Read Achang YEREMIA 19 Bible Online

YEREMIA 19 - Achang bible

YEREMIA 19

¹YHENSAIN ngos lyis: tsoh jywang dvlom loh wis aq, ge. Tsai, dius jens dah logis jens dvyhamh, phudyei logis jens dvyhamh lyis shwih las,

²Auhjvp khomh cho lai las Hinom Langhkhau mha e aq. Houmha ngos nvng lyis dyei dah loeus taiq hoeuh aq.

³YHENSAIN ngos lyis taiq nhang zis gas, Yuda hwankti jens yahge Yerusalem bang eh, Ngos, Maukhung Jesphung YHENSAIN, Israel dah Mangso, taiq chah yvlyis gyo geh. Ngos hauh joqyos mas dyoqbis zainsmuh she kat das. Hauh cho xauhgyo soeu khanghmuh mauh dvn loh das.

⁴Ngos haih zis kuot das: khasoeh ge lyis dius jens ngos lyis tyamp las haih joqyos lyis vwot v-oeu kuot. Nyamoq eq, nyamoq phauh thyeih moq eq, Yuda hwankti jens eq cha ma seq dah gohtoeu mangso jens lyis, haih joqyos mas jyungshuk phudyei. Nyamoq haih joqyos mas tswi ma bos bang dah suih yah dyingh nhang.

⁵Nyamoq gas vsainnyang dah lo lyis lomhxangh khyvlyis ngheq phudyei das ge Bala xiklyis phon tsain ci. Ngos nyamoq lyis haih zis kuot aq oen khanhamp eq ma tying ku. Hauh zis ngah uhnuk mas yangh khanhamp eq ma wvng los ku.

⁶Housoeh las haih joqyos lyis Tophet, nghuot ya Hinom Langhkhau ma ge lo, hauh gungsthaiq Dius sat Langhkhau ge dvseq lo shishenh jweh los das.

⁷Ngos haih joqyos mas Yuda yahge Yerusalem bang nghamh toeuq cho dvnganh lyis thyoq tyamp dyei das. Ngos nyamoq jeswus lyis nyamoq thoq mas ung nhang lha, nyamoq lyis jes mas sat das. Nyamoq dah mvng lyis nghoq jens yahge yewus jens dah zokho kuot das.

⁸Ngos houteh gyukphoh thyoqpi cho haih wus mas she kat das las, houcho suh lai bang yuk khanghmuh dvn zis yah mauh das.

⁹Jeswus jens gas nyamoq dah wus lyis lhaink toh las houmha bang lyis sat bah ge. Hau lhaink toh cho ka gyukphoh nghuot las hauh wus vkhau mha bang nyang changh zo goh las, nyamoq nyang lo jens lyis yangh zo.

¹⁰Hauh thang lhyi YHENSAIN ka ngos yah dvgeh loh bang dah xik mas hauh tsoh jywang khwih aq, ge taiq.

¹¹Nyamoq lyis taiq das zis gas, Maukhung Jesphung YHENSAIN heisoeh ge: Hai gwi dah tsoh Jywang ka ma yoh doms tsomp lo teh, ngos haih dius jens yahge wus lyis khwih tyamp das. Nyamoq dah shei bang lyis Tophet mas nyeisjvng ma ywih lo shoq nyhop das.

¹²Ngos haih wus lyis eq, houmha nyeis dyos bang lyis eq, Tophet joqyos teh kuot das oen dangthoengh toh.

¹³Yerusalem yhen jens, Yuda hwankti jens dah yhen jens yahge yhenkhung thoq mas kyi lhyi xangh ngheq dyei yhen jens, gohtoeu mangso jens lyis jyungshuk khyvlyis zvbiq huot dah yhen dvnganh gas Tophet joqyos teh ma lhoq.

¹⁴Hauh thang lhyi ngos, YHENSAIN ngos lyis nyah loeus taiq kyoh nhang dah Tophet masyah thuq khoq. Ngos yhenmuh khyam khau mha loh yap las dius jens dvnganh lyis taiq.

¹⁵Israel dah Mangso, Maukhung Jesphung YHENSAIN taiq goeus. Namoq gas nhaiqlom than lha ngos taiq zis ma gyo yvmvyah ngos taiq toh dah joeng cho dvnganh, haih wus yahge vyvm vwi wus khanghmuh thoq mas she los das, ge.