Read Achang YEREMIA 20 Bible Online

YEREMIA 20 - Achang bible

YEREMIA 20

¹Ima lo yhenmuh gomh uhjyung, phudyei Pashur gas ngos lvpe taiq dah dang xauhgyo lyis,

²Nyang gas lvpe Yeremia lyis bat lho lha yhenmuh khyam khau, Goq pheh Benyamin khyam khomh nvm mas kyomh kyomh toh.

³Nungs nvp Pashur ngos lyis kyomh masyah lhuiq kat thang lhyi ngos nyang lyis, YHENSAIN nvng lyis Pashur ge ma nyhink, nyang nvng lyis dyei dah nyings gas, Dvkhauyah Gyukphoh, nghuot.

⁴YHENSAIN nyang taiq goeus: ngos nvng lyis nvnyang xiklyis eq, nah dyenschangh jens xiklyis eq gyukphoh zis bweh nhang das. Nvng, nyamoq lyis nyamoq dah jeswus sham yah sat zis, nyvng das. Ngos Yuda jens dvnganh lyis Babilon hwankti yomsoq o mha toh das. Nyang dvyhamh lyis Babilon mau pheh shwih jons loh las dvyhamh lyis sat das.

⁵Ngos nyamoq dah jeswus lyis eq hauh wus dah dis cho dvnganh, nyamoq sain zis dvnganh, vyhang dvnganh, Yuda hwankti jens dah zisyos yangh dvnganh thyoq nhang lha hauh dvnganh lyis Babilon pheh yoeus loh nhang das.

⁶Pashur, nah xiklyis gas nvng eq, nah yhenbang lyis eq xauh nyhik las Babilon pheh shwih loh nhang das. Nvng houmha shei lha nvng hwah zis gyo bang nah dyenschangh jens yah dvgeh nyhop zis xauh das.

⁷YHENSAIN eh nvng ngos lyis mhuih las ngos mhuih zis xauh goeus. Nvng gas ngah thoq lyis yombos las ngos lyis ung goeus. Yuk khanghmuh ngos lyis jwangh las nyamoq ngos lyis dvnyeih gonh nyhap.

⁸Ngos dang taiq khanghmuh, Lhuot zo cho, Dyoqbis cho oen kaiq taiq chah. YHENSAIN eh, ngos nah loeus taiq hoeuh yvmvyah ngos vjangh nhuot yhont las jwangh nyhap zis xauh nyeis.

⁹Nghuot laus eq, Ngos YHENSAIN lhyi tohnyhik das, nyah nyings mas ma taiq lo das oen lhyi, nah loeus gas ngah vkhau mha nyi soeh ngeh las nyungdaus nyeis. Thang thank lyis hauh zis ngah ehnyet mas ma yoh kat toh lo.

¹⁰Dvkhauyah gyukphoh nghuot! Housoeh las yang toeuh yoh bang lyis nyah cho taiq kyoh goh ge yuk khanghmuh nhuot sot sot zis ngos xauhgyo. Ngah dyenschangh kau jens yangh ngos somh gyoh das cho lhaink las taiq zis gas, Yang gas nyang lyis yoh mhuih mvbeh, hauh thang lhyi yang nyang lyis nyhik las lvto phuk goh, ge.

¹¹Nghuot laus eq YHENSAIN nvng gas ngah shot pheh yombos jeszau teh nyeis las, ngos lyis shoeuhshih bang lains das. Nyamoq ma yoh ung yvmvyah vcaiq vto xoqphuh das. Nyamoq dah xoqphuh cho khanhamp eq ma tohnyhik das.

¹²Nghuot laus eq Maukhung Jesphung YHENSAIN eh, nvng gas dius lyis lyi jus jus shi yoeuh. Nvng nyamoq dah nhaiqlom yahge uhnuk mas cha bos zis seq. Housoeh las ngah soe lhyi nah loq mas toh goeus las nvng ngah jeswus lyis lvto phuk zis ngos lyis nyvng nhang aq.

¹³YHENSAIN lhyi chunghthwe kat geh, YHENSAIN lhyi chungh geh. Nyang gas ma gis bang dah yomsoq masyah zaiq zis xauh bang lyis khyuot kat.

¹⁴Ngos lyis khoeu buisnyeis gas nhoengh zis xauh bas jungh. Ngah ungwes ngos lyis khoeu kat nyeih lyis tohnyhik bas jungh.

¹⁵Ngah uwus lyis, Nvng loloeu yoh goeus, ge loeus los kyoh las svsoh gaus nhang soeu ka nhoengh zis xauh bas jungh.

¹⁶Nyang gas YHENSAIN nhaiq ma nyen lo mhont tyamp dah wus teh nghuot bas jungh. Nvpsangh lyis nos las kaiq thwe yahge nyeih gungs lyis jeszan thwe xauhgyo bas jungh.

¹⁷Ngos lyis ma khoeu los, vjangh wons toh ya, ngah ungwes ung ka ngah lop duot das.

¹⁸Ngos chamus khoeu los au? Hauh zis yau cho yahge kuk cho kyingh dvnghuot. Ngah kang ka xoqphuh zis yah thank das.