Read Achang YEREMIA 2 Bible Online

YEREMIA 2 - Achang bible

YEREMIA 2

¹YHENSAIN ngos lyis taiq,

²Yerusalem mas bang yuk khanghmuh lyis haih loeus taiq hoeuh aq. Namoq wotyamh uhlyis kha iq lomluk yvlyis eq, yang vsaiq phoengh hwank uhlyis namoq ngos lyis khasoeh jyet zis eq, yos ma kuot ku dah mhanhdyvp chank, hau mhanhdyvp chank namoq ngah thang mha chank los zis ngos soh.

³Israel jens eh, nvng gas ngos yah kyingh dvsen. Namoq gas ngos sain dah gyingshang bang nghuot khoq. Ngos namoq lyis nos nhang soeu khanghmuh thoq mas shanghsenh cho yahge dyoqbis zainsmuh nhang. Ngos, YHENSAIN taiq goeus.

⁴Israel vkoq, Yakop dah vnyau vshih jens eh, YHENSAIN dah loeus lyis gyo geh.

⁵YHENSAIN taiq: Namoq phauh thyeih moq ngos lyis tyi lha kauq cho cha chi los? Nyamoq lyis ngah jyank masyah cha yah nungsdoms loh nhang? Nyamoq vkyuh ma bos dah phvra lyis tsain paiq las nyamoq vkyuh ma bos bang bweh loh.

⁶Ngos nyamoq lyis Egutu masyah khyuot las dwang khyoh yah dyingh las kyuk dah sihyos, dius hank ma nyeis, suh e bang yangh ma bos, gyukphoh dah mhanhdyvp mau chank shwih los laus eq nyamoq ngos lyis chaxwe ma nhang.

⁷Ngos nyamoq lyis nyeis coeu bos las hauh jyo xauh yhomh zo das zis yahge gohtoeu gis dah vyhang joq dah mau mas shwih los. Nghuot laus eq hauh gungsthaiq nyamoq gas ngah mau lyis thyoqpi. Ngos nyamoq lyis dyei dah mau lyis vwot v-oeu kuot.

⁸Phudyei bang gas, YHENSAIN khalhye nyeis? ge ma nyei. Ngvnyang dah phudyei bang ngos lyis ma seq. Guon bang ngos lyis tyi lha gomloeus toq. Lvpe jens eq Bala phvra nyings yoeus taiq las vkyuh ma bos dah phvra lyis paiq.

⁹Housoeh yvmvyah ngos YHENSAIN ka ngah soe ngah dius jens yah tyi lha doms taiq das. Nyamoq dah vnyau vshih lyis tyi lha yen das.

¹⁰Kupru goeujo buiswvng pheh loh las, dvyuk yuk lyis buisthuq shot Keda mau mas nhang aq. Nvng heisoeh teh zis xikpheh khanhamp eq ma bweh ku zis nyvng das.

¹¹Gohtoeu khah dius nyau gas nyamoq dah mangso ma gyingh laus eq khanhamp eq ma thaiq loh. Nghuot laus eq ngah dius jens gas nyamoq lyis nyoqnho ngelang she los dyei dah Mangso ngos yah, nyamoq lyis cha ma yoh kuot dyei dah mangso jens yah thaiq goh tyamp.

¹²Housoeh las ngos maukhung lhyi, mauh las dvn shoq gyukphoh nhont aq oen, vmingh dyei.

¹³Khasoeh ge lyis ngah dius jens gas yaunos aiq ja kuot cu goeus. Nyamoq cingh dah jeisthuq dwang ge, ngah jyank masyah phanh loh las, nyamoq nyang jeisdwang tsain doeu. Houka jeis ma yoh lungh dah jeisdwang vgang dvtsain nghuot.

¹⁴Israel gas jons ma nghuot. Nyang gas jons lo khoeu los zis ma nghuot. Houlhyi nyang lyis chamus nyah jeswus jens yah khat khyoq?

¹⁵Nyamoq gas nyah jyank mas khangkhyi jens teh nyings los. Nyamoq nyah mau lyis sihyos kuot goeus. Nyah wus jens eq dyoq gyoh joq goeus. Shank shoq tyamp toh goeus.

¹⁶Nghuot goeus, Memphi yahge Tapanhe dius jens gas nyah uhchoq khwih dyei goeus.

¹⁷Israel eh, haih zis nvnyang dvshe los. Ngos nvng lyis dvcho gonh shwih uhshe los uhlyis ngos YHENSAIN, nah Mangso lhyi tyamp khoq.

¹⁸Nvng Nile lvng mas jeis shuk das zis Egutu pheh e zis vkyuh bos oen nghamh lhyeh? Uphrat lvng mas jeis shuk das zis Asiria pheh loh zis vkyuh bos oen nghamh lhyeh?

¹⁹Nvnyang dah ma gis cho ka nvng lyis joeng das. Nvng ngah jyank masyah tauh loh cho ka nvng lyis dang thang thyet das. Ngos YHENSAIN, nah Mangso lhyi tyamp las ngos lyis lom ma luk lo zis gas kha iq khoh las shuot zis nghuot yvlyis nvng xuq das. Ngos, Yomzains, Maukhung Jesphung YHENSAIN taiq goeus.

²⁰YomzainsYHENSAIN taiq: Gohlhain namoq Israel jens ngah toeuh lyis peq tyamp. Nvng ngah domsyos gyo das zis yahge ngos lyis paiq das zis ngoek. Nvng gas jing nyhang khanghmuh mas, saiq nyaus zains khyei khanghmuh mas nghe nyhiq mangso lhyi tsain paiq.

²¹Ngos nvng lyis gis thank zvbiq nyau masyah khyen tsungh teh khyoq toh. Nghuot laus eq yoeuh aq, nvng cha bweh joq! Nvng gas bop las phauh ma dap zvbiq nwis teh nghuot.

²²Nvng gas soq than thank sapya yah cheih lyis yangh ngos nah yobos lhoeuh zis nyvng shih.

²³Nvng nvnyang gungs lyis vwot v-oeu ma kuot, Bala lyis khanhamp eq ma paiq oen khasoeh yoh taiq lah? Yoeuh aq, nvng langhkhau mha yaunos khasoeh kuot; Nvng cha kuot zis yoeuh aq. Nvng gas shichank mes las dvkhau yah pant yenh dah ye gola-u zains teh nghuot.

²⁴Sihyos mas duon loh. Nyang shichank mes yoq lyis hauh yvlyis hank yoh joeu? Nyang lyis o dah khah vlus eq nyungdaus zis ma kham. Shichank yoq lyis nyang lyis vjangh yoh yhung.

²⁵Israel eh, nah khyei chen mus shoq, nah khyunghkang kyuk shoq gohtoeu mangso lhyi vchank khat. Nghuot laus eq nvng taiq zis gas, Ma nghuot, ngos ma yoh tauh los lo, ngos lvbaus mangso jens lyis jyet las nyamoq thang chank loh das, ge.

²⁶YHENSAIN taiq, khauh soeu ka xauh nyhik lyis xoqphuh teh, Israel hwankti jens, zau jens, phudyei bang, lvpe jens yahge dius jens dvnganh gas nyoqnho ngelang gyoh das.

²⁷Namoq saiqzains lyis uwus, luk-uk lyis ungwes ge bang dvnganh xoqphuh das. Ngah jyank mas los das gungsthaiq ngah jyank masyah nungsdoms loh yvmvyah haih zis bweh los das. Nghuot laus eq nvng yaukyenh uhlyis nvng ngos lyis los khyuot yoeus aq ge sang.

²⁸Namoq nyang xiklyis kuot dah mangso jens khalhye nghuot? Namoq yaukyenh uhlyis nyamoq yoh khyuot yoeus lyis khyuot yoeus nhang aq. Yuda jens eh, namoq wus nyo nyhoq mangso jens eq nyo joq.

²⁹Namoq cha lop? Namoq chamus ngos lyis tyi lha gomloeus toq?

³⁰Ngos namoq lyis joeng laus eq hauh zis ma gis los; namoq ngos lyis ma soq nhang. Nhaiqyo dah khangkhyi teh namoq dah lvpe jens lyis sat.

³¹Israel dius jens eh, ngos cha taiq nyeis zis gyo geh. Ngos nah xiklyis sihyos teh nghuot khoq lhyeh? chuot las gyukphoh jes mau nghuot khoq lhyeh? Housoeh lyis nvng nhaiqdoeus khyvlyis kuot das oen chamus sang? Nvng ngah jyank mas khanhamp eq ma tauh los lo.

³²Lonyi gas nyah phauhdap shunk zis lhyi, lonyi saiq gas nyah phoengh wvng dyimis thau lhyi tohnyhik lhyeh? Nghuot laus eq ngah dius jens gas ngos lyis yoh suon dah buisnyeis thoq lyis zes las tohnyhik toh.

³³Nvng hwank khasoeh xo das zis top seq. Loh thank ma gis dah vmesbih yangh nah jyank masyah yoh xuq.

³⁴Nah dyimis gas shohjyen bang yahge tswi ma bos bang dah suih yah lhoeuh joq. Khauh bang dah suih yah ma nghuot. Nghuot laus eq hai dvnganh dah gungsthaiq

³⁵nvng taiq zis gas, ngos tswi ma bos; jyoengh YHENSAIN ka ngos lyis nhaiq ma yo lo, ge. Nghuot laus eq ngos YHENSAIN nvng lyis joeng das: khasoeh ge lyis nvng yaunos ma kuot ge he.

³⁶Gohtoeu dius nyau jens dah mangso jyank pheh xoeu loh zis yah nvnyang phauh ma tap zo. Nvng gas Asiria gvng mas yom gyau teh Egutu gvng mas yom gyau das.

³⁷Nvng xoqphuh zis yah nah uhloms gop las Egutu masyah tauh los das. Nvng loms toh yvlyis ngos, YHENSAIN peq tyamp. Nvng houmhayah cha ma xauh yoeus das.