nyhiq Ashera vlho toeu tsung toh. Hauh phon mha tsain paiq.

³Pa mha dah boms thoq mas eq paiq. Namoq dvmau gonh kuot dah yaunos dvnganh gvng mas ngos namoq dah jeswus jens lyis namoq yoh khuiq cho yahge namoq zisyos yoeus loh nhang das.

⁴Ngos nvng lyis dyei dah mau toh khoq chah das. Ngos nvng lyis, nvng cha ma seq dah mau mas, nah jeswus lyis loh phuqsoe nhang das. Khasoeh ge lyis ngah nhaiqyo cho ka nyi teh nghuot las hauh zis vcaiq vto ngeh das.

⁵YHENSAIN taiq: Ngah jyank masyah phanh loh las seq shei dah cangsoeu yom lyis loms bang lyis dang thang thyet das.

⁶Nyang gas cha ma yoh yuk dah coh tsoh, nyeisgyih yos mas yuk ja, sihyos mas dah mhanh gyomh teh nghuot. Nyang mas gis zis khanhamp eq ma bweh los.

⁷Nghuot laus eq ngos lyis loms soeu lhyi ngos shvmanh dyei das.

⁸Nyang gas jeislo lvng nvm mas yuk las jeis mas vnyet chent loh. Hauh vhuq gas nyaus joq yvmvyah buis gywes nyos jweh los laus eq ma gyuk. Mau ma wus laus eq hauh zis ma chiqh, vjangh vshih shih dah saiqzains teh nghuot.

⁹Dius dah nhaiqlom lyis hank yoh seqgyo? Hou iq seq mhuih zis gohtoeu cha ma bos lo. Houka nyo nos las ma yoh yhoh lo.

¹⁰Ngos, YHENSAIN ka, dius jens dah ehnyet lyis xo lha nhaiqlom lyis shi yoeuh. Ngos nyamoq yuk khanghmuh lyis nyamoq nyang kang dwis vgus, nyamoq kuot vgus kuot das.

¹¹Dang ma jings khyvlyis ngwis yoh soeu ka, nyang ma uq dah uq lyis whop dah nghoq zains yah doeusgoh. Nyah kang vlvt shenhkyoh lyis nyah dis cho dyuk loh das, thang thank lyis nyang gas koh soeu dvnghuot lo.

¹²Yah Yhenmuh gas phunk bos hwankti tank teh, cangxeih lyis yah boms nyhang mha joq.

¹³YHENSAIN eh, nvng gas Israel dah nghamhloms cho nghuot. Nvng lyis tyamp khoq bang dvnganh gas xoqphuh das. Nyamoq gas tsohmop mas nyings lhaih toh bang teh dyuk loh das.[8] Khasoeh ge lyis nyamoq gas jeis cingh jeisthuq dwang nghuot dah YHENSAIN lhyi tyamp khoq.

¹⁴YHENSAIN eh, ngos lyis yhoh dyei aq, housoeh lyis ngos shang shang yanghzan das. Ngos lyis khyuot kat aq, housoeh lyis ngos vlhomuh gau joq das. Nvng gas ngos chungh soeu nghuot.

¹⁵Dius jens gas ngos lyis, YHENSAIN ngamoq lyis tyi lha taiq dah dang khalhye gah? Gvshih bweh los nhang aq, ge.

¹⁶Nghuot laus eq YHENSAIN eh, nyamoq mas dyoqbis zainsmuh she los das nyhenshang ngos khanhamp eq yom ma dyei. Ngos nyamoq mas yau shishenh jweh das zis eq ma o. YHENSAIN eh, haih cho nvng seq, ngos cha taiq goeus zis eq nvng seq.

¹⁷Ngos lyis vgyuk dvn nhang. Yaukyenh los uhlyis nvng gas ngah jesluiq joqyos nghuot.

¹⁸Ngos lyis shoeuhshih bang thoq mas xoqthuq cho she los dyei aq. YHENSAIN eh, ngos lyis gas jenh lhuiq toh aq. Nyamoq lyis gyuk cho yah dyingh nhang aq, ngos lyis gas vjenh gyuk nhang. Nyamoq thoq mas dyoqbis cho she kat las thungh thyi tyamp aq.

¹⁹YHENSAIN ngos lyis taiq: Yeremia eh, Yuda hwankti jens thuq wvng khyam khomh, dius jens dah khyam khomh yahge gohtoeu Yerusalem mas dah khyam khomh dvnganh mas ngah loeus loh taiq hoeuh aq.

²⁰Houmha nyamoq lyis taiq das zis gas, Haih khomh cho tsain wvng dah hwankti jens yahge Yuda dius jens, Yerusalem mas nyeis bang yuk khanghmuh yahge haih wus khomh mas wvng bang, ngos cha taiq zis gyo geh.

²¹Nyamoq lyis taiq aq, nyamoq kang lhyi jyet nghuot lyis, nyamoq no nyeih lyis yvwons ma gis wons. Yerusalem wus khomh cho cha eq ma gis wons wvng.

²²Ngos nyamoq dah phauh thyeih moq lyis tying toh vgus, No nyeih lyis nyamoq yhen mhayah cha eq ma gis wons thuq loh. Nyamoq no nyeih lyis muh ma gis zwi, Gyingshang nyeih nghuot oen chank kuot nyeis chah.

²³Nyamoq dah phauh thyeih moq gas ngos taiq zis ma gyo, ma kamp gyo, hauh gungs thaiq nyamoq ehnyet than los las ngah domsyos ma gyo, ngah jyank masyah ma xuq.

²⁴Haih dius jens lyis ngos tyingtoh dang dvnganh domsyos gyo chah oen taiq aq. Nyamoq No nyeih lyis haih wus khomh chank chah yvwons eq ma gis wons lai. Nyamoq No nyeih gas gyingshang nyeih nghuot oen chank kuot las, chah muh eq ma gis zwi.

²⁵Hauh thang lhyi nyamoq dah hwankti jens yahge hwankti lo jens gas Yerusalem wus khomh cho wvng das las Dawi yoh ku dah yomsoq teh zis tsain yoh. Hauh bang yah dvgeh, Yuda dius jens yahge Yerusalem bang gas jes lhyingh yahge nyang jis las los. Housoeh Yerusalem wugungs gas vjangh dius jens yah dyingh joq das.

²⁶Dius jens gas Yuda wus jens mas zis, Yerusalem yvmlhaink wukhau mas bang, Benyamin mau, boms mau, jing khyei jens, Yuda mautyi mau masyah tsain jweh los das. Nyamoq ngah yhenmuh mas ngheq dyei jyungshuk, lomhxangh, jyo jyungshuk, loban yahge nhaiqshoqlang jyungshuk tsain chi los das.

²⁷Nghuot laus eq nyamoq ngah domsyos gyo chah. No nyeih lyis gyingshang nyeih khyvlyis chank chah. Hauh nyeih lyis Yerusalem wus khomh jens mas yvwons ma gis wons lai. Nyamoq wons lai lyis ngos Yerusalem wus khomh lyis nyi tsain ngheq das. Hauh nyi gas Yerusalem hwankti yhen jens lyis ngheq das las hank eq hauh nyi ma yoh sat das, ge.